Engulu mbuya eyahandikawa na Luka 20:1-47
20 Kiro kighuma Yesu inianemukangirirya abandu omo hekalu n’eritula engulu mbuya, abahereri bakulu, abakangirirya b’Emighambo haghuma n’abasondoli b’Abayahudi,
2 mubamubwira bati: “Utubwire, ukakola emyatsi eyi omo hamuli yandi? Kandi nindi yo wakuha ehamuli y’erikola emyatsi eyi?”
3 Mwasubiryabo ati: “Naghe ngendibabulya eribulyo righuma, nenyu munzubiraye:
4 Olubatiso lwa Yohana, lwalua oko Mungu* kutse oko bandu?”
5 Neryo mubabwirana bati: “Twamabibugha tuti, ‘Lwalua oko Mungu,’ iniakendibugha ati, ‘Neryo ekyaleka imutamwikirirya niki?’
6 Aliwe kandi twamabibugha tuti, ‘Lwalua oko bandu,’ abandu bosi ibakenditwita omo mabwe; kusangwa bikirirye kundu bati Yohana abya muminyereri.”
7 Neryo mubasubirya bati sibasi oyo wamutuma nga nindi.
8 Yesu mwabwirabo ati: “Kwesi naghe sinendibabwira nga ngakola emyatsi eyi omo hamuli yandi.”
9 Neryo mwatsuka erikanirya abandu b’omusyo ono, ati: “Omundu mwahera eririma ry’emizabibu. Mwasighiralyo abalimi, neryo amaghenda omo kindi kihugho. Mwabughayo ebiro nga bye n’ebyo.
10 Oko kirimo ky’emizabibu, mwatuma omughombe eyiri abalimi bamuhe oko matunda w’omo ririma ly’emizabibu. Aliwe abalimi babere babihunza omughombe oyo mubamusubulya byala bisa.
11 Mwasyatuma oghundi mughombe. Oyu naye mubamuhunza n’erimuhemula n’erimusubulya byala bisa.
12 Aliwe, kandi mwatuma omughombe w’akasatu. Oyo naye mubamuhutangalya n’erimughusa ehihya w’eririma.
13 Omwenye ririma ly’emizabibu mwabugha ati: ‘Niyire niti? Ngendituma mughala waghe omwanzwa. Sibangabula erisikya mughala waghe.’
14 Abalimi babere bamulangira, mubabwirana bati, ‘Oyu yo mwenye mwandu. Mwase tumwite; omwandu atoke eribya wetu.’
15 Neryo mubamughusa ehihya w’eririma ly’emizabibu n’erimwita. Omwenye ririma ly’emizabibu akendisyayira abaghombe aba b’ati?
16 Akendisyasa n’eriita abalimi abo n’erihira eririma ry’omo byala by’abandi bandu.”
Babere bowa ekyo mubabugha bati: “Ekyo isikyanatabya n’ahake.”
17 Nikwa mwatungererabo n’eribugha ati: “Neryo ebinywa ebihandikirwe omo masako ebi ebikabugha biti: ‘Eribwe eryo abahimbi baghana ryabiribya ribwe rikulu ry’oko ngonde,’* bikasonda eribugha bitiki?
18 Obuli mundu oyukendisyayitinira oko ribwe eryo akendisyabunangika kutsibu, n’omundu wosi-wosi oyo likendisyatererako likendisyamubunzungula.”
19 Abakangirirya b’Emighambo n’abakulu b’abahereri mubaminya ngoko n’ibo bo Yesu akahula omo musyo oyo. Neryo mubasonda erimuhamba oko na ndambi eyo, aliwe mubasagha abandu.
20 Neryo babere babimutungerera, mubaliha abandu omo bubiso-biso eriyayikangania nga ni bandu abatunganene. Neryo mubamutuma b’oko, bamuteghe omo binywa biwe, neryo ibatoka erimuhira omo byala by’abakulu n’eby’omuguvernere.
21 Neryo mubamubulya bati: “Mukangirirya tunasi ngoko ukabugha n’erikangirirya ndeke, kandi sighulimo kasololo; aliwe ukakangiriraya enzira y’oMungu omo kwenene:
22 Erikwamana n’Emighambo, tunatolere eriliha Kaisari y’omusolo kutse iyehe?”
23 Mwaminya obutebya* bwabo. Neryo mwabwirabo ati:
24 “Munikanganaye edinari.* Yiriko ebihandiko byandi n’epitsa yandi?” Mubabugha bati: “Ebya Kaisari.”
