Engulu mbuya eyahandikawa na Mariko 1:1-45
-
Yohana Mubatisya akatulira (1-8)
-
Olubatiso lwa Yesu (9-11)
-
Sitani akalenga oko Yesu (12, 13)
-
Yesu akatsuka eritulira e Galilaya (14, 15)
-
Abigha b’erimbere bamabirikirwa (16-20)
-
Erihigha ekirimu kibi (21-28)
-
Yesu amalamya abandu bangyi e Kapernaumu (29-34)
-
Erisabira ahate abandu (35-39)
-
Omuhagha amalamibwa (40-45)
1 Enzuko y’engulu mbuya ya Yesu Kristo, Omughala w’oMungu:
2 Ngoko omuminyereri Isaya anahandika ati: “(Lebaya! Ngatuma omukwenda waghe embere syaghu.* Akendikuteghekanirya enzira.)
3 Omundu anemubirikira omo mbwarara ati: ‘Muteghekanaye enzira ya Yehova!* Muwanaye esyonzira siwe.’”
4 Yohana Mubatisya abya omo mbwarara. Abya akakangirirya abandu ngoko litolere ibabatisibwa, erikangania ngoko babiribindula emitima; amalolo wabo aghanyirawe.
5 Abandu bosi b’omo biharo bye Yudea n’abosi abikere e Yerusalema, ibakasa eyiri Yohana. Kandi ibakaghungama amalolo wabo neryo Yohana iniababatisya omo lusi lwe Yordani.
6 Yohana iniakambala olukimba lw’obweya bw’engamia n’omukaba w’engobi omo mbindi yiwe. Iniakalya esyongyike n’obuki b’omoli.
7 Kandi abya akatula engulu ati: “Omundu oyuwite akaghala kanene okw’ingye anemwasa enyuma syaghe. Sinitolere eryunama erikundula ekamba y’ebiryato biwe.
8 Ingye ngababatisaya omo maghetse; aliwe iye, akendisyababatisya omo kirimu kibuyirire.”
9 Oko biro ebyo Yesu mwalua e Nazareti ye Galilaya. Na Yohana mwamubatisya omo Yordani.
10 Abere abinalua omo maghetse, mwalangira olubula lukayikingula, n’ekirimu ky’oMungu kikamwandaghalirako ng’akalikuku.
11 Neryo omulenge mwalua elubula ati: “Uli Mughala waghe, omwanzwa; nabirikuligha.”
12 Neryo ekirimu mukyalw’ikyakuna Yesu eriya omo mbwarara.
13 Neryo mwabugha omo mbwarara mw’ebiro 40; n’eyo, Sitani mwamulengako. Abyayo haghuma n’esyonyama sy’omoli. Aliwe abamalaika babya bakamuwatikya.
14 Neryo Yohana abere abihirwa omo muliki, Yesu mwaya e Galilaya eriyatula engulu mbuya y’oMungu.
15 Abya akabugha ati: “Endambi eyahirawaho yabiribererera. N’Obwami bw’oMungu bwabirihika hakuhi. Mubindule emitima yenyu n’erikirirya* engulu mbuya.”
16 Yesu inyanemuyilenderya oko musike w’engetse ye Galilaya, mwalangira Simoni na mughala wabo ye Andrea. Babya ibanemughusa amatimba wabo w’omo ngetse kundi babya basohi b’esyosamaki.
17 Neryo Yesu mwabwirabo ati: “Munikwame. Ngendibayira mo basohi b’abandu.”
18 Neryo mubalw’ibasigha amatimba wabo bamamukwama.
19 Abere abitasyaya aho mbere ho hake, mwalangira Yakobo na Yohana, abaghala ba Zebedayo. Babya ibane omo bwato bwabo, ibanemukokotya amatimba wabo.
20 Mwalw’inyababirikira. Neryo mubasigha baba wabo ye Zebedayo omo bwato haghuma n’abandu b’ekasi, bamakwama Yesu.
21 Neryo mubaghenda e Kapernaumu.
Esabato yabere yanatsuka, Yesu mwingira omo sinagogi* amatsuka erikangirirya.
22 Kandi abandu mubasweka busana n’erikangirirya liwe; kusangwa abya akakangiriryabo ng’omundu oyuwite ehamuli, butsira ng’abakangirirya b’Emighambo.
