Engulu mbuya eyahandikawa na Luka 9:1-62
-
Abigha 12 bakahabawa amahano awalebirye omubiri w’eritulira (1-6)
-
Herode amahangya-hangya busana na Yesu (7-9)
-
Yesu akalisaya abandu 5 000 (10-17)
-
Petro amabugha ngoko Yesu yo Kristo (18-20)
-
Yesu akakanaya oko luholo lwiwe (21, 22)
-
Omwigha w’ekwenene (23-27)
-
Erihindukibwa lya Yesu (28-36)
-
Omulwana oyuliko embinga amalamibwa (37-43a)
-
Kandi Yesu akakanaya oko luholo lwiwe (43b-45)
-
Abigha bakakuba obuhaka omukulu nga nindi (46-48)
-
Oyutelwa netu inyali oko luhande lwetu (49, 50)
-
Yesu amaghanwa omo muyi we Samaria (51-56)
-
Erikwama Yesu (57-62)
9 Neryo mwabirikira haghuma abakwenda 12. Mwahabo obutoki n’ehamuli y’erihigha esyombinga n’erilamya amakoni.
2 Kandi mwatumabo eriyatula omwatsi w’Obwami bw’oMungu, n’erilamya abakoni.
3 Mwabwirabo ati: “Isimwaheka ekindu kyosi-kyosi busana n’olughendo, kutse omutso, kutse engunza y’akalyo, kutse omukati, kutse esyofranga, kutse eribya n’esyongyimba ibiri.
4 Nikwa aho bakendisyabakokya omo nyumba, musighalemo erihika aho mukendisyaluira omo muyi oyo.
5 Kandi abandu bamatendibakokya, omughulu mukalua omo muyi oyo, mukungute olututu l’oko bisando byenyu, erikangania ngoko babirikungwa.”*
6 Neryo mubahongoka bamatimba omo kiharo kyosi; mulongo oko ghundi. Babya bakatula engulu mbuya n’erilamya abandu ehosi.
7 Neryo Herode omutabali w’ekiharo kye Galilaya, mwowa ebyosi ebinemukoleka. Kandi mwahangya-hangya kutsibu kusangwa abandu balebe babya bakabugha bati Yohana abirilubuka.
8 Nikwa abandi babya bakabugha bati Eliya abirisuba, n’abandi bati omughuma w’oko baminyereri ba kera abirilubuka.
9 Herode* mwabugha ati: “Yohana ka munamutwako omutwe! Nikwa oyo ngowa ambu anemukola emyatsi yosi eyi nindi?” Neryo mwanza erimulolako.
10 Abakwenda babere babisubula, mubabwira Yesu y’ebyosi ebyo bakola. Neryo Yesu mwabatwala ahate bandu omo muyi owakahulawa mo Betesaida.
11 Nikwa abandu babere babiminya mubamukwama. Mwabakokya ndeke kandi mwakaniryabo oko Bwami bw’oMungu, n’erilamya ababya n’obwagha bw’erilamibwa.
12 Bwabere bwasonda erira, abakwenda 12 mubasa oho ali n’erimubwira bati: “Ubwire abandu uti baghende; baye omo milongo n’omo biharo bya hakuhi bayayisonderaye akalyo n’ah’erighotsera. Kundi hano tuli hali oko miyi.”
13 Nikwa mwabwirabo ati: “Mubahe akalyo.” Nabo mubamubwira bati: “Ekyo tuwiteko ye n’emikati itano n’esyosamaki ibiri sisa; eryo ni bugha ambu itukendiyaghulira abandu bosi aba b’akalyo.”
14 Habya abalume nga 5 000; aliwe Yesu mwabwira abigha biwe ati: “Mwikalayebo mo bikuto by’abandu nga makumi atano-atano.”
15 Neryo mubakola batya; bamikalya abosi.
16 Mwimya emikati itano eyo, n’esyosamaki ibiri. Mwasamalira elubula n’erisabirabyo. Neryo mwatsutsangabyo n’erihereryabyo abigha biwe ati baghabirebyo abandu.
