Engulu mbuya eyahandikawa na Luka 2:1-52
2 Oko mughulu oyo, Kaisari Ogisto mwabugha ati abandu bosi b’omo butabali* bwiwe bayayihandikisaye.*
2 Eriyihandikisya ly’erimbere eri, lyabya omughulu Kurenio abya mutabali we Siria.
3 Neryo abandu bosi mubayayihandikisya. Obuli mundu omo muyi w’ewabo eyo abutawa.
4 Yozefu naye mwalua omo muyi we Nazareti omo kiharo kye Galilaya, amaya e Yudea omo muyi wa Daudi owakahulawa mo Betlehemu; kusangwa abya w’omo kihanda n’ekitunga kya Daudi.
5 Mwayayihandikisya haghuma na Maria omukali wiwe. Kandi Maria abya iniakisiya inyabuta.
6 Endambi yiwe y’eributa muyahika ibane eyo.
7 Neryo mwabuta omwana w’obulume, akambere. Mwamuswika esyongyimba n’erimuhira omo kindu ekyo esyonyama sikaliramo. Kusangwa mubatabana omwanya omo byumba by’abagheni.
8 Omo kiharo ekyo mwabya n’abalisya ababya omoli bakateya ebihangulo byabo omo kiro.
9 Omw’itsumbukania, omumalaika wa Yehova* mwahuluka embere syabo. N’erikangabasania ry’olukengerwa lwa Yehova* mulyabatimbako. Mububaha kutsibu.
10 Nikwa omumalaika mwababwira ati: “Isimwakwa obuba; kusangwa ngabatulira engulu mbuya eyikendisyaletera abandu bosi b’obutseme bunene.
11 Kusangwa munabwire, omulamya wenyu ye Kristo, Omukama, abiributwa omo muyi wa Daudi.
12 N’eki, kye kiminyikalo busana nenyu: Mukendyeya olumekeke ilune omo kindu ekyo esyonyama sikaliramo kandi ilunaswikire esyongyimba.”
13 Aho n’aho, abandi bangyi b’omo milondo y’elubula mubatsuka eripipa oMungu haghuma n’omumalaika oyo bati:
14 “Olukengerwa oko Mungu oyuli endata omo lubula, n’obuholo oko kihugho oko bandu abo oMungu akatsemera.”
15 Neryo abamalaika babere balua aho bali n’erisuba elubula, abalisya mubatsuka eribwirana bati: “Tulw’itwaya e Betlehemu tuyalebaye omwatsi owabereyo ogho Yehova* abirituminyisya.”
16 Neryo mubalw’ibaghenda. Mubeyayo Maria na Yozefu, n’omwana inyanaghotsere omo kindu ekyo esyonyama sikaliramo.
17 Abalisya babere balangira omwatsi oyo, mubakania omwatsi ogho balyabwirawa oko mwana oyo.
18 N’abosi abowa ebinywa by’abalisya mubasweka.
19 Nikwa Maria mwabika emyatsi yosi eyo omo bwenge. Kandi mwabya akaghanirya kuyo omo mutima wiwe.
20 Neryo abalisya mubasubula ibanemuhalamba n’eripipa oMungu busana n’ebyosi ebyo bowa n’erilangira, ngoko banabwirawa.
21 Enyuma w’ebiro munani, omughulu w’erimubania abihika, mwahulwa mo Yesu. Eryo ry’erina eryo omumalaika amuha, embere mama wiwe abye mukule.
22 Kandi ebiro by’eryeribwa erikwamana n’Emighambo ya Musa byabere byahika, Yozefu na Maria mubatwala Yesu e Yerusalema, eriyamukangania embere sya Yehova,*
23 ngoko kihandikire omo Mighambo ya Yehova* kiti: “Obuli mwana w’obulume w’erimbere, litolere inyahighulwa mo mubuyirire busana na Yehova*.”
24 Kandi mubaherera obuhere ngoko Emighambo ya Yehova* inabughire yiti: “Ehitungula hibiri kutse ehyana hibiri hy’ehipijo.”
25 E Yerusalema yabya omulume mughuma erina riwe iyo Simeoni. Abya mundu oyutunganene kandi oyukubaha oMungu. Abya akalindirira omughulu oMungu akendisyakirania e Israeli. Kandi abyako ekirimu kibuyirire.
