Engulu mbuya eyahandikawa na Mariko 10:1-52
10 Neryo Yesu mwalua aho, amasokera oko ghundi musirya we Yordani oko mipaka* ye Yudea. Kandi abandu bangyi mubahindana aho ali. Neryo mwatsuka eribakangirirya ngoko anabya abeghere erikola.
2 Kandi Abafarisayo mubasa. Bakasonda erimulengako, mubamubulya erikwamana n’Emighambo omulume ng’anahamulirwe eritwa endwa na mukali wiwe.
3 Mwabulyabo ati: “Musa mwabahana atiki?”
4 Mubamusubirya bati: “Musa mwaligha ati omundu inyahandika ebaruha y’eritwa endwa neryo inyamutibitako.”
5 Mwababwira ati: “Musa mwabahandikira ekyalayiro eki busana n’emitima yenyu eyikalire.
6 Nikwa oko nzuko, omughulu w’erihangyika, ‘Mwahangyikabo omulume n’omukali.
7 Busana n’omwatsi oyu, omulume akendisyasigha baba wiwe na mama wiwe,
8 neryo ibo babiri bakendisyabya mubiri mughuma.’ Neryo isibakiri babiri nikwa mubiri mughuma.
9 Okw’ekyo, ekyo oMungu abirimatania haghuma, isihabya omundu oyukaghabulakyo.”*
10 Babere babitasyasuba omo nyumba, abigha biwe mubatsuka erimubulya oko mwatsi oyo.
11 Mwababwira ati: “Obuli mundu oyukatwa endwa na mukali wiwe, n’eritahya oghundi mukali, akabya iniamasingira n’erimuleghulako.
12 N’omukali amabitwa endwa n’iba wiwe n’eritahibwa n’oghundi mulume, akabya iniamasingira.”
13 Neryo abandu mubatsuka erimuletera abana balere bati atule kubo; aliwe abigha mubakunga abandu abo.
14 Omughulu Yesu alangira ekyo