Engulu mbuya eyahandikawa na Luka 3:1-38
3 Omo mwaka we 15 w’obutabali bwa Tiberio Kaisari, Pontio Pilato inyanemutabala e Yudea, na Herode* ini mwami we Galilaya, na mughala wabo ye Filipo ini mwami w’ekihugho kye Ituria ne Trakoniti, na Lisania ini mwami we Abilene,
2 n’omo biro by’abahereri bakulu oko bahereri bosi, Ana na Kayafa, ekinywa ky’oMungu mukyahika oko Yohana mughala wa Zekaria omo mbwarara.
3 Neryo Yohana mwatimba omo kiharo kyosi kye Yordani, akakangirirya abandu ngoko litolere ibabatisibwa erikangania ngoko babiribindula emitima; amalolo wabo aghanyirawe.
4 Ngoko kihandikirwe omo kitabu ky’omuminyereri Isaya: “Omundu anemubirikira omo mbwarara ati: ‘Muteghekanaye enzira ya Yehova!* Muwanaye esyonzira siwe.
5 Litolere obuli musya inyusulibwa, n’obuli kitwa n’obuli katwa ibyabonderibwa; n’esyonzira esihengemire isyalungukala; n’esyonzira esitahalire isyalingiriranibwa;
6 n’abandu bosi bakendisyalangira omulamo w’oMungu.’”
7 Na Yohana mwatsuka eribwira abandu abakasyabatisibawa ati: “Inywe bana b’esyonzoka,* nindi yulyabahana ati mutibite mukasagha eritswera ry’oMungu kwehi?
8 Inywe mukole emyatsi eyikakanganaya ngoko mwabiribindula emitima, n’erileka ebibi byenyu. Isimwatsuka eriyibwira muti ‘Tuli bana ba Abrahamu.’ Kundi ngababwira ngoko oMungu anawite obutoki bw’eriha Abrahamu y’abana erilua omo mabwe aya.
9 Oko kwenene, embasa yabirihirwa oko mulihi w’emiti, obuli muti owatehetaya amatunda aghuwene, akendikondwa n’erighuswa omo muliro.”
10 Neryo abandu mubamubulya bati: “Neryo litolere itwakolaki?”
11 Mwabasubirya ati: “Oyuwite esyongyimba ibiri, ahe olughuma oyutawite. N’oyuwite akalyo, naye ahe kuko kw’abandi.”
12 Nibya n’abakalihisaya ebitasi* mubasa eyo ali bakasyabatisibwa. Neryo mubamubulya bati: “Mukangirirya, litolere itwakolaki?”
13 Mwabasubirya ati: “Isimwalihisaya ebitasi* ebilabire oko ebyo mutolere imwalihisya.”
14 N’abasuda nabo mubamubulya bati: “Netu litolere itwakolaki?” Naye mwabasubirya ati: “Isimwanyegha oko mundu wosi-wosi kw’ekindu, kandi isimwatsongera omundu wosi-wosi y’eby’amabehi. Nikwa imwatsemera ebyo mukahabawa.”
15 Abandu babya bakalindirira Kristo. Neryo mubatsuka erilengekania oko Yohana omo mitima yabo bati: “Alinga oyu yo Kristo!”
16 Yohana mwasubiryabo ati: “Ingye ngababatisaya omo maghetse; nikwa oyuwite akaghala kanene okw’ingye, anemwasa enyuma syaghe. Sinitolere erikundula ekamba y’ebiryato biwe. Akendisyababatisya omo kirimu kibuyirire n’omo muliro.
17 Ekipao kiwe ky’erighulukyamo engano kine omo byala biwe busana n’eryerya ekihumbiro kiwe kyo ndeke; n’erihira engano omo depo* yiwe, aliwe omusunga, akendisyahisyagho omo muliro owate angalima.”
18 Kandi mwaha abandu b’amahano mangyi, n’erilola embere eribatulira engulu mbuya.
19 Nikwa Yohana inyakakunga Herode omutabali we Galilaya busana na Herodia omukali wa mughala wabo, na busana n’eyindi myatsi mibi eyo Herode abya inyabirikola.
20 Oko myatsi mibi eyo, Herode mwatomekako oghundi mwatsi mubi ono: Mwahira Yohana y’omo muliki.
21 Neryo abandu bosi babere babibatisibwa, Yesu naye mwabatisibwa. Omughulu abya akasaba, olubula mulwakingukala.
22 N’ekirimu kibuyirire mukyamwandaghalirako; ikiri ng’akalikuku. N’omulenge mwalua elubula ati: “Uli Mughala waghe, omwanzwa, nabirikuligha.”
23 Yesu mwatsuka omubiiri wiwe inyawite emyaka nga 30. Abandu ibamwasi mo mughalawa Yozefu,omughala wa Heli,
24 omughala wa Matati,omughala wa Lawi,omughala wa Melki,omughala wa Yanai,omughala wa Yozefu,
25 omughala wa Matatia,omughala wa Amosi,omughala wa Nahumu,omughala wa Esli,omughala wa Nagai,
26 omughala wa Mati,omughala wa Matatia,omughala wa Semei,omughala wa Yoseki,omughala wa Yoda,
27 omughala wa Yoanani,omughala wa Resa,omughala wa Zerubabeli,omughala wa Salatieli,omughala wa Neri,
28 omughala wa Melki,omughala wa Adi,omughala wa Kosamu,omughala wa Elmadamu,omughala wa Eri,
29 omughala wa Yesu,omughala wa Eliezeri,omughala wa Yorimu,omughala wa Matati,omughala wa Lawi,
30 omughala wa Simeoni,omughala wa Yuda,omughala wa Yozefu,omughala wa Yonamu,omughala wa Eliakimu,
31 omughala wa Mela,omughala wa Mena,omughala wa Matata,omughala wa Natani,omughala wa Daudi,
32 omughala wa Yese,omughala wa Obedi,omughala wa Boazi,omughala wa Salmoni,omughala wa Nasoni,
33 omughala wa Aminadabu,omughala wa Arni,omughala wa Hezroni,omughala wa Perezi,omughala wa Yuda,
34 omughala wa Yakobo,omughala wa Isaka,omughala wa Abrahamu,omughala wa Tera,omughala wa Nahori,
35 omughala wa Serugu,omughala wa Reu,omughala wa Pelegi,omughala wa Eberi,omughala wa Sela,
36 omughala wa Kainana,omughala wa Arpakisadi,omughala wa Semu,omughala wa Noa,omughala wa Lameki,
37 omughala wa Metusela,omughala wa Enoka,omughala wa Yaredi,omughala wa Mahalaleli,omughala wa Kainana,
38 omughala wa Enosi,omughala wa Seti,omughala wa Adamu,omughala w’oMungu.
Amaelezo awehikwa
^ Oyu ni Herode Antipa. Ulebaye amaana w’ebinywa.
^ Ulebaye endomeko A5.
^ Kutse “Abana b’esyomboma, abana b’ebikweta.”
^ Kutse “abasolesya.”
^ Kutse “omusolo.”
^ Kutse “ekighona.”
