Engulu mbuya eyahandikawa na Luka 19:1-48
19 Yesu mwahika e Yeriko amalaba omo muyi.
2 Yabya omulume oyukahulawa mo Zakayo. Abya mukulu w’abakalihisaya ebitasi,* kandi abya muteke.
3 Abya anzire kutsibu erilola oko Yesu, nikwa abya isyangatoka kundi ini mukuhi, kandi habya abandu bangyi.
4 Neryo mwatibita embere, amayasambira omo muti w’omukuyu atoke erimulangira, kundi Yesu abya akasonda erilaba omo nzira eyo.
5 Neryo omughulu Yesu ahikaho, mwasamalira endata n’erimubwira ati: “Zakayo, wanguhe, ukime; kusangwa munabwire litolere inabya mugheni waghu.”
6 Neryo mwalw’iniakima n’erimukokya eka wiwe n’obutseme.
7 Abandu babere balangira ekyo, abosi mubahuma-huma, bati: “Amaligha eribya mugheni w’omukola-nabi.”
8 Nikwa Zakayo mwahangana n’eribwira Omukama ati: “Ngendiha abera b’enusu y’ebindu byaghe, n’owosi-wosi oyo nabirinyeghako ekindu kiwe, ngendimusubuliryakyo ngendo ini.”
9 Neryo Yesu mwamubwira ati: “Munabwire omulamo amahika omo nyumba eno; kusangwa naye ni mwana wa Abrahamu.
10 Kusangwa Omughala w’omundu asyasonda-sondaya abaherire n’erilamyabo.”
11 Ibanemuhulikirira ebinywa ebi, Yesu mwabwirabo oghundi musyo; kusangwa abya hakuhi ne Yerusalema kandi babya bakalengekania bati Obwami bw’oMungu bukendilw’ibwasa aho n’aho.
12 Neryo mwabugha ati: “Omulume mughuma w’omo kihanda ky’obwami mwaya omo kihugho ky’ehali eriyasingibwa mo mwami, n’enyuma syaho iniasubula.
13 Mwabirikira erikumi oko baghombe biwe. Mwaghabirabo esyomina* ikumi kandi mwabwirabo ati, ‘Mukole obuhingania omw’esi erihika aho nasyasira.’
14 Nikwa abandu b’ewabo babya bamuponire; neryo mubamutumako abakwenda bayabughe bati, ‘Sitwanzire omulume oyo akabya mwami wetu.’
15 “Oko nduli, abere abisinga mo mwami, mwasubula. Mwabirikira abaghombe abo asighira esyofranga,* atoke eriminya nga babiritunda singahi omo buhingania.
16 Neryo ow’erimbere mwasa n’eribugha ati, ‘Mukama emina* yaghu yabiributa esyomina* ikumi.’
17 Omukama mwamubwira ati, ‘Wasingya kutsibu mughombe mubuya. Kusangwa mughukakanganaya ngoko uli mutaleghula omo mwatsi muke buyira; utabale oko miyi ikumi.’
18 N’ow’akabiri mwasa n’eribugha ati, ‘Mukama emina* yaghu yabiributa esindi itano.’
19 Oyu naye omukama mwamubwira ati, ‘Naghu utabale oko miyi itano.’
20 Nikwa oghundi mwasa n’eribugha ati, ‘Mukama emina* yaghu y’eno; munabikayo omo lukimba.
21 Munakusagha kusangwa ukalire; ukimaya ebyo utabika n’erihulula ebyo utabiba.’
22 Omukama mwamubwira ati, ‘Iwe mughombe mubi, ngendikutswera omo binywa byaghu. Ighuwene-wene wamabugha uti nikalire, ngimaya ebyo nitabika, n’erihulula ebyo nitabiba; ko bite bitya?
23 Neryo ekyaleka ighutahira esyofranga* syaghe sy’omo banke niki? Neryo nangabere nasubula, nangalusirye sy’omo isyabiritunda.’
24 “Neryo mwabwira ababya bimeneho ati, ‘Mumusaghule emina* eyo awiteko. Muheyo oyuwite esyomina* ikumi.’
25 Aliwe mubabwira omukama bati, ‘Mukama, anawite oko syomina* ikumi.’
26 ‘Ngababwira, omundu oyuwite akendisyahabwa ebindi, neryo iniabya n’ebingyi; aliwe oko yutawite, nibya n’ebyo awite akendisyasaghulwabyo.
27 N’ekindi, mulete esyonzighu syaghe syo hano, abatabya banzire inabya mwami wabo; mwitebo omo meso waghe.’”
28 Yesu abere abibugha erikania emyatsi eyi, mwalolya embere olughendo lwiwe lw’erihetukira e Yerusalema.
29 Neryo abere ahika hakuhi ne Betfage ne Betania oko kitwa ekikahulawa mo Kitwa ky’Emizeituni, mwatuma abigha babiri.
30 Mwabugha ati: “Mughende oko mulongo olya. Mukendibya mwabihikayo, mukendilangira ekyana ky’epunda ekyo omundu ate atikalako ikinahangire. Mukendihangulakyo imwaletakyo hano.
