Engulu mbuya eyahandikawa na Luka 24:1-53
24 Nikwa omo mitsange y’ekiro ky’erimbere ky’eyenga mubaya eyiri eyisinda,* bakaleta amanukato agho babya ibabirikokotya.
2 Aliwe mubeya eribwe eryabya okw’isinda iryabirikumbaghalibwa.
3 Babere bingira omw’isinda, mubatasungamo omubiri w’Omukama Yesu.
4 Ibanemuhangya-hangya busana n’omwatsi oyu, abalume babiri abambite esyongyimba esikangabasenie mubimana aho bali.
5 Abakali abo mububaha kutsibu, kandi mubunama. Neryo abalume abo mubabulyabo bati: “Mukasondaya omundu oyuliho omo kati-kati k’abaholi busanaki?
6 Syali hano, abirilubuka. Mwibuke ebyo ababwira iniakine e Galilaya.
7 Mwabugha ati litolere Omughala w’omundu iniahirwa omo byala by’abakola-nabi n’eritirwa oko muti; neryo oko kiro ky’akasatu inialubuka.”
8 Neryo mubibuka ebinywa ebyo Yesu abugha.
9 Neryo mubalua eyiri eyisinda* bamayakanirya abakwenda 11 n’abandi bosi b’emyatsi yosi eyi.
10 Habya Maria Magdalena, Jane, na Maria mama wa Yakobo. N’abandi bakali ababya nabo mubakanirya abakwenda b’emyatsi mighumerera eyo.
11 Nikwa mubatikirirya ebyo abakali abo babugha; mubalangirabyo nga bitswekerera.
12 Nikwa Petro mwahangana, amatibita eyiri eyisinda.* Mwakengemererya omw’isinda amalangira esyongyimba sy’ekitani nyisa. Neryo mwasubula inianemuyibulya nga byabere biti.
13 Ekiro ekyo kisa-kisa, abigha babiri babya ibanemuya omo kayi akakahulawa mo Emau. Akayi ako kabya oko bilometre nga 11* erilua e Yerusalema.
14 Kandi babya ibanemukania haghuma oko myatsi yosi eyo.
15 Ibanemukania oko myatsi eyo, Yesu mwabahulukira, amaghendania nabo.
16 Nikwa mubatamuminyerera.
17 Mwabugha nabo ati: “Emyatsi eyo munemughenda mukakaniako eyi ni myatsiki?” Neryo mubimana ibanakwire obulighe.
18 Omughuma w’oko bigha, oyukahulawa mo Kleopa mwamubwira ati: “Iwe utasi emyatsi eyiri omo Yerusalama oko biro bino, uli mugheni wayo, kandi wikere ahate bandu kwe?”
19 Mwabulyabo ati: “Emyatsi yahi?” Mubamusubirya bati: “Emyatsi eyilebire Yesu Munazareti. Omo mibiiri n’omo binywa biwe, mwakangania ngoko ni muminyereri w’amaka embere sy’oMungu n’abandu bosi.
20 Aliwe abahereri bakulu n’abatabali betu mubamuhirire omo byala by’abandu abamutswera oluholo; neryo mubamukongomerere oko muti.
21 Twabya n’amaha tuti omulume oyu yukendilamya e Israeli. Emyatsi eyi muyabere; hamabikya ebiro bisatu.
22 Nikwa abakali balebe b’okw’itwe nabo mubakatuswekaya basi; kusangwa mubakaya okw’isinda omo tututu.
23 Mubakeghaya omubiri wiwe isyali omw’isinda. Mubakabya basubula, mubakatubwira bati mubakalangira omwatsi owakaswekaya. Bati mubakalangira abamalaika, bamababwira bati aneho.
24 Neryo abaghuma b’okw’itwe, mubakaya okw’isinda. Mubakeghaya emyatsi iyine ngoko abakali banalyabugha, aliwe mubatitalola oko Yesu.”
