Engulu mbuya eyahandikawa na Luka 22:1-71
-
Abahereri bakaya embita y’eryita Yesu (1-6)
-
Eriteghekania Epasaka y’omwiso (7-13)
-
Eritsukisya Akalyo k’Erigholo-gholo k’Omukama (14-20)
-
“Oyukendinihotera ane haguma naghe oko mesa” (21-23)
-
Obuhaka obukalire oko mwatsi w’obukulu (24-27)
-
Endaghane ya Yesu y’Obwami (28-30)
-
Yesu akabugha ati Petro akendimughana (31-34)
-
Litolere eriyiteghekania; emiyali ibiri (35-38)
-
Yesu akasaba inyane oko Kitwa kye Mizeituni (39-46)
-
Yesu amahambwa (47-53)
-
Petro akayighana Yesu (54-62)
-
Yesu amasekereribwa (63-65)
-
Eritondesibwa embere sye Sanhedrini (66-71)
22 Ekiro kikulu ky’erirya Omukati Owatemo Levire* ekikahulawa mo Pasaka* kyabya ikiri hakuhi.
2 Kundi abahereri bakulu n’abakangirirya b’Emighambo babya bakasagha abandu, babya ibanemusondekania enzira eyuwene y’eriita Yesu.
3 Neryo Sitani mwingira omo mutima wa Yuda oyo wabya akahulwa mo Iskariote, omughuma w’oko bakwenda 12.
4 Mwayakania n’abahereri bakulu, n’abakulu b’abateya b’ehekalu ng’angahotera Yesu y’ati okw’ibo.
5 Mubatsema bakowa omwatsi oyo. Kandi mubalagha erimuha esyofranga sy’efeza.*
6 Yuda mwaligha omwatsi oyo n’eritsuka erisondekania akanya akuwene k’erimuhotera okw’ibo ahate bandu.
7 Neryo ekiro ky’erimbere ky’erirya Omukati Owatemo Levire* mukyahika. Ekiro ekyo ibakakera enyama y’Epasaka.*
8 Neryo Yesu mwatuma Petro na Yohana. Mwabwirabo ati: “Mughende muyatuteghekaniraye akalyo k’Epasaka.”*
9 Mubamubulya bati: “Wanzire itwayateghekaniryayo hayi?”
10 Mwabwirabo ati: “Mukendibya mwabingira omo muyi, omulume oyuhekire eriregha ly’amaghetse akendihindana nenyu. Mukendimukwama omo nyumba eyo akendingiramo.
11 Neryo mukendibwira omukama w’enyumba eyo muti, ‘Omukangirirya ati: “Ekyumba ky’abagheni kiri hayi aho ngendilira Epasaka* haghuma n’abigha baghe?”’
12 Neryo omulume oyo akendibakangya ekyumba kinene ky’endata ekirimo ebyosi; muteghekaniraye Epasaka* y’aho.”
13 Mubaghenda n’eryeya emyatsi iyine ngoko Yesu anabwirabo. Neryo mubateghekania Epasaka.*
14 Neryo endambi yabere yahika, mwikala oko mesa haghuma n’abakwenda.
15 Neryo mwababwira ati: “Nanzire kutsibu erirya Epasaka eyi yo haghuma nenyu embere nighalawe;
16 kusangwa ngababwira, sinendisyasyalyayo erihika aho enzumwa eyaleka iyahirwaho ikendisyabererera omo Bwami bw’oMungu.”
17 Neryo mwapokera ekikombe, amaha oMungu y’ewasingya omo musabe n’eribugha ati: “Mwimaye ekikombe eki, mulabiranayekyo.
18 Oko kwenene ngababwira, sinendisyasyanywa oko divai erihika aho Obwami bw’oMungu bukendisyasira.”
19 Kandi mwimya omukati, amasima oMungu, amatsutsangagho, neryo amabahagho n’eribugha ati: “Ono akasosekanaya omubiri waghe owakendihererwa busana nenyu. Mubye mukakola mutya busana n’erinibuka.”
20 Mwimya n’ekikombe babibugha erirya akalyo k’erigholo-gholo. Mwabugha ati: “Ekikombe eki kikasosekanaya endaghane nyihya-nyihya eyikendiliwa erilabira omusasi waghe, owakendyutika busana nenyu.
21 “Nikwa oyukendinihotera ane haghuma naghe oko mesa ko hano.
22 Kusangwa, kwenene Omughala w’omundu akendilusibwa okw’inywe ngoko kyanabiribuwa. Nomo bine, ni bulighe oko oyukendimuhotera.”
