Engulu mbuya eyahandikawa na Luka 5:1-39
5 Kiro kighuma, Yesu inyane oko musike w’engetse ye Genezareti, abandu bangyi mubamuhatatania bakahulikirira ekinywa ky’oMungu.
2 Yesu mwalangira amato abiri inyane oko musike w’engetse. Abasohi sibabya mugho. Babya ibanemwerya amatimba wabo.
3 Yesu abere abisambira omo bwato bughuma, obwa Simoni, mwabwira Simoni ati akunebo omo ngetse; hali hake oko musike. Neryo Yesu mwikala omo bwato obo amatsuka erikangirirya abandu inyane mubo.
4 Mwabya abibugha erikania, mwabwira Simoni ati: “Utwale obwato ahali omutobero, mughuse amatimba wenyu w’omo ngetse, musohe.”
5 Simoni mwamusubirya ati: “Mukangirirya, mutukakola kutsibu omo kiro kyosi; mututitahamba kindu. Aliwe ngendighusa amatimba w’omo ngetse kundi wamabugha.”
6 Nikwa babere baghusa amatimba w’omo ngetse, mubahamba esyosamaki nyingi. N’amatimba wabo mwatsuka eritsutsangika.
7 Neryo mubabirikira abasohi balikyabo ababya omo bundi bwato bati base babawatikaye. Nabo mubasa. Mubusulya amato abiri wosi. N’amato ayo mwasonda eritobera.
8 Simoni Petro mwabya abilangira eki, mwakukama embere sya Yesu inyanemubugha ati: “Ulue aho niri, Mukama; kusangwa niri mundu w’amalolo.”
9 Kusangwa iye n’ababya haghuma naye, babya ibabirisweka n’erikukubala busana n’esyosamaki esyo bahamba.
10 Yakobo na Yohana abaghala ba Zebedayo, ababya bakasoha esyosamaki haghuma na Simoni, nabo mubasweka. Nikwa Yesu mwabwira Simoni ati: “Sighubahe, kusangwa eritsuka lino, mukendibya basohi b’abandu.”
11 Neryo mubaleta amato ayo w’oko musike, bamasigha ebyosi bamakwama Yesu.
12 Yesu inyane omo muyi mughuma, omulume oyuswireko ebihagha mwamulangira. Mwawa oko kitaka n’erimulemba-lemba ati: “Mukama, wamabya ighunanzire, unyilamaye.”
13 Neryo Yesu mwakakya ebyala, amamutulako n’eribugha ati: “Nyinanzire! Ulamibawe.” Neryo aho n’aho ebihagha biwe mubyamuluako.
14 Yesu mwabya abimubwira ati isyakaniraya omundu wosi-wosi, mwabugha ati: “Aliwe ughende uyayikangaye oko muhereri, n’eriherera obuhere busana n’erilamibwa lyaghu ngoko Musa anabugha, busana n’eriminyisyabo ngoko wabirilama.”
15 Nikwa engulu yiwe muyaghenda kutsibu. N’abandu bangyi kutsibu ibakahindana haghuma aho ali, bakasyamuhulikirira n’erilamibwa amakoni wabo.
16 Nikwa Yesu inyabeghere erighenda ahate abandu akayasaba.
17 Kiro kighuma, Yesu abya inyanemukangirirya. Abafarisayo n’abakangirirya b’Emighambo, babya ibabirilua omo milongo yosi ye Galilaya ne Yudea ne Yerusalema, ibanikereho. N’obutoki bwa Yehova* bwabya okw’iye busana n’erilamya abandu.
18 Abalume mubasa ibanahekire oko kakingo omulume oyubasireko ebitsuko. Mubasonda erimwingirya omo nyumba n’erimuhira embere sya Yesu.
19 Mubataluka erimwingirya omo nyumba kundi mwabya bandu bangyi. Neryo mubasambira oko lutwe lw’enyumba bamalusyako ebigai. Mubamwandaghalya aho balyalusaya ebigai inyane oko kakingo, bamamwandaghalirya omo kati-kati k’abandu ababya embere sya Yesu.
20 Abere abilangira obwikirirya bwabo, mwabugha ati: “Mulume, ebibi byaghu, byamaghanyirwa.”
21 Neryo abakangirirya b’Emighambo n’Abafarisayo mubatsuka eribwirana bati: “Kwe oyukatsuma oMungu oyu nindi? Nindi yo wangaghanyira amalolo ate iyo n’oMungu musa?”
