Engulu mbuya eyahandikawa na Luka 21:1-38
21 Yesu abere asamalira eyiri ebibo by’eritogheryamo esyofranga omo hekalu, mwalangira abateke ibanemutogherya ebihembo byabo omo bibo.
2 Neryo mwalangira omukwakali mwera akatogheryamo ebitsere* bibiri by’obughuli buke kutsibu.
3 Neryo mwabugha ati: “Oko kwenene ngababwira ngoko omukwakali mwera oyu amatogheryamo ebingyi kulenga abandi bosi.
4 Kusangwa abandi bosi mubakatogherayamo ebihembo erikwamana n’ebingyi ebyo bawite, aliwe iye nomo ane mwera, mwakahiramo ebyosi ebyo awite omw’ibyaho liwe.”
5 Enyuma syaho omughulu abandu balebe babya bakakania oko hekalu n’erikangania ngoko ipambirwe omo mabwe awaghambire n’ebindu ebyahebawa oko Mungu,
6 Yesu mwabugha ati: “Ebindu ebyo mwamalangira ebi, ebiro bikendisyahika sihali eribwe n’erighuma erikendisyasighala oko rindi eritendisyasambulwa.”
7 Neryo mubamubulya bati: “Mukangirirya, kwenene-kwenene emyatsi eyi ikendisyabya mughulu wahi? N’ekiminyikalo ky’erihika ly’emyatsi eyi, ni kyahi?”
8 Mwasubirya ati: “Mulebaye ndeke simutebibawe; kusangwa abangyi bakendisyasa omo rina ryaghe bakabugha bati, ‘Ingye ye,’ kandi, ‘Endambi yiri hakuhi.’ Isimwakwamabo.
9 Kandi omughulu mukendisyalangira amalwa n’obutsumbu-tsumbu, isimwahahukaya emitima. Kusangwa litolere emyatsi eyi iyatsuka eribya aliwe enduli siyendisyalw’ikahika aho n’aho.”
10 Neryo mwabirabo ati: “Ekihanda kikendisyalwa n’ekindi kihanda, n’obwami n’obundi bwami.
11 Hakendisyabya emisiki minene-minene, n’erikeha ly’akalyo, n’amakoni owakasighalira omo biharo mbiriri-mbiriri. Kandi abandu bakendisyalangira emyatsi eyikubahisaya n’ebiminyikalo binene-binene bikasira omo kyanya.
12 “Nikwa embere emyatsi yosi eyi yibye, abandu bakendisyabahamba n’eribaghalya.* Bakendisyabatwala omo syosinagogi* n’eribaghusa omo muliki; bakendisyabatwala embere sy’abami n’abatabali busana n’erina ryaghe.
13 Ekyo kikendisyabaha akanya k’eritula engulu mbuya.
14 Muyisoghe eritenditsuka erighanirya nga mukenditonda mutiki,
15 kusangwa ngendisyabaha ebinywa n’amenge ebyo esyonzighu syenyu, esyosi haghuma, sisyendisyatoka erisinga kutse erighania.
16 Kandi nibya n’ababuti benyu, abaghala benyu, abatunga benyu, n’abira benyu bakendisyabahotera; kandi bakendisyita abaghuma b’okw’inywe.
17 N’abandu bosi bakendisyabapona busana n’erina ryaghe.
18 Nikwa sihali oluywiri n’olughuma l’oko mitwe yenyu olukendisyahera.
19 Eriyiyinia lyenyu likendisyasabula esyongebe syenyu.
20 “Nikwa omughulu mukendisyalangira omuyi we Yerusaleama iniabiritimbwako n’abasuda, imwaminya ngoko eritoghotibwa lyagho liri hakuhi.
21 Neryo abali e Yudea batsuke eritibita oko bitwa, n’abali omo muyi bahighukale, n’abali omo biharo by’endambi-ndambi isibingira omo muyi,
22 kusangwa ebiro ebyo ni biro by’oMungu by’eritswera* abandu; emyatsi yosi eyabirihandikwa itoke eribererera.
23 Obulighe oko bakule n’abakendisyabya n’abana abakanyonya* omo biro ebyo! Kusangwa hakandisyabya amaghali manene oko kihugho, n’erihitana ry’oMungu oko bandu aba.
24 Kandi abandu bakendisyakwa omo bwoya bw’omuyali, n’eritwalwa mo banyewa omo bihanda byosi. Kandi ebihanda bikendisyalyatangira e Yerusalema erihika aho emighulu y’ebihanda ikendisyabererera.
25 “Kandi hakendisyabya ebiminyikalo omo ryuba, omo mughenda n’omo syongununu. N’ebihanda by’oko kihugho bikendisyabya omo bulighe kandi bikendisyabula eky’erikola busana n’erihuha n’eriyidunga ly’engetse.
26 Abandu bakendisyalekula busana n’obuba na busana n’emyatsi eyikendihika oko kihugho kyosi, kusangwa ebindu by’amaka by’omo kyanya bikendisyasuka-sukanibwa.
27 Neryo bakendisyalangira Omughala w’omundu akasa omo kitu n’obutoki bunene n’olukengerwa.
28 Nikwa omughulu mukendisyalangira emyatsi eyi ikahika, muhangane n’erisumba emitwe yenyu kusangwa omulamo wenyu ali hakuhi.”
29 Neryo mwabwirabo omufano* ati: “Muleberaye oko muti w’omutini n’eyindi miti yosi.
30 Omughulu ikatsuka eryasako ehitahi hilere-hilere, mukalw’imwalangira inyw’ibene-bene n’eriminya ngoko omughulu w’omwisi ali hakuhi.
31 Nenyu kutya, omughulu mukendisyalangira emyatsi eyi ikabya, imwaminya ngoko Obwami bw’oMungu buli hakuhi.
32 Oko kwenene ngababwira, ekizazi* eki sikyendisyalaba emyatsi yosi iteyabererera.
33 Ekyanya n’ekihugho bikendisyalaba, aliwe ebinywa byaghe bikendisyabyaho kera na kera.
34 “Nikwa muyiteghaye emitima yenyu isiyalitoha busana n’erirya kutsibu, eritamira, n’erihangya-hangya ly’engebe, neryo ekiro ekyo ikyalw’ikyabahikako omw’itsumbukania
35 ng’ekitegho. Kusangwa kikendisyahika oko bandu bosi abikere oko kihugho.
36 Neryo mubye imunalolire; mughulu wosi imunemulemba-lemba oMungu omo musabe mutoke erisyabala oko myatsi yosi eyi, eyitolere iyahika, n’eritoka erisyahangana embere sy’Omughala w’omundu.”
37 Omw’itungyi iniakabya omo hekalu akakangirirya, nikwa omwigholo iniakaluamo, iniayaghotsera oko Kitwa ky’Emizeituni.
38 N’abandu bosi ibakatsinduka omo hekalu bakasyamuhulikirira.
Amaelezo awehikwa
^ Kinywa kwa kinywa, “esyolepta ibiri.” Ulebaye endomeko B14.
^ Kutse “eribendererya.”
^ Ulebaye amaana w’ebinywa.
^ Kutse “ebiro by’erikisya.”
^ Kutse “abakonga.”
^ Kinywa kwa kinywa, “omusyo.”
^ Kutse “olulengo.”