23 Neryo mubatsuka eribulania omo kati-kati kabo nga nindi omw’ibo yo wangabya iniakisigha inyakola ekyo.
24 Aliwe, kandi muhabya obuhaka bunene omo kati-kati kabo nga nindi yo mukulu kutsibu omw’ibo.
25 Nikwa mwabwirabo ati: “Abami b’abandu bakatabala kubo, n’abawite ehamuli oko bandu bakahulawa mo Bandu Babuya.
26 Inywe siritolere mukabya mutya. Nikwa omukulu kutsibu omo kati-kati kenyu abye ng’omulere kutsibu, n’oyukasondola abye nga mughombe wenyu.
27 Kusangwa oyuli oko mesa, n’oyukakolera oyuli oko mesa, omukulu oko ghundi yo wahi? Oyuli oko mesa; ko bite bitya? Nikwa ingye nyiri omo kati-kati kenyu nga mughombe wenyu.
28 “Nikwa inywe mwabirinimakirira omo maligho waghe.
29 Neryo ngakola endaghane y’obwami haghuma nenyu; ngoko Tata naye abirikola endaghane y’obwami haghuma naghe,
30 mutoke erisyalira n’erinywira oko mesa yaghe omo Bwami bwaghe n’eryikala oko bitumbi by’obwami mukatswera ebihanda 12 bye Israeli.
31 “Simoni, Simoni! Sitani abirisaba eribaghulukya ng’engano.
32 Nikwa nabirilemba-lemba oMungu omo musabe busana naghu, obwikirirya bwaghu sibukehe. Wasyabya wasubula, usikaye obwikirirya bw’abaghala benyu.”
33 Neryo Petro mwamubwira ati: “Mukama ninayiteghekire erighenda naghu omo muliki n’erihola haghuma naghu.”
34 Nikwa Yesu mwabugha ati: “Ngakubwira Petro, munabwire engoko-lume siyendibika, utewaghana ngendo isatu uti sighunyasi.”
35 Kandi mwabwirabo ati: “Omughulu nabatuma n’eribabwira nyiti isimwaheka akafuko k’eribikamo esyofranga, kutse akaghunza k’akalyo kutse ebiryato, mumwanabula kindu?” Mubabugha bati: “Iyehe!”
36 Neryo mwabwirabo ati: “Nikwa lino oyuwite akafuko k’eribikamo esyofranga ahekeko, kutya n’akaghunza k’erihekamo akalyo. N’oyutawite omuyali, aghulaye erikoti riwe aghulegho.
37 Kusangwa ebinywa byosi ebyahandikawa okw’ingye litolere ibyabererera. Ebinywa bino, ‘Mwaghanzwa haghuma n’abakola-nabi,’ binemuberera okw’ingye.”
38 Neryo mubabugha bati: “Mukama hano hane emiyali ibiri.” Naye mwabugha ati: “Eyo yitosire.”
39 Mwaluaho amaya oko Kitwa ky’Emizeituni ngoko anabya abeghere erikola. N’abigha mubamukwama.
40 Neryo abere ahikaho, mwabwirabo ati: “Muyitsinge erisaba mukasyingira omw’ilengwako.”
41 Neryo mwalua aho bali amatambukira aho lutambi.* Mwakukama n’eritsuka erisaba.
42 Mwabugha ati: “Tata, wamabya ighunanzire, unilusayeko ekikombe eki. Nikwa erisonda ryaghu ryo rikoleke, butsira erikuwaghe.”
43 Neryo omumalaika mwalua elubula, amamutsubukako n’erimusikya mutima.
44 Nikwa Yesu mwaghalwa kutsibu omo mutima. Neryo mwasaba kutsibu. N’olunza lwiwe mulwabya ng’amatondi w’omusasi akatoghongera oko kitaka.