26 Kandi oMungu abya inyabirimubisulira erilabira ekirimu kibuyirire ngoko syendisyahola ate alola oko Kristo wa Yehova.*
27 Omo busondoli bw’ekirimu kibuyirire, Simeoni mwasa omo hekalu. N’omughulu ababuti ba Yesu baleta Yesu omo hekalu, erimukolera erikwamana n’Emighambo,
28 mwawata oko mwana n’eripipa oMungu ati:
29 “Mwami Mukulu, ngoko wanabugha, lino omughombe waghu anganahola omo buholo.
30 Kusangwa ameso waghe amabilangira enzira yaghu y’omulamo
31 eyo wabiriteghekania embere sy’abandu bosi,
32 ekyakakala ekikalusaya ekitambara omo meso w’abandu, kandi ni lukengerwa lw’abandu baghu, e Israeli.”
33 Neryo baba w’omwana na mama wiwe, mubaswekera ebyo bamubughako.
34 Kandi Simeoni mwabatsumula n’eribwira Maria mama w’omwana ati: “Omwana oyu akendisyaleka abangyi omo Israeli ibawa kutse ibahangana. Kandi akendisyabya kiminyikalo ekikendisyaponwa
35 (omuyali muli akendisyalaba omo mutima waghu), amalengekania w’emitima mingyi atoke eribisulwa.”
36 Habya omuminyereri w’obukali yo Ana. Abya mwali wa Fanueli ow’ekihanda kya Aseri. Abya mukekulu kutsibu. Mwabya abilunga, mwikala n’iba wiwe omo myaka irinda (7) misa.
37 Oko mughulu oyo abya mukwakali ow’emyaka 84. Isyalibula omo hekalu inyanemukola omubiiri owabuyirire omo musibo n’omo kiro, kandi inyanemukola amafungo n’erisaba oMungu yo kutsibu.
38 Oko saha eyo, mwasa ahali omwana. Mwasima oMungu n’eritsuka erikanirya abandu ababya bakalindirira erilamibwa lye Yerusalema b’omwatsi w’omwana oyo.
39 Neryo babere babikola ebyosi ebyabya bisabirwe erikwamana n’Emighambo ya Yehova,* mubasuba e Galilaya omo muyi wabo we Nazareti.
40 Omwana oyo mwakula n’eribya n’akaghala. Amenge wiwe mwakanyirira kandi mwabana olukogho lw’oMungu.
41 Neryo ababuti biwe ibakaya e Yerusalema obuli mwaka oko kiro kikulu ky’Epasaka.*
42 Abere abiyira emyaka 12, kandi mubaghenda ngoko banabya babeghere erikola oko biro bikulu.
43 Ekiro kikulu kyabere kyahwa, mubasubula. Nikwa Yesu mwasighala e Yerusalema. N’ababuti biwe mubataminya.
44 Mubalengekania bati ane omo bandu. Neryo babere babighenda olughendo lw’ekiro kighuma, mubatsuka erimusonda-sonda omo kati-kati k’abatunga babo n’abandu abo baminyene nabo.
45 Neryo babere babimubula, mubasuba e Yerusalema bamayamusondya-sondya kutsibu.
46 Enyuma w’ebiro bisatu, mubamubana omo hekalu. Abya inyanikere omo kati-kati k’abakangirirya. Abya inyamemubahulikirira n’eribabulya amabulyo.
47 Nikwa ababya bakamuhulikirira, ibakasweka busana n’amenge wiwe n’erisubirya liwe.
48 Ababuti biwe babere bamusunga, mubasweka kutsibu. Neryo mama wiwe mwamubwira ati: “Mwana waghe, ekiryaleka iwatukolera utya niki? Talebya! Ingye na baba waghu twabirikusondya-sondya kutsibu itune n’engitsi nene.”
49 Aliwe mwabasubirya ati: “Ekiryaleka imwanisondya-sondya niki? Simulue mwasi ngoko litolere inabya omo nyumba ya Tata?”
50 Nikwa mubataminya ebyo abya akababwira.
51 Neryo mwaghenda haghuma nabo bamasuba e Nazareti. Kandi mwalola embere eribowa. Na mama wiwe mwabika ndeke ebinywa byosi ebi omo mutima wiwe.
52 Yesu mwalola embere eribya n’amenge n’erikula. Kandi mwalola embere eribana erisimwa omo meso w’oMungu n’aw’abandu.
Amaelezo awehikwa
^ Kutse “abandu b’omo kihugho kyosi.”
^ Kutse “etsapa.”
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Kutse “Erikiruka.”