25 Yesu mwabwirabo ati: “Muli bakiru, emitima yenyu siyiriligha luba emyatsi yosi eyo abaminyereri babugha!
26 Simwasi ngoko lyabya litolere Kristo iniaghalibwa omo myatsi yosi eyi, n’eryingira omo lukengerwa lwiwe?”
27 Mwabakanirya emyatsi yosi eyiri omo Masako eyimulebirye, eritsuka oko Musa n’omo Makangirirya wosi w’Abaminyereri.
28 Neryo mubahika oko mulongo eyo babya bakaya. Nikwa iye mwabya ng’akinalola embere.
29 Nikwa mubamuhatikana bati syaghende. Mubamubwira bati: “Ubye netu hano, bwamabibya igholo-gholo n’omwirimya ali hakuhi.” Neryo mwingira omo nyumba haghuma nabo.
30 Neryo abere anemulya haghuma nabo, mwimya omukati, amasabiragho, amatsutsangagho, n’eritsuka eribahagho.
31 Neryo ameso wabo mwalibukala, bamamuminya. Nikwa mwabulirana aho bali.
32 Neryo mubatsuka eribwirana bati: “Emitima yetu muyititahuha-huhana omughulu alue akakania netu omo nzira n’eritukumbulira Amasako?”
33 Neryo mubalw’ibahangana oko ndambi eyo n’erisuba e Yerusalema. Mubeya abakwenda 11 n’abandi ababya bahindene nabo
34 ababugha bati: “Kwenene-kwenene Omukama abirilubuka; mwakahulukira Simoni!”
35 Neryo mubakaniryabo emyatsi eyo balyalolako omo nzira kandi ngoko mubakamuminyerera omughulu alyatsutsanga omukati.
36 Ibakinakanaya oko myatsi eyi, Yesu iyuwene-wene mwahangana omo kati-kati kabo. Mwabwirabo ati: “Obuholo bubye nenyu.”
37 Nikwa kundi mububaha n’erisisira, mubalengekania bati bamabilangira ekirimu.
38 Neryo mwabwirabo ati: “Mukahahukaya emitima yo busanaki kandi mukatika-tika busanaki?
39 Mulebaye ebyala byaghe n’ebisando byaghe, mulangire ngoko nina ngye. Munituleko, mulangire, kusangwa ekirimu sikyangayira omunyoku n’amakuha ngoko mwamanyilangira.”
40 Inianemubugha ebinywa ebi, mwakangyabo ebyala biwe n’ebisando biwe.
41 Neryo isibalibikirirya busana n’obutseme bunene n’erisweka, mwabwirabo ati: “Munawite hano h’eky’erirya?”
42 Neryo mubamuha esamaki eyokirye.
43 Yesu mwimyayo, amalirayo embere syabo.
44 Mwabwirabo ati: “Omughulu nabya inikine haghuma nenyu, munababwira ngoko emyatsi yosi eyinyilebirye eyiri omo Mighambo ya Musa n’omo Makangirirya w’Abaminyereri n’omo Syonyimbo itolere iyabererera.”
45 Neryo mwakingula amalengekania wabo wo ndeke eriminya enzumwa y’Amasako.
46 Kandi mwabwirabo ati: “Amasako akabugha ati: litolere Kristo iniaghalwa n’erilubuka erilua oko baholi oko kiro ky’akasatu,
47 omo rina liwe omwatsi w’eribindula omutima erikaleka abandu ibaghanyirwa amalolo, akendisyatulwa oko bihanda byosi, eritsuka e Yerusalema.
48 Nenyu litolere imwatula* emyatsi eyi.
49 Kandi ngendibatumira ekyo Tata waghe alagha. Nikwa inywe musighale omo muyi erihika aho mukesyabanira obutoki obukalua endata.”
50 Neryo mwaghenda haghuma nabo erihika e Betania. Mwasumba ebyala biwe, amabatsumula.
51 Inianemubatsumula, mwalusibwa kubo amatwalwa elubula.
52 Mubamunamira, neryo bamasuba e Yerusalema ibanatsemire kutsibu.
53 N’ebiro byosi ibakasiba omo hekalu ibanemupipa oMungu.
Amaelezo awehikwa
^ Kutse “eyisinda y’eryibuka.”
^ Kutse “eyisinda y’eryibuka.”
^ Kutse “eyisinda y’eryibuka.”
^ Kinywa kwa kinywa, “esyostadia 60.” Ulebaye endomeko B14.
^ Kinywa kwa kinywa, “imwabya bimiri b’emyatsi eyi.”