25 Mwabwirabo ati: “Busana n’ekyo mulihe Kaisari y’ebindu bya Kaisari, n’oMungu ebindu by’oMungu.”
26 Mubatatoka erimuhamba omo binywa biwe embere sy’abandu; nikwa mubabya bukutu kundi mubasweka busana n’ebinywa biwe.
27 Neryo Abasadukayo balebe mubasa ahali Yesu. Abasadukayo bikirirye bati sihali erilubuka. Mubamubulya bati:
28 “Mukangirirya, Musa mwatuhandikira ati, ‘Omughala wabo mundu amabihola nikwa iniasigha omukali isyalyabuta naye abana, litolere mughala wabo inyasighalya omukali oyo atoke eributira mughala wabo y’abana.’
29 Neryo habya abalume irinda (7) abasubeneko. Ow’erimbere mwatahya, aliwe mwahola isyalyabuta omwana.
30 Neryo ow’akabiri
31 n’ow’akasatu mubamusighalya. Mubyabya bitya oko bosi irinda (7). Abosi mubahola isibetamubutako omwana n’omughuma.
32 N’oko nduli, omukali naye mwahola.
33 Neryo okw’ilubuka, akendisyabya mukali wandi oko bosi? Kundi mwabya mukali w’abosi irinda (7).”
34 Yesu mwasubiryabo ati: “Abana b’omo mughulu* ono bakatahaya n’eritahibwa;
35 aliwe ababirihabwa olusunzo lw’erisyabya omo mughulu* owakasa n’erilubuka erilua oko baholi sibalitahaya kutse eritahibwa.
36 Sibangasyahola, kusangwa bali ng’abamalaika, kandi ni bana b’oMungu busana n’erilubuka.
37 Nikwa Musa akakanganaya ngoko abaholi bakendisyalubuka. Omo mwatsi w’ekisaka ekyakako omuliro, akahula Yehova* mo ‘Mungu wa Abrahamu, oMungu wa Isaka, na Mungu wa Yakobo.’
38 Iye ni Mungu w’abaliho, si Mungu w’abaholi; kusangwa okw’iye, abosi baliho.”
39 Neryo abaghuma b’oko bakangirirya b’Emighambo mubasubirya bati: “Mukangirirya wamabugha ndeke.”
40 Kusangwa babya isibakiri n’omuhwa w’erimubulya eribulyo ryosi-ryosi.
41 Neryo Yesu naye mwabulyabo ati: “Busanaki abandu bakabugha bati Kristo ni mughala wa Daudi?
42 Kusangwa omo kitabu ky’Esyonyimbo Daudi iyuwene-wene akabugha ati, ‘Yehova* mwabwira Omukama waghe ati: “Wikale oko luhande lwaghe lw’amali
43 erihika omughulu ngendisyayira esyonzighu syaghu mo kindu* ky’erihirako ebisando byaghu.”’
44 Daudi akamwahula mo Mukama; neryo kyangatasyatokekana kiti Kristo iniabya mughala wiwe?”
45 Abandu bosi ibanahulikirire, Yesu mwabwira abigha biwe ati:
46 “Muyiteghaye oko bakangirirya b’Emighambo. Bakanza erilendera ibanambite esyokanzu nyiri-nyiri kandi bakanza eriramukibwa omo syosoko.* Bakanza ebitumbi by’embere-mbere omo syosinagogi* n’eryikala omo bitumbi by’olukengerwa ahali erirya,
47 bakanyegha* amanyumba* w’abakwakali. Kandi busana n’eriyikangania bakasaba emisabe miri-miri. Abandu aba bakendisyasuyirwa* kutsibu.”
Amaelezo awehikwa
^ Kinywa kwa kinywa, “lwalua elubula?”
^ Kutse “esonda.”
^ Kutse “obulimba-limba.”
^ Ulebaye endomeko B14.
^ Ulebaye amaana w’ebinywa.
^ Ulebaye amaana w’ebinywa.
^ Ulebaye endomeko A5.
^ Ulebaye endomeko A5.
^ Kinywa kwa kinywa, “ekitumbi ky’ebisando byaghu.”
^ Kutse “ehitale.”
^ Ulebaye amaana w’ebinywa.
^ Kinywa kwa kinywa, “bakamera.”
^ Kutse “ebindu.”
^ Kutse “bakendisyahabwa amalipizi awakalire.”
