Engulu mbuya eyahandikawa na Luka 7:1-50
7 Yesu mwabya abibugha eribwira abandu b’emyatsi yosi eyi, mwahika e Kapernaumu.
2 Neryo habya omukulu w’abasuda oyo wabya n’omughombe wiwe oyo anzire kutsibu. Omughombe oyo abya iniatohire, kandi iniali okw’ihola.
3 Mwabya abyowa oko ngulu ya Yesu, mwamutumako abakulu b’Abayahudi balebe eriyamubwira bati ase alamaye omughombe wiwe.
4 Mubasa eyiri Yesu bamatsuka erimulemba-lemba kutsibu n’eribugha bati: “Omundu oyu atolere iwamukolera omwatsi oyu.
5 Anzire ekihanda kyetu, kandi yo watuhimbira esinagogi* yetu.”
6 Neryo Yesu mwaghenda haghuma nabo. Nikwa mwabya abihika hakuhi n’enyumba, omukulu w’abasuda abya iniabirimutumako abira biwe ati: “Mukulu isiwayikenderaya eryasa ewaghe. Kusangwa nyiri mundu oyutatolere, siwangingira omo nyumba yaghe.
7 Ekyo kyo kiryaleka inayowa ngoko sinitolere eryasa eyo uli. Aliwe ubughe ekinywa, n’omughombe waghe akendilama.
8 Kundi naghe ninawite abawite ehamuli okw’ingye, kandi ninawite oko basuda abo niwiteko ehamuli. Namabibwira omughuma niti, ‘Ghenda,’ akaghenda. Namabibwira n’oghundi niti, ‘Asa hano!’ akasa. Kandi ngabya namabibwira omughombe waghe niti, ‘Kola kino!’ akakolakyo.”
9 Yesu mwabya abyowa ebinywa ebi mwaswekera omukulu oyu. Mwabindukira ekikumula ky’abandu ababya bamukwamire n’eribwirabo ati: “Ngababwira ekwenene, nibya n’omo Israeli sindinatabanamo obwikirirya bungana n’obu.”
10 Abo omukulu atuma babere basuba eka mubeya omughombe oyo iniabirilama.
11 Akatambi kake enyuma syaho, Yesu mwaya omo muyi we Naini. Abigha biwe n’ekikumula kinene ky’abandu babya ibanamukwamire.
12 Mwabya abihika hakuhi n’olukyo lw’omuyi, mweya abandu ibanahekire omundu oyuholire, bakamulusya omo muyi. Abya mwana mughuma musa wa mama wiwe. Kandi mama wiwe abya mukwakali; n’ekikumula kinene ky’abandu kyabya ikinakwamire omukali oyo.
13 Omukama mwabya abilangira omukali oyo, mwamukwira obulighe. Neryo mwamubwira ati: “Leka erilira.”
14 Neryo Yesu mwaseghera hakuhi, amatula oko kakingo k’erihekako abaholi; n’ababya bahekiriko mubimana. Neryo mwabugha ati: “Mulwana ngabugha naghu, hangana!”
15 Oyo wabya aholire oyo mwikala n’eritsuka eribugha. Neryo Yesu mwamuha mama wiwe.
16 Neryo abosi mubakwa obuba. Kandi mubatsuka eripipa oMungu n’eribugha bati: “Omuminyereri mukulu abirihuluka omo kati-kati ketu’’ kandi “oMungu abiryibuka abandu biwe.”
17 Neryo engulu yiwe muyaghenda omo Yudea yosi n’omo biharo byosi by’endambi-ndambi.
18 Neryo abigha ba Yohana mubamukanirya emyatsi yosi eyi.
19 Neryo Yohana mwabirikira abigha biwe babiri. Mwabatuma oko Mukama bayamubulaye bati: “Ninawe oyukasa kutse tulindirire oghundi?”
20 Abalume abo mubabya babihika ahali Omukama, mubabugha bati: “Yohana Mubatisya amatutuma okw’iwe, ati tukubulaye tuti, ‘Nina we oyukasa? Kutse tulindirire oghundi kwehi?’”
21 Oko ndambi eyo mwalamya oko bandu bangyi kw’amakoni n’esyondwala esikala-kalire. Mwahigha n’ebirimu bibi n’eriwatikya esyondimetime nyingyi erilangira.
22 Yesu mwasubiryabo ati: “Mughende mubwire Yohana y’ebyo mwamowa n’ebyo mwamalangira: Esyondimetime sirimulangira n’ebirema binemughenda; abahagha banemulamibwa, n’abatsiha balimwowa; abaholi banemulubukibwa, n’engulu mbuya inemutulaghanibwa oko bera.
23 Obutseme buli oko mundu oyutenitika-tikira.”
24 Abandu abo Yohana atuma babere baghenda, Yesu mwatsuka erikania n’abandu oko Yohana ati: “Mwaya omo mbwarara eriyalebyayoki? Mwayalebaya oluseke olukatsinga-tsingibawa n’erihunga kwehi?
25 Neryo mwayalebaya yo ki? Mwayalebaya omundu oyumbite esyongyimba esighambire? Abakambala esyongyimba esighambire kandi abali omo tseme si bakabya omo manyumba w’abami!
26 Neryo kwesi inywe, mwayalebaya omo mbwarara mo ki? Mwayalebaya omuminyereri kwehi? Inga, oko kwenene ngababwira, ni mukulu nibya kwilaba n’abaminyereri.