22 Nikwa Yesu mwaminya ebyo bakalengekanaya. Neryo mwabulyabo ati: “Mukalengekanayaki omo mitima yenyu kwehi?
23 Eribugha niti, ‘Ebibi byaghu byamaghanyirwa,’ kutse eribugha niti, ‘Hangana ughende,’ ekyolobire oko kindi kye kyahi?
24 Nikwa nyanzire imwaminya ngoko Omughala w’omundu awite oko kihugho kw’ehamuli y’erighanyira amalolo.” Neryo mwabwira omulume oyubasireko ebitsuko oyo ati: “Ngakubwira niti, hangana uheke akakingo kaghu, ughende eka.”
25 Neryo mwahangana abosi ibanamusamalire, amaheka akakingo ako abya aghotsereko, amasuba eka inyanemupipa oMungu.
26 Abandu bosi mubasweka kutsibu n’eritsuka eripipa oMungu. Kandi mubabya bakabugha ibanakukubere bati: “Munabwire, twamalangira emyatsi y’eriswekera.”
27 Enyuma sy’omwatsi oyu, mwahuluka. Mwalangira oyukalihisaya ebitasi oyukahulawa mo Lawi inyanikere aho bakalihira ebitasi. Neryo mwamubwira ati: “Unikwame.”
28 Lawi mwasigha ebindu byosi. Neryo mwahangana n’eritsuka erimukwama.
29 Neryo Lawi mwateghekanirya Yesu y’akalyo kanene eka wiwe. Habya n’abangyi abakalihisaya ebitasi* n’abandi bandu bangyi ababya bakalya haghuma nabo.
30 Abafarisayo n’abandi ba kubo ababya bakangirirya b’Emighambo babere balangira ekyo, mubayilungumula ahali abigha biwe bati: “Busanaki mukalya n’erinywa haghuma n’abakalihisaya ebitasi* n’abakola-nabi kwe?”
31 Yesu mwasubiryabo ati: “Abatalwere sibalilagha oko munganga, nikwa abalwere bo bakamulaghako.
32 Mundasa erisyabirikira abatunganene, nikwa nasa erisyabirikira abakola-nabi, batoke eribindula emitima.”
33 Mubamubwira bati: “Abigha ba Yohana bakakola amafungo wo ngendo nyingyi, n’erisaba oMungu yo kutsibu; n’abigha b’Abafarisayo kutya. Aliwe abigha baghu ibo bakalya n’erinywa.”
34 Yesu mwasubiryabo ati: “Mwanganabugha muti abira b’iba w’omulunga* bakole amafungo ibane n’iba w’omulunga kwehi?
35 Aliwe oko kwenene, omughulu akendisyahika, iba w’omulunga* inyabya isyakiri haghuma nabo; neryo omo biro ebyo, bakendisyakola amafungo.”
36 Kandi mwabwirabo omufano* ati: “Sihali omundu oyukatwa ekibandiko oko lukimba* luhya-luhya n’erisonerakyo oko lukimba lwa kera. Amabikola atya, ekibandiko ky’oko lukimba luhya-luhya, ikikendilandukala oko lukimba lwa kera. Kandi sikyangahambana n’olukimba lwa kera.
37 Kandi sihali oyukabika edivai nyihya-nyihya omo bindu by’engobi ebya kera. Amabikola atya, edivai nyihya-nyihya iyikenditula ebindu by’engobi nayo iyutikira ahisi; n’ebindu by’engobi ebyo ibikenditsanda.
38 Nikwa edivai nyihya-nyihya litolere iyabikwa omo bindu by’engobi bihya-bihya.
39 Sihali omundu oyukanza edivai nyihya-nyihya abinywa oko divai ya kera. Kusangwa akabugha ati, ‘Eya kera yo yuwene.’”
Amaelezo awehikwa
^ Ulebaye endomeko A5.
^ Kutse “abasolesya.”
^ Kutse “abasolesya.”
^ Kutse “iba w’omuheruki.”
^ Kutse “iba w’omuheruki.”
^ Kinywa kwa kinywa, “omusyo.”
^ Kutse “olukimba lw’eryambalira oko lundi.”
