Engulu mbuya eyahandikawa na Luka 8:1-56
-
Abakali ababya bakakwama Yesu (1-3)
-
Omusyo w’omubibi (4-8)
-
Ekyaleka Yesu inyakolesya emisyo (9, 10)
-
Enzumwa y’omusyo w’omubibi (11-15)
-
Etala siyirihirawa omo kitiri (16-18)
-
Abaghala babo Yesu na mama wiwe (19-21)
-
Yesu amatulerya ekihunga (22-25)
-
JYesu amahighira esyombinga sy’omo syongulube (26-39)
-
Mwali wa Yairo; omukali amatula oko syongyimba sya Yesu (40-56)
8 Enyuma syaho Yesu mwaghenda omo miyi mbiriri-mbiriri n’omo milongo mbiriri-mbiriri. Abya akatulira n’eritulaghania engulu mbuya y’Obwami bw’oMungu. N’abakwenda 12 babya haghuma naye.
2 Habya n’abakali balebe abalusibawako ebirimu bibi n’erilamibwako amakoni. Habya: Maria, oyukahulawa mo Magdalena, oyo walusibawako esyombinga irinda (7).
3 Jane omukali wa Kuza, omwimaniri w’enyumba ya Herode; Suzana, n’abandi bakali bangyi ababya bakakolesya ebindu byabo erikolera Yesu n’abakwenda biwe.
4 Abandu bangyi kutsibu mubahindana haghuma n’abandu abalua omo miyi mbiriri-mbiriri n’eryasa eyiri Yesu. Neryo Yesu mwatsuka eribugha nabo omo musyo ati:
5 “Omulimi mwayabiba esyombuto siwe. Omughulu abya akabiba, esindi musyatoghera oko musike w’enzira. Musyalyatangirwa, n’esyonyunyu sy’omo kyanya musyalyasyo.
6 Esindi musyatoghera oko kitaka ky’amabwe. Syabere syabilasa, musyuma kundi musyabula amaghetse.
7 Esindi musyatoghera omo mahwa. Neryo amahwa awakula haghuma nasyo mwaleka isyakusa.
8 Nikwa esindi mbuto musyatoghera oko kitaka ekyuwene. Neryo syabere syabilasa, musyahetya esindi mbuto ngendo 100.” Mwabya abibugha erikania emyatsi eyi, mwabugha omo mulenge muli ati: “Oyuwite amatwi w’eryowa, owe. ”
9 Neryo abigha biwe mubamubulya omusyo oyu ng’akasonda eribugha atiki.
10 Mwabugha ati: “Inywe mwabirihabwa obutoki bw’eriminya esyokumbo* esibuyirire sy’Obwami bw’oMungu; nikwa abandi bakahabawasyo omo misyo. Kusangwa nomo bangasamalira, sibangalangira; kandi nomo bangahulikirira, sibangowa nga bikasonda eribugha bitiki.
11 Neryo enzumwa y’omusyo oyo, y’eno: Embuto kye kinywa ky’oMungu.
12 Esyombuto esyatoghera oko musike w’enzira, ba bandu abakowa ekinywa, neryo Diabolo iniasa n’erikula ekinywa ekyabibawa omo mitima yabo, sibase bakikirirya neryo ibasabulwa.
13 Esyombuto esyatoghera oko kitaka ky’amabwe, ba bandu abakowa ekinywa n’erilighakyo n’obutseme. Nikwa kundi sibawite emirihi, bakikiriraya omo katambi kake; neryo omughulu erilengwako likabahikira bakalw’ibatera.
14 N’esyombuto esyatoghera omo mahwa, ba bandu abakowa ekinywa ky’oMungu; nikwa kundi bakahekawa n’erihangya-hangya, obuteke, n’etseme y’omo ngebe eno, bakahatatanibawa; neryo sibalikula.
15 N’esyombuto esyatoghera oko mutaka oghuwene, ba bandu abakowa ekinywa ky’oMungu n’omutima oghuwene kandi ow’ekwenene. Bakabikakyo omo mitima yabo n’erihetya amatunda omw’iyiyinia.
16 “Sihali omundu oyukakaya etala neryo iniakuningirayo omo kindu, kutse iniahirayo emwisi w’engyingo. Akahirayo ahayisumbire; abakingira omo nyumba batoke erilangira ekyakakala.