23 Oko ndambi eyo, omo sinagogi* mwabya omundu oyuliko ekirimu kibi. Neryo omundu oyo mwabirikira n’omulenge muli ati:
24 “Tuwite olubanza lwahi naghu Yesu Munazareti? Ulyasa erisyatutoghotya kwehi? Ninasi nga uli ndi; uli Mubuyirire w’oMungu!”
25 Nikwa Yesu mwahayira ekirimu kibi ekyo ati: “Huna, mulueko!”
26 Neryo ekirimu kibi ekyo, kyabere kyabisukya-sukya omulume oyo n’erilaka kutsibu, mukyamuluako.
27 Neryo abandu bosi mubasweka kutsibu n’eritsuka eribulania bati: “Eki niki kwe? Mbino n’ikangirirya rihya-rihya! Awite ehamuli y’erihayira n’ebirimu bibi, nabyo ibyamwowa!”
28 Neryo engulu yiwe muyalw’iyatsungana omo biharo byosi bye Galilaya.
29 Neryo mubalua omo sinagogi,* bamaghenda ewa Simoni na Andrea. Yakobo na Yohana mubaghenda haghuma nabo.
30 Mabyala wa Simoni abya omo ngyingo inialwere erihuhana ly’omubiri. Neryo mubalw’ibabwira Yesu ngoko alwere.
31 Yesu mwaya aho ali, amamuwata oko byala n’erimuhangania; amalama. Neryo mwahangana n’eritsuka eribakolera.
32 Bwabere bwabya igholo-gholo, eryuba ryabilenga, abandu mubatsuka eriletera Yesu y’abakoni bosi n’abandu ababyako esyombinga.
33 N’abandu bosi b’oko muyi mubayikuma-kumira oko lukyo lw’enyumba eyo.
34 Neryo mwalamya abandu bangyi ababya bakwire amakoni mbiriri-mbiriri. Mwahigha n’esyombinga nyingyi. Nikwa mwatabya akalighirasyo eribugha; kundi syabya isinasi iye ko ni Kristo.
35 Engyakya-ngyakya isibulibwakya ndeke, Yesu mwabuka. Mwahuluka amaya ahate abandu, neryo amatsuka erisaba.
36 Nikwa Simoni n’ababya haghuma naye mubamusondya kutsibu.
37 Babere bamubana, mubamubwira bati: “Abandu bosi banemukusondya.”
38 Nikwa mwasubiryabo ati: “Tughende ehandi oko yindi miyi eyiri hakuhi, nitoke eriyatulira eyo nayo. Kundi omwatsi oyu w’aleka inasa.”
39 Neryo mwatimba omo Galilaya yosi akakangirirya omo syosinagogi* syabo n’erihigha esyombinga.
40 Eyo nayo omuhagha mwasa aho ali, amamulemba-lemba nibya inianakukamire, ati: “Wamabya ighunanzire, unyilamaye.”
41 Neryo Yesu mwamukwira obulighe. Mwakakya ebyala, amamutulako n’erimubwira ati: “Nyinanzire! Ulamibawe.”
42 Neryo aho n’aho ebihagha biwe mubyamuluako, amalama.
43 Yesu mwabya abimukongomerera, mwalw’inyamubwira ati aghende.
44 Mwamubwira ati: “Isiwakaniraya omundu wosi-wosi. Aliwe ughende uyayikanganaye oko muhereri. Kandi busana n’erilamibwa lyaghu, uyaherere emyatsi eyo Musa ahula, busana n’eriminyisyabo ngoko wabirilama.”
45 Aliwe omulume oyu abere abighenda, mwatsuka eritula omwatsi oyo n’eritsatsangagho ehosi. Busana n’ekyo, Yesu mwabya isyangatasyatoka eringira omo muyi wosi-wosi butsira eriminyikala. Neryo mwabya akabya ahate abandu. Aliwe abandu babya bakasa eyo ali bakalua ehosi.
Amaelezo awehikwa
^ Kinywa kwa kinywa, “embere sy’obusu bwaghu.”
^ Ulebaye endomeko A5.
^ Kutse “mubye n’obwikirirya omo ngulu mbuya.”
^ Kutse “enyumba y’eriramiryamo.”
^ Ulebaye amaana w’ebinywa.
^ Ulebaye amaana w’ebinywa.
^ Ulebaye amaana w’ebinywa.
