Engulu mbuya eyahandikawa na Luka 23:1-56
23 Neryo abandu bosi mubahangana bamatwala Yesu eyiri Pilato.
2 Neryo mubatsuka erimubughako emyatsi y’amabehi bati: “Mutwowa omulume oyu inianemutebya ekihanda kyetu n’eribugha ati abandu isibabya bakaliha Kaisari yo musolo, kandi ati iye yo Kristo Omwami.”
3 Neryo Pilato mwamubulya ati: “Iwe Mwami w’Abayahudi kwehi?” Naye mwasubirya ati: “Ighuwene-wene wamabibughakyo.”
4 Neryo Pilato mwabwira abahereri bakulu n’abandu ababyaho ati: “Sinditabana oko mulume oyu ko lubanza.”
5 Nikwa mubahatikana bati: “Akatsotsaya abandu akakangirirya omo Yudea yosi, eritsuka e Galilaya nibya n’erihika na hano.”
6 Pilato abere abyowa ekyo, mwabulya omulume oyo nga ni Mugalilaya.
7 Abere abiminya ngoko ni w’omo kiharo ekyo Herode akatabala, mwamutuma eyo ali. Herode abya iniane e Yerusalema oko biro ebyo.
8 Herode mwatsema kutsibu akalangira Yesu; kusangwa abya iniabirikandira erilola oko Yesu busana n’emyatsi mingyi eyo abya iniabiryowa bakamukaniako. Kandi abya anzire inialangira akakola ekitiko-tiko.
9 Neryo mwatsuka erimubulirirya kutsibu; aliwe Yesu mwatamusubirya.
10 Nikwa abahereri bakulu n’abakangirirya b’Emighambo mubabya bakasa n’erimutsongera ibanahitene.
11 Neryo Herode n’abasuda biwe mubamuhemulikania. Mwamwambalya n’olukimba lw’olukengerwa akamusekererya. Neryo mwamusubya eyiri Pilato.
12 Ekiro ekyo kisa-kisa Herode na Pilato mubabya bira; kusangwa embere syaho, habya obuyighu omo kati-kati kabo.
13 Neryo Pilato mwahindania haghuma abahereri bakulu, abatabali, n’abandu.
14 Mwabwirabo ati: “Mumukaniletera omulume oyu muti akatsotsaya abandu oko lutsatsuho. Nabirimutondesya embere syenyu, aliwe sinditamubanako olubanza losi-losi oko myatsi eyo mukamubughako.
15 Nibya na Herode mwatitamubanako olubanza, kusangwa amamusubya eno. Omulume oyu syetakola ekyosi-kyosi ekyangaleka iniatolera oluholo.
16 Eryo ngendimusuyira, neryo inamubohola.”
17 * ——
18 Nikwa abandu bosi mubabirikira omo mulenge muli bati: “Omulume oyo umubugheho, aliwe utuboholere Baraba!”
19 (Baraba abya omo muliki busana n’eriyisamambula eryabya omo muyi na busana n’obwiti.)
20 Pilato mwabugha nabo eyindi ngendo, kusangwa abya anzire eribohola Yesu.
21 Neryo mubatsuka eribirikira kutsibu bati: “Ahanikawe oko muti! Ahanikawe oko muti!”
22 Pilato mwabugha nabo engendo y’akasatu ati: “Busanaki? Omulume oyu akolire ekibi kyahi? Sinditamubanako omwatsi wosi-wosi owangaleka iniahola; eryo ngendimusuyira neryo inamubohola.”
23 Nikwa mubahatikana kutsibu okw’aho n’eribirikira kutsibu bati itawe, n’emilenge yabo muyasinga.
24 Neryo Pilato mwahamula ati ekyo bakasaba kikolawe.
25 Mwabohola omulume oyo babya bakasaba bati aboholawe; omulume oyo wahirawa omo muliki busana n’eriyisamambula n’obwiti. Nikwa mwabaha Yesu bamukole ngoko banzire.
26 Omughulu babya bakamutwala, mubahamba omulume mughuma we Kirene oyukahulawa mo Simoni. Abya akalua omo mulongo. Neryo mubamuhekya omuti* w’amaghali, ahekegho enyuma sya Yesu.
27 Abandu bangyi babya ibanakwamire Yesu. Habya n’abakali bangyi ababya bakalira n’erisusumana busana naye.
28 Yesu mwakebera abakali abo, n’eribugha ati: “Bali be Yerusalema, muleke eririra busana naghe; nikwa mulire busana nenyu n’abana benyu.