31 Omundu amabibabulya ati, ‘Mukahangulakyo busanaki?’ Imwamubwira muti, ‘Omukama amalagha kukyo.’”
32 Neryo abigha abo mubaghenda bameya emyatsi iyine ngoko Yesu analyababwira.
33 Nikwa omughulu babya bakahangula ekyana ky’epunda, abenyekyo mubababulya bati: “Mukahangula ekyana ky’epunda busanaki?”
34 Mubabugha bati: “Omukama amalagha kukyo.”
35 Neryo mubatwala ekyana ky’epunda eyiri Yesu. Kandi mubahira esyongyimba syabo oko kyana ky’epunda ekyo n’erikalya Yesu yo kukyo.
36 Inianemughenda kukyo, abandu mubabya bakasanza esyongyimba syabo omo nzira.
37 Omughulu asonda erihika omo bwandaghala bw’Ekitwa ky’Emizeituni, ekikumula ky’abigha bosi mubatsuka eripipa oMungu omo mulenge muli busana n’ebitiko-tiko byosi ebyo balangira,
38 bakabugha bati: “Omuyisa abye oko Mwami oyukasa omo rina rya Yehova!* Obuholo omo lubula n’olukengerwa oko oyuli endata kutsibu!”
39 Nikwa Abafarisayo balebe ababya omo kikumula ky’abandu mubamubwira bati: “Mukangirirya, ukunge abigha baghu.”
40 Nikwa mwasubiryabo ati: “Ngababwira, aba bamabihuna, amabwe iniakendibirikira omo mulenge muli.”
41 Abere ahika hakuhi n’omuyi we Yerusalema, mwalangiragho n’erilira busana nagho,
42 inianemubugha ati: “Iwe muyi, nga ulyataminya munabwire emyatsi eyikaleta obuholo! Nikwa lino yabiribiswa oko meso waghu.
43 Kusangwa ebiro bikendisyahika omughulu esyonzighu syaghu sikendisyakutimbyako oluba lw’emiti eyitsongire, kandi sikendisyakutimbako n’erikubambira* oko mbande syosi.
44 Bakendisyakughusa ahisi iwe n’abana baghu, kandi sibendisyasigha ewaghu eribwe endata oko rindi, kusangwa mughutaminya omughulu w’eritsopolibwa lyaghu.”
45 Neryo mwingira omo hekalu n’erihighira ehihya abosi ababya bakaghuliryamo,
46 inianemubabwira ati: “Kyabirihandikwa kiti, ‘Enyumba yaghe ikendisyabya nyumba y’erisabiramo’; nikwa inywe mukayirayo mo bwikalo bw’abanyeyi.”
47 Neryo obuli kiro mwabya akakangirirya omo hekalu. Nikwa Abahereri bakulu n’abakangirirya b’Emighambo n’abakulu omo kati-kati k’abandu babya ibanemusondekania erimwita.
48 Nikwa mubatabana enzira y’erikola ekyo kusangwa abandu bosi ibakamuhulikirira ibanamuteghire amatwi wo kutsibu.
Amaelezo awehikwa
^ Kutse “abasolesya.”
^ Emina ni bibande by’ebitsipa, emina nguma ilingene n’obuhingyi bw’emisi isatu. Ulebaye endomeko B14.
^ Kinywa kwa kinywa, ebitsipa.
^ Emina ni bibande by’ebitsipa, emina nguma ilingene n’obuhingyi bw’emisi isatu.
^ Emina ni bibande by’ebitsipa, emina nguma ilingene n’obuhingyi bw’emisi isatu. Ulebaye endomeko B14.
^ Emina ni bibande by’ebitsipa, emina nguma ilingene n’obuhingyi bw’emisi isatu. Ulebaye endomeko B14.
^ Emina ni bibande by’ebitsipa, emina nguma ilingene n’obuhingyi bw’emisi isatu. Ulebaye endomeko B14.
^ Kinywa kwa kinywa, “ekitsipa kyaghe.”
^ Emina ni bibande by’ebitsipa, emina nguma ilingene n’obuhingyi bw’emisi isatu.
^ Emina ni bibande by’ebitsipa, emina nguma ilingene n’obuhingyi bw’emisi isatu.
^ Emina ni bibande by’ebitsipa, emina nguma ilingene n’obuhingyi bw’emisi isatu.
^ Ulebaye endomeko A5.
^ Kutse “erilighotera, erighotera.” Kinywa kwa kinywa, “erikwaghalya.”
