Engulu mbuya eyahandikawa na Luka 4:1-44

CHINGULA

Diabolo akalenga oko Yesu (1-13)
Yesu akatsuka eritulira omo Galilaya (14, 15)
Yesu amaghanwa e Nazareti (16-30)
Omo sinagogi e Kapernaumu (31-37)
Erilamibwa lya nyinyi byala wa Simoni n’ery’abandi (38-41)
Ekikumula ky’abandu kyameya Yesu ahate abandu (42-44)

4 Neryo Yesu abere abibatisibwa, mwalua oko lusi lwe Yordani inyoswireko ekirimu kibuyirire. N’ekirimu kibuyirire mukyamutwala omo mbwarara. ² Yesu mwabugha ebiro 40 omo mbwarara; n’eyo, Diabolo mwamulengako. Kandi omo biro ebyo mwatalya ekindu kyosi-kyosi. Neryo ebiro 40 byabere byabihwa, mwakwa enzala. ³ Neryo Diabolo mwamubwira ati: “Wamabya ighuli mughala w’oMungu, ubwire eribwe eri uti rihinduke mukati.” ⁴ Nikwa Yesu mwamusubirya ati: “Amasako akabugha ati, ‘Siritolere omundu akabyaho busana n’akalyo* kasa.’” ⁵ Neryo Diabolo mwamutwala endata oko kitwa kilebe n’erimukangania amami wosi w’ekihugho omo katambi kake ng’eripalya ly’eriso. ⁶ Neryo Diabolo mwabwira Yesu ati: “Ngendikuha ehamuli oko mami wosi aya n’olukengerwa lwagho, kusangwa nabirihabwa ehamuli eyo, naghe ngahayo oko oyo nanzire erihayo. ⁷ Wamabinyunamira n’erinyiramya, ebyosi ebi ibikendibya byaghu.” ⁸ Yesu mwamusubirya ati: “Amasako akabugha ati, ‘Yehova* Mungu waghu yo litolere iwaramya, kandi iye musa yo litolere iwakolera omubiiri owabuyirire.’” ⁹ Kandi Diabolo mwatwala Yesu ye Yerusalema, n’erimuhira ahayisumbire kutsibu oko hekalu. Mwamubwira ati: “Wamabya ighuli mughala w’oMungu, uyighuse ahisi; ¹⁰ kusangwa Amasako akabugha ati, ‘oMungu akendisyakutumira abamalaika biwe erikuteya,’ ¹¹ nabo, ‘Bakendisyakuwatikya* sighuhinde ekisando kyaghu ky’oko ribwe.’” ¹² Yesu mwamusubirya ati: “Kisakire kiti, ‘Isiwalenga oko Yehova* Mungu waghu.’” ¹³ Neryo Diabolo mwabya abibugha erimulengako, mwamuleka akalindirira akandi katambi akatolere ak’eritasyamulengako. ¹⁴ Neryo Yesu mwasuba e Galilaya inyabiryusula n’obutoki bw’ekirimu. N’emyatsi eyuwene eyo babya bakamubughako muyayitwala omo kiharo kyosi ekyo. ¹⁵ Kandi Yesu mwakangirirya omo syosinagogi* syabo. Kandi inyakapipawa n’abosi. ¹⁶ Neryo Yesu mwaya e Nazareti eyo akulira. N’oko kiro kye Sabato, mwingira omo sinagogi* ngoko anabya abeghere erikola. Neryo mwahangana erisoma Amasako. ¹⁷ Mubamuha ekitabu ky’erilinga ky’omuminyereri Isaya. Mwalingola ekitabu ekyo amabana ahahandikire hati: ¹⁸ “Ekirimu kya Yehova* kiri okw’ingye. Kundi abirinyihirako amaghuta nitoke eritula engulu mbuya oko bera. Abirinituma erisyabwira abali omo muliki ngoko bakendisyabya bwiranda, n’esyondimetime ngoko sikendisyalangira, n’eriha abakanuba b’obwiranda, ¹⁹ eritula omwaka wa Yehova* w’olukogho.” ²⁰ Neryo Yesu mwalinga ekitabu ekyo, amasubuliryakyo omuteya w’esinagogi,* amikala. N’abosi ababya omo sinagogi mubamutungerera. ²¹ Neryo mwabwirabo ati: “Munabwire, erisako eryo mwamowa eri, ryamabererera.” ²² N’abosi mubatsuka erimukaniako ndeke n’erisweka busana n’ebinywa bibuya ebyo abugha. Kandi babya bakabugha bati: “Oyu si ni mughala wa Yozefu, ko bite bitya?” ²³ Neryo mwabwirabo ati: “Ninasi ngoko mukendinikolesyako akasimo kano, ‘Munganga, uyilamaye. Emyatsi eyo twowa ambu muwakola e Kapernaumu, ukoleyo n’oho wenyu hano.’” ²⁴ Neryo Yesu mwabugha ati: “Oko kwenene ngababwira, sihali omuminyereri oyukasikibawa ewabo. ²⁵ Ngababwira ekwenene: Omo Israeli mwabya abakwakali bangyi omo biro bya Eliya. Oko mughulu oyo, muhalaba emyaka isatu n’emisi ndatu (6) isihalihatawa embula. N’enzala nene muyabya omo kihugho kyosi. ²⁶ Nomo bine, Eliya mwatatumwa n’oko mughuma w’oko bakali abo. Nikwa mwatumwa oko mukwakali mughuma musa owe Zarepata omo kihugho kye Sidoni. ²⁷ N’oko mughulu w’omuminyereri Elisha, habya abahagha bangyi omo Israeli. Aliwe sihali n’omughuma wa kubo oyo walamibawa. Ye Naamani musa Omusiria yo walamibawa.” ²⁸ Neryo abosi ababya omo sinagogi* mubahitana omughulu bowa ebinywa ebi. ²⁹ Mubahangana n’erilw’ibatwala Yesu ehihya w’omuyi omo twanguhe. Neryo mubamutwala oko singyi y’ekitwa ekyo omuyi wabo abya ahimbireko. Mubasonda erimughusa atsuke omutwe w’ahisi. ³⁰ Nikwa mwalaba omo kati-kati kabo n’eriyighendera. ³¹ Neryo mwaya e Galilaya omo muyi we Kapernaumu. Mwakangiriryabo omo kiro kye Sabato. ³² Kandi abandu mubasweka busana n’erikangirirya liwe, kusangwa inyakabugha n’ehamuli. ³³ Omo sinagogi* mwabya omulume oyo wabyako embinga, ekirimu kibi. Neryo mwalaka omo mulenge muli ati: ³⁴ “Iyooo! Tuwite olubanza lwahi naghu Yesu Munazareti? Ulyasa erisyatutoghotya kwehi? Ninasi nga uli ndi; uli Mubuyirire w’oMungu.” ³⁵ Nikwa Yesu mwahayira ekirimu kibi ekyo ati: “Huna, mulueko!” Neryo ekirimu ekyo kyabere kyaghusa omulume oyo y’ahisi omo katikati kabo, mukyamuluako butsira erimuhutalya. ³⁶ Abandu mubabya babilangira ekyo, mubasweka n’eribugha bati: “Ebi ni binywa ebiri biti kwe? Kusangwa omo butoki n’amaka akabugha n’eribirimu bibi nabyo ibyamowa!” ³⁷ Neryo engulu yiwe, muyayitwala ehosi omo kihugho ekyo. ³⁸ Yesu abere abilua omo sinagogi,* mwingira omo nyumba ya Simoni. Nikwa mabyala wa Simoni abya alwere erihuhana rinene ly’omubiri. Neryo mubasaba Yesu bati amuwatikaye. ³⁹ Neryo Yesu mwaghenda ahali omukoni, amimana aho ali n’erihayira erihuhana eryo. N’erihuhana ly’omubiri eryo, mulyalama. Neryo mwalw’iniahangana n’eritsuka eribakolera. ⁴⁰ Nikwa eryuba muryabya lyabilenga, abosi ababya n’abandu abalwere amakoni w’emihanda yosi, mubamuleterabo. Mwahira ebyala biwe by’oko buli mukoni n’erilamyabo. ⁴¹ N’esyombinga musyalua oko bandu bangyi isinemulaka n’eribugha siti: “Uli Mughala w’oMungu.” Nikwa mwahayirasyo kandi mwatabya akalighirasyo eribugha; kundi syabya isinasi ngoko iye ni Kristo. ⁴² Omo mitsange, Yesu mwahuluka, amaghenda ahate abandu. Nikwa abandu mubamusonda-sonda, bamamubana. Kandi mubasonda erimukakirya bati isyalua aho bali. ⁴³ Nikwa mwabwirabo ati: “Litolere inatula engulu mbuya y’Obwami bw’oMungu n’oko yindi miyi. Kusangwa natumawa busana n’ekyo.” ⁴⁴ Neryo mwayatula engulu mbuya omo syosinagogi* sye Yudea.