17 Kusangwa sihali ekindu ekibisamire ekitendisyalangirika, kutse ekindu ekyabiribiswa mo kumbo* ekitendisyahika eriminywa kutse erilangirika ndeke.
18 Neryo mulebaye ndeke nga mukahulikirira muti. Kusangwa obuli mundu oyuwite, akendisyahabwa ebindi. Nikwa oyutawite, nibya n’ebyo akalengekanaya ati awite, akendisyasaghulwabyo.”
19 Neryo abaghala babo na mama wiwe mubasa aho ali; nikwa babya isibangatoka erihika hakuhi naye busana n’abandu bangyi.
20 Neryo omundu mwabwira Yesu ati: “Mama waghu n’abaghala benyu banimene ehihya, banakulaghireko.”
21 Neryo mwabasubirya ati: “Mama waghe n’abaghala betu, b’aba; abakahulikirira ekinywa ky’oMungu n’erikolakyo.”
22 Kiro kighuma Yesu n’abigha biwe mubingira omo bwato. Neryo mwababwira ati: “Tusokere oko ghundi musirya w’engetse.” Neryo mubahongoka.
23 Ibanemughenda, Yesu mwayato. Neryo ekihunga ekikalire mukyabuhirira oko ngetse. N’obwato bwabo mubwasonda eryusulamo amaghetse. Babya omo hatari.*
24 Neryo mubayamubukya ibanemubugha bati: “Mukangirirya, Mukangirirya, tukahwa!” Neryo Yesu mwahangana, amahayira ekihunga n’amaghetse awabirighunga. Nabyo mubyatekana. Muhabya eritulera linene.
25 Neryo mwabulyabo ati: “Obwikirirya bwenyu buli hayi?” Nikwa babya ibabiryubaha kutsibu n’erisweka. Mubabwirana bati: “Oyu nindi kwe? Kusangwa nibya akahayira ekihunga n’engetse, nabyo ibyamwowa!”
26 Neryo mubahika oko kitaka ekyumire omo kihugho ky’Abagerase, ekiri eyisirya we Galilaya.
27 Omughulu Yesu akimira oko kitaka akalua omo bwato, mwahindana n’omulume oyukalua omo muyi oyuliko esyombinga. Abya iniabiribugha biro bingyi isyalyambala esyongyimba. Kandi abya isyalikala omo nyumba, aliwe iniakikala eyiri esisinda.
28 Abere alangira Yesu, mwalaka n’eryunama embere siwe. Kandi mwabugha omo mulenge muli ati: “Ukanisondakoki kwe, Yesu Mughala w’oMungu w’Endata Kutsibu? Ngakulemba-lemba sighunyaghalaye.”
29 (Kusangwa Yesu abya akabwira ekirimu kibi ekyo ati kilue omo mundu oyo. Kyabya ikyabirimuhamba ngendo nyingyi. Abya iniabiribohwa kangyi-kangyi oko byala n’oko bisando omo minyororo* n’omo miseghe n’eriteghibwa; aliwe iniakatsutsanga ebyo babya bakamubohamo. Kandi embinga eyo iyikamutwala eyite abandu.)
30 Yesu mwamubulya ati: “Erina ryaghu iwe ndi?” Naye mwasubirya ati: “Ingye Lejio.”* Kusangwa abyako esyombinga nyingyi.
31 Esyombinga esyo musyahatikana n’erilemba-lemba Yesu siti isyabugha ati siye omo abiso.
32 Ekihangulo kinene ky’esyongulube kyabya ikinemulira oko kitwa. Neryo esyombinga esyo musyamulemba-lemba siti alighiresyo singire omo syongulube. Naye mwalighirasyo.
33 Neryo esyombinga musyalua oko mulume oyo n’eriyingira omo syongulube. Neryo ekihangulo mukyatibita oko mukingyi owasenzere kyamaya omo ngetse n’erisenda.
34 Nikwa omughulu abalisya basyo balangira ebyamabya, mubatibita n’eriyatula omwatsi oyo omo muyi n’omo kihugho ekyo.
35 Neryo abandu mubayalebya ebyabere. Mubahika ahali Yesu, bamasunga omulume oyulyaluako esyombinga. Abya inianikere ahali ebisando bya Yesu; inianambite, kandi iniabiribya n’obulengekania obuwene. Neryo mububaha.