45 Mwabya abisaba, mwahangana n’eriya eyiri abigha biwe. Mweyabo ibanemuyitsingirako; ibabiriluha busana n’obulighe.
46 Mwabulyabo ati: “Mukayato busanaki? Muhangane, muyitsinge erisaba mukasyingira omw’ilengwako.”
47 Iniakinabugha, ekikumula ky’abandu mukyasa. Yuda Iskariote omughuma w’oko bakwenda ikumi n’ababiri yo wabya akasondolabo. Neryo mwaya ahali Yesu n’eriyamuha ebeze.*
48 Nikwa Yesu mwamubulya ati: “Yuda, tami ukahotera omughala w’omundu omw’imuha ebeze?”*
49 Ababya haghuma na Yesu babere babilangira ebikasonda eribya, mubabugha bati: “Mukama, tubandangebo omo muyali?”
50 Nibya omughuma wa kubo mwabanda omughombe w’omuhereri mukulu n’eritwa okutu kwiwe kw’amali.
51 Nikwa Yesu mwabugha ati: “Koko!” Neryo mwatula oko kutu oko n’erimulamya.
52 Neryo Yesu mwabulya abahereri bakulu n’abakulu b’abateya b’ehekalu n’abakulu b’Abayahudi abasyamuhamba ati: “Mumukasa n’emiyali n’emyigho* nga mukasyahambaho mwibi?
53 Omughulu nabya ngasiba nenyu ebiro byosi omo hekalu ka mumutanihamba! Nikwa eno y’endambi yenyu n’ey’obutoki bw’omwirimya.”
54 Neryo mubamuhamba n’erimutwala. Mubamuleta omo nyumba y’omuhereri mukulu; nikwa Petro mwakwamabo iniane hali.
55 Babere bakya omuliro omo kati-kati k’olubugha-bugha n’eryikala haghuma, Petro naye mwikala aho bali.
56 Nikwa omusika mughuma ow’oko baghombe, mwalangira Petro inianikere ahali omuliro. Mwamutungerera kutsibu n’eribugha ati: “Omulume oyu naye abya haghuma naye.”
57 Nikwa Petro mwayighana, ati: “Omulume oyo sinimwasi.”
58 Habere halaba akatambi kake, oghundi mundu mwamulangira n’eribugha ati: “Naghu uli mughuma wa kubo.” Nikwa Petro mwabugha ati: “Iyehe!”
59 Habere halaba eyiri nga saha nguma, oghundi mulume mwahatikana ati: “Oko kwenene omulume oyu naye abya haghuma naye, kusangwa naye nibya ni Munya Galilaya.”
60 Nikwa Petro mwabugha ati: “Mulume, sinyasi ebyo ukabugha nga ni bihi.” Neryo aho n’aho iniakinabugha, engoko-lume muyabika.
61 Neryo Omukama mwakeba n’eritungerera Petro. Neryo Petro mwibuka ebinywa by’oMukama omughulu amubwira ati: “Munabwire engoko-lume siyendibika ute wanighana ngendo isatu.”
62 Neryo mwahulukira ehihya amayalira n’obulighe.
63 Neryo abandu ababya bakateya Yesu omo muliki, mubatsuka erimusekererya n’erimuhunza.
64 Babere babiswika obusu bwiwe, mubabya bakamubulya bati: “Minyerera! Nindi yo wamakuhunza?”
65 Kandi mubamubughako eyindi myatsi mingyi mibi y’eritsuma oMungu.
66 Bwabere bwakya, abakulu b’abandu ni bugha ambu abahereri bakulu n’abakangirirya b’Emighambo, mubahindana haghuma. Neryo mubatwala Yesu omo Sanhendrini* yabo n’eribugha bati:
67 “Utubwire nga nina we Kristo.” Nikwa mwabwirabo ati: “Nomo nangababwira simwangikiriryakyo n’ahake.
68 Kandi nomo nangababulya simwangasubirya.
69 Nikwa eritsuka lino, Omughala w’omundu akendyikala oko byala by’oMungu by’amali eby’obutoki.”
70 Babere babyowa ekyo, mubamubulya bati: “Neryo ni bugha ambu uli Mughala w’oMungu?” Mwabasubirya ati: “Inyw’ibene-bene mwamabibughakyo.”
71 Mubabugha bati: “Tukinalaghire oko bandi bimiri? Itw’ibene-bene twamabyowakyo kikalua omo buno bwiwe.”
Amaelezo awehikwa
^ Kutse “ekihamya.”
^ Kutse “Erikiruka.”
^ Ni kindu ky’obughuli ekikalua omo kitaka.
^ Kutse “ekihamya.”
^ Kutse “Erikiruka.”
^ Kutse “Erikiruka.”
^ Kutse “Erikiruka.”
^ Kutse “Erikiruka.”
^ Kutse “Erikiruka.”
^ Kutse “aho eribwe eryo omundu alyaghusa lyangahika.”
^ Kutse “mwamulyatsirira.”
^ Kutse “omw’imulyatsirira.”
^ Kutse “esyongoni, emyutso mikuhi-mikuhi.”
^ Ulebaye amaana w’ebinywa.