17 Abosi mubalya, bamughuta. Mubakuma-kuma ebyasaka; ebitiri 12 ebyoswiremo ehihande-hihande.
18 Enyuma syaho iniane iyuwene akasaba, abigha mubasa aho ali. Mwabulyabo ati: “Abandu bakabugha bati nyiri ndi?”
19 Mubamusubirya bati: “Yohana Mubatisya, abandi bati Eliya, n’abandi bati omughuma w’oko baminyereri ba kera abirilubuka.”
20 Neryo mwabulyabo ati: “Ikwa nenyu mukabugha muti nyirindi?” Petro mwasubirya ati: “Kristo w’oMungu.”
21 Neryo mwakongomererabo ati isibabwira omwatsi oyu wo mundu wosi-wosi.
22 Nikwa mwabwirabo ati: “Litolere Omughala w’omundu iniaghalibwa kutsibu, n’erighanwa n’abasondoli b’Abayahudi, n’abahereri bakulu, n’abakangirirya b’Emighambo; n’enyuma syaho initibwa neryo ekiro ky’akasatu akendisyalubukibwa. ”
23 Neryo mwabwira abosi ati: “Omundu amanza erinikwama ayighane n’eriheka omuti* wiwe w’amaghali mughulu wosi n’erinikwama ebiro byosi.”
24 Kusangwa omundu oyukasonda erilamya engebe yiwe, akendisyaheryayo; nikwa oyukaheraya engebe yiwe busana naghe, yukandisyabanayo.
25 Kusangwa omundu angabana ndundi yahi amabya n’ebyosi ebiri omo kihugho nikwa iniaherya engebe yiwe kutse iniayiletera eritoghotibwa?
26 Kusangwa oyukakwa esisoni busana naghe na busana n’ebinywa baghe, Omughala w’omundu naye akendisyamukwa esisoni omughulu akendisyasa omo lukengerwa lwiwe n’olwa Tata wiwe n’olw’abamalaika babuyirire.
27 Nikwa kwenene ngababwira, hano hane abatendisyahola batebalangira Obwami bw’oMungu.”
28 Habere habilaba biro nga munani Yesu alibughire ebinywa ebi, mwaghenda haghuma na Petro, Yakobo, na Yohana. Mubahetukira oko kitwa eriyasaba.
29 Abere anemusaba, obusu bwiwe mubwahenduka. N’esyongyimba siwe musyakangabasania n’eribya nyeru-nyeru kutsibu.
30 Neryo abalume babiri babya ibanemukania naye; babya Musa na Eliya.
31 Babya bakangabasenie kandi mubakania okw’ighenda liwe eryabya irikisigha iryamuhikira e Yerusalema.
32 Nikwa Petro n’ababya haghuma naye babya ibanemuyitsingirako. Babere babuka ndeke, mubalangira olukengerwa lwiwe n’abalume babiri ibanimene aho ali.
33 Omughulu abalume abo basonda eriluaho, Petro mwabwira Yesu ati: “Mukangirirya, ni lusunzo okw’itwe eribya hano. Tuhimbe hano h’esyohema isatu; eyaghu, eya Musa, n’eya Eliya.” Petro syabya asi ebyo akabugha.
34 Iniakinabugha, ekitu mukyasa, kyamaswikabo. N’omughulu ekitu kyabya kikaswikabo, mububaha kutsibu.
35 Neryo omulenge mwalua omo kitu ati: “Oyu ni Mughala waghe, omusombolwa. Mumwowe.”
36 Omulenge inakinowika, mubalangira Yesu iniane iyuwene. Aliwe mubahuna. Kandi omo biro ebyo, mubatabwira omundu wosi-wosi emyatsi eyo balangira.
37 Ekiro ekyakwama, bakandaghala erilua oko kitwa, abandu bangyi mubahindana naye.
38 Neryo omulume mughuma mwabirikira ati: “Mukangirirya, ngakulemba-lemba uwatikaye mughala waghe; kundi iye musa yo ninawite.
39 Ekirimu kikamuhamba neryo inialw’inialaka. Kandi kikamusuka-sukanaya inianemulusya erihulo omo buno. Sikirimuluako kite kyamuhutalya.