36 Abandu abalangira ebyabya, mubakaniryabo omulume oyo wabyako esyombinga oyo ng’alyalamibawa ati.
37 Neryo abandu bangyi b’omo kihugho ky’Abagerase mubabwira Yesu bati alue ewabo; kusangwa babya ibabiryubaha kutsibu. Neryo mwingira omo bwato, amayiteghekania eriluayo.
38 Omulume oyo waluako esyombinga, mwahatikana n’erilemba-lemba Yesu ati akaghenda haghuma naye. Nikwa Yesu mwamusubulya n’erimubwira ati:
39 “Usube eka, uyakanaye ebyo oMungu abirikukolera.” Neryo mwaghenda. Mwatula ekyo Yesu alyamukolera omo muyi wosi.
40 Omughulu Yesu asubula, abandu mubamukokya ndeke; kundi abosi babya ibanamulindirire.
41 Neryo omulume oyukahulawa mo Yairo mwasa. Omulume oyu abya mukulu w’esinagogi.* Mwawa oko bisando bya Yesu n’erimulemba-lemba ati ase eka wiwe,
42 kusangwa omwali wiwe mughuma musa* abya okw’ihola. Abya w’emyaka nga 12.
Omughulu Yesu abya akaghenda, abandu mubamuhatatania.
43 Nikwa habya omukali oyo wabya iniamabibugha emyaka 12 inianakwire obukoni bw’eriluako omusasi. Kandi sihabya omundu oyo watoka erimulamya.
44 Mwasira enyuma sya Yesu n’eritula oko musike w’olukimba lwiwe. Neryo aho n’aho omusasi mwaleka erimuluako.
45 Neryo Yesu mwabugha ati: “Oyo wamanitulako nindi?” Omughulu obuli mundu abya akayighana ati siye, Petro mwabugha ati: “Mukangirirya, abandu bangyi banakutimbireko n’erikuhatatania.”
46 Nikwa Yesu mwabugha ati: “Omundu mwakanitulako; kusangwa nyinasi ngoko obutoki mubukaniluako.”
47 Omukali oyo abere alangira ngoko syangayibisa, mwasa inianemutitimana n’eryubaha, amawa embere sya Yesu. Mwatulagho embere sy’abandu bosi ekiryaleka iniatula oko Yesu kandi ngoko mwakalw’inialama.
48 Nikwa Yesu mwamubwira ati: “Mwali waghe, obwikirirya bwaghu bwamabikulamya. Ughende buholo.”
49 Yesu iniakinabugha, omundu erilua ew’omukulu w’esinagogi* mwahika. Mwabugha ati: “Mwali waghu amabihola; isiwasyakenderaya Omukangirirya.”
50 Yesu mwabya abyowa ekyo, mwamusubirya ati: “Isighubaha! Ekighuma kisa, ubye n’obwikirirya. Akendilama.”
51 Yesu abere abihika oko nyumba eyo, mwataligha omundu wosi-wosi ingiremo haghuma naye. Mwaghenda na Petro, Yohana, Yakobo, na mama na baba w’omusika oyo basa.
52 Nikwa abandu bosi babya bakalira n’erisusumana busana n’omwana oyo. Neryo Yesu mwabugha ati: “Muleke erilira; kusangwa syaholire, aliwe aghotsere.”
53 Abandu babere bowa ebinywa ebyo, mubamusekererya; kundi babya ibanasi ngoko omusika oyo abirihola.
54 Nikwa mwamuwata oko byala n’erimubirikira ati: “Mwana, hangana!”
55 Neryo omwana oyo mwasuba,* n’erilw’iniahangana. Kandi Yesu mwabugha ati bahe omusika oyo y’eky’erirya.
56 Ababuti biwe mubalangira nga nzoli busana n’obutseme. Nikwa mwabwirabo ati isibakaniraya omundu wosi-wosi oko biryakoleka.
Amaelezo awehikwa
^ Kutse “esyosiri.”
^ Kutse “eribiswa mo siri.”
^ Kutse “obwiko.”
^ Kutse “amahulula.”
^ Kutse “omulondo.”
^ Ulebaye amaana w’ebinywa.
^ Kinywa kwa kinywa, “ekyusa.”
^ Ulebaye amaana w’ebinywa.
^ Kinywa kwa kinywa, “ekirimu kiwe mukyasubula.”