27 Yohana yo mundu oyo Amasako akahula ati: ‘Lebaya! Ngatuma omukwenda waghe embere syaghu.* Akendikuteghekanirya enzira.’
28 Ngababwira, oko bandu bosi ababutawa n’abakali, sihali oyulengire Yohana. Nikwa omuke kutsibu omo Bwami bw’oMungu amulengire.”
29 (Abandu bosi, haghuma n’abakalihisaya ebitasi* babere babyowa eki, mubatulagho ngoko oMungu atunganene; kusangwa babya ibabiribatisibwa olubatiso lwa Yohana.
30 Aliwe Abafarisayo, n’abasi Emighambo yo kutsibu mubapokya erihano eryo oMungu abaha; kundi mubataligha Yohana ababatisaye.)
31 “Neryo nangasosekania abandu b’ekizazi* eki naki? Kandi basosireki kwehi?
32 Bali ng’abana abakatsangira omo soko kandi ibanemubirikiranako bati: ‘Mutukababuhira enyamulere, nikwa mumutitasata; mutukabimbira olwimbo lw’ekiriro, nikwa mumutitalira.’
33 Kutya Yohana Mubatisya abiryasa isyalirya omukati kutse erinywa edivai, nikwa mukabugha muti: ‘Aliko embinga.’
34 Omughala w’omundu abiryasa iniakalya n’erinywa, nikwa mukabugha muti: ‘Omundu oyu ni w’omururu kandi ni mutamiri, ni mwira w’abakalihisaya ebitasi* n’abakola-nabi!’
35 Nikwa amenge akalangirika kw’atunganene erilabira emibiiri yagho.”
36 Neryo Omufarisayo mughuma mwalemba-lemba Yesu ati ayalire ewiwe. Neryo mwingira omo nyumba y’Omufarisayo oyo amayiteghekania okw’irya.*
37 Neryo omukali oyo wabya asibwe omo muyi oyo ngoko ni mukola-nabi, mwowa ngoko Yesu anemulya akalyo omo nyumba y’Omufarisayo. Neryo mwaleta etsupa ye alabasta eyabyamo amaghuta awakakumba ndeke.
38 Mwakukama enyuma sya Yesu hakuhi n’ebisando biwe. Mwalira n’eritsapya ebisando bya Yesu omo misonia yiwe n’erisangulabyo omo nzwiri siwe. Kandi mwahabyo ebeze.* Neryo mwuta kubyo kw’amaghuta awakakumba ndeke ayo.
39 Omufarisayo oyo wamukokaya abere abilangira ekyo, mwayibwira ati: “Oko kwenene, omulume oyu ko alue muminyereri alyendiminya omukali oyukamutulako oyu nga nindi, kandi nga ni wa muhanda wahi. Alyendiminya ngoko ni mukola-nabi.”
40 Nikwa Yesu mwamusubirya ati: “Simoni ninawite omwatsi w’erikubwira.” Naye mwabugha ati: “Mukangirirya, tulagho!”
41 “Abandu babiri babya n’edeni* y’omulume mughuma. Omughuma abyamo edeni* y’esyodinari* 500; n’oghundi esyodinari 50.
42 Kundi babya isibawite eky’erimuliha, oyo wababweka mwababuyira ibo bosi amadeni* wabo. Ukalengekanaya uti owahi oko babiri aba yukendimwanza kutsibu?”
43 Simoni mwamusubirya ati: “Ngalengekanaya, oyo abuyira edeni* nene.” Yesu mwamubwira ati: “Wamasubirya ndeke.”
44 Neryo Yesu mwakebera omukali oyo n’eribwira Simoni ati: “Wanamalangira omukali oyu? Mungingira omo nyumba yaghu, mutitamba amaghetse w’erinaba oko bisando; aliwe omukali oyu mwakatsapaya ebisando byaghe omo misonia yiwe n’eryumyabyo omo syonzwiri siwe.
45 Mughutitamba ebeze, nikwa omukali oyu, aho niryahikira muno, anemuha ebisando byaghe by’esyobeze.
46 Mughutituta oko mutwe waghe kw’amaghuta; nikwa omukali oyu, amuta oko bisando byaghe kw’amaghuta awakakumba ndeke.
47 Busana n’eki ngakubwira, amalolo wiwe nomo ane mangyi, amaghanyirwa; kusangwa mwakanza kutsibu. Nikwa oyukaghanyirawa bike, akanza kuke.”
48 Neryo mwabwira omukali oyo ati: “Amalolo waghu amaghanyirwa.”
49 Abosi ababya oko mesa haghuma naye, mubatsuka eribwirana bati: “Kwe omulume oyu nindi oyukaghanyira n’amalolo?”
50 Nikwa Yesu mwabwira omukali oyo ati: “Obwikirirya bwaghu bwamakulamya. Ughende buholo.”
Amaelezo awehikwa
^ Ulebaye amaana w’ebinywa.
^ Kinywa kwa kinywa, “embere sy’obusu bwaghu.”
^ Kutse “abasolesya.”
^ Kutse “olulengo.”
^ Kutse “abasolesya.”
^ Kutse “mwikala oko mesa.”
^ Kutse “mwalyatsirirabyo.”
^ Kutse “omwinda.”
^ Kutse “omwinda.”
^ Ulebaye endomeko B14.
^ Kutse “eminda.”
^ Kutse “omwinda.”