40 Munalemba-lembire abigha baghu nyiti bahighekyo, aliwe mubatitatoka.”
41 Yesu mwasubirya ati: “Inywe kizazi* ekitawite obwikirirya kandi ekiherire, ngendisyabya nenyu n’erihanda omutima busana nenyu erihika mughulu wahi kwe? Leta mughala waghu yo hano.”
42 Nibya omughulu abya akaseghera hakuhi, embinga eyo muyamughusa ahisi n’erimughalya-ghalya oko kitaka. Nikwa Yesu mwahayira ekirimu kibi ekyo n’erilamya omulwana oyo. Neryo mwamuha baba wiwe.
43 N’abosi mubasweka busana n’obutoki bunene bw’oMungu.
Abandu ibanemusweka busana n’emyatsi eyo akola, mwabwira abigha biwe ati:
44 “Muhulikirire ndeke, kandi isimwibirirawa ebinywa ebi: Omughala w’omundu akendihoterwa n’erihirwa omo byala by’abandu.”
45 Aliwe mubatowa ebyo asonda eribugha; oko kwenene byabya ibyabiribiswa kubo isibowa enzumwa. Kandi babya bakasagha erimubulya oko binywa ebyo.
46 Neryo mubakubisania obuhaka, nga nindi yo mukulu omo kati-kati kabo.
47 Yesu abere abiminya ebyo bakalengekanaya omo mitima yabo, mwaleta omwana mulere amamwimania aho ali.
48 Mwabwirabo ati: “Oyukakokaya omwana mulere oyu busana n’erina ryaghe, naghe akabya iniamanikokya. N’oyukanikokaya, akabya iniamakokya n’oyo wanituma. N’oyukayiwata ng’omuke omo kati-kati kenyu, oyo yo mukulu.”
49 Yohana mwasubirya ati: “Mukangirirya, mutukalangira omundu akahigha esyombinga inianemukolesya erina ryaghu; neryo mutukasonda erimukakirya kundi si w’okw’itwe.”
50 Nikwa Yesu mwabasubirya ati: “Isimwasonda erimukakirya; kusangwa oyutelwa nenyu inyali oko luhande lwenyu.”
51 Neryo ebiro bya Yesu by’eritwalwa elubula byabere byasonda erihika, abya inyabiriyisogha kundu eriya e Yerusalema.
52 Neryo mwatuma abandu embere siwe. Nabo mubaghenda bamahika omo muyi mughuma w’Abasamaria batoke erimuteghekanirya.
53 Nikwa Abanya Samaria mubatamukokya, kusangwa abya iniabiriyisogha kundu eriya e Yerusalema.
54 Yohana na Yakobo babere balangira eki, mubabugha bati: “Mukama unanzire itwabirikira omuliro erilua elubula n’eritoghotyabo?”
55 Nikwa Yesu mwabinduka n’erikungabo.
56 Neryo mubaya omo ghundi muyi.
57 Ibane omo nzira, omundu mwamubwira ati: “Ngendikukwama ehosi eyo ukendighenda.”
58 Aliwe Yesu mwamubwira ati: “Esyoboha sinawite ebyuna, n’esyonyunyu sy’omo kyanya sinawite esyonyutu; aliwe Omughala w’omundu syawite ah’erihira omutwe wiwe.”
59 Neryo mwabwira oghundi ati: “Unyikwame.” Omundu oyo mwabugha ati: “Mukama unilighire nitsuke nayata baba.”
60 Nikwa mwamubwira ati: “Uleke abaholi bate abaholi babo; nikwa iwe ughende uyatule Obwami bw’oMungu bw’ehosi.”
61 N’oghundi mwabugha ati: “Mukama, ngendikukwama; aliwe uleke nitsuke nayalagha ab’eka.”
62 Yesu mwamubwira ati: “Omundu oyukawata okw’isuka eyo ende ikalimamo neryo iniakebera ebindu by’enyuma, syatolere Obwami bw’oMungu.”
Amaelezo awehikwa
^ Kinywa kwa kinywa, “ekyo kikendisyabya bwimiri busana nabo.”
^ Oyu ni Herode Antipa. Ulebaye amaana w’ebinywa.
^ Ulebaye amaana w’ebinywa.
^ Kutse “olulengo.”