29 Kusangwa ebiro binemwasa omughulu abandu bakendisyabugha bati, ‘Obutseme buli oko baghumba, esyonda esitaheka obukule n’amabere awatanyonyesaya!’*
30 Neryo bakendisyatsuka eribwira ebitwa bati, ‘Mututerereko!’ n’eribwira ehitwa bati, ‘Mutubise!’
31 Bamabitakola emyatsi eyi omuti iniakine mubisi, bikendisyabya biti abyuma?”
32 N’abandi balume babiri, abakola-nabi, mubatwalwa eriyitwa haghuma naye.
33 Babere bahika ahakahulawa mo Erikuha ry’Omutwe,* mubamukongomerera aho oko muti. Mubakongomerera n’abakola-nabi abo aho ali; omughuma oko luhande lwiwe lw’amali n’oghundi oko lw’amalembe.
34 Nikwa Yesu abya akabugha ati: “Tata ughanyirebo, kusangwa sibasi ekyo bakakola.” Neryo mubakola obukanga busana n’erighaba esyongyimba siwe.
35 N’abandu mubimanaho bakasamalira. Aliwe abatabali mubamusekererya bati: “Mwalamya abandi; amabya ini Kristo oyo oMungu abiriyisogha, ino ayilamaye iyuwene-wene.”
36 Abasuda nabo mubamusekererya. Mubabya bakasa n’erimuha edivai eyikalihire,
37 ibane mubugha bati: “Wamabya ighuli Mwami w’Abayahudi, uyilamaye.”
38 N’oho ndata oko mutwe wiwe mubahiraho ekibenete ekihandikireko kiti: “Oyu yo Mwami w’Abayahudi.”
39 Neryo omughuma w’oko bakola-nabi ababya bahanikireho, mwatsuka eribugha naye kitya-kitya ati: “Indi alinga uli Kristo! Yilamaye eno, netu utulamaye!”
40 Nikwa oghundi mukola-nabi mwamukunga ati: “Sighulyubaha oMungu, eribya itwe n’omulume oyu twabiribana eritswera lighumerera?
41 Kusangwa itwe tutolere eritswerwa tutya; tukahingana n’ebibi byetu. Nikwa omulume oyu syetakola ekibi kyosi-kyosi.”
42 Neryo mwabugha ati: “Yesu unyibuke omughulu ukendisyasa omo Bwami bwaghu.”
43 Yesu mwamubwira ati: “Oko kwenene ngakubwira munabwire, ukendisyabya haghuma naghe omo Paradiso.”
44 Yabya nga saa sita* y’eritungyi; aliwe ekihugho kyosi ekyo mukyabyamo omwirimya erihika oko saa tisa,
45 kusangwa ekyakakala ky’eryuba mukyabula. Neryo erido ry’ehekalu* mulyatulika mo bihande bibiri.
46 Yesu mwabirikira omo mulenge muli ati: “Tata, namahira ekirimu kyaghe ky’omo byala byaghu.” Abere abibugha ebinywa ebyo, mwatwa omutima.
47 Omukulu w’abasuda abere alangira ebyamabya, mwatsuka eripipa oMungu ati: “Kwenene omulume oyu alue atunganene.”
48 N’abandu bosi ababya bimeneho bakasamalira babere balangira ebyamabya, mubasuba ewabo ibanemuyihumanga oko bikuba busana n’obulighe.
49 N’abosi ababya bamwasi babya ibanimene hali ho hake. N’abakali abamukwama erilua e Galilaya, nabo babya ibaneho. Kandi mubalangira emyatsi eyi.
50 Habya omulume w’omo kyaghanda ky’Abayahudi oyukahulawa mo Yozefu. Abya mulume mubuya kandi oyutunganene.
51 (Omulume oyu iye mwatalighirana nabo omo mbita yabo n’omo mwatsi ogho bakola.) Abya w’omo muyi w’Abanya Yudea owakahulawa mo Arimatea. Kandi abya akalindirira Obwami bw’oMungu.
52 Omulume oyu mwaya eyiri Pilato amamusaba omubiri wa Yesu.
53 Neryo mwakimyagho oko muti amalingira kugho kw’ekitani ekyuwene, n’erihiragho omw’isinda eyabatsawa omo lukuka. Eyisinda eyo, yabya isiyeyatahirwamo mundu.
54 Kyabya kiro ky’Eriteghekania; kandi n’Esabato iyikisigha iyatsuka.
55 Nikwa abakali abakwama Yesu erilua e Galilaya, nabo mubaya eyiri eyisinda. Mubasamalira eyisinda eyo; kandi mubalangira ngoko omubiri wa Yesu ahirawamo,
56 kandi mubasubula bamayakokotya amanukato, n’amaghuta awakakumba ndeke. Nikwa omo kiro ky’Esabato, mubaluhuka erikwamana n’emighambo.
Amaelezo awehikwa
^ Ulebaye endomeko A3.
^ Ulebaye amaana w’ebinywa.
^ Kutse “awatongaya.”
^ Kutse “Ah’erihanga.”
^ Kutse 12:00.
^ Erido eri irakaghaba Ahabuyirire n’Ahabuyirire Kutsibu.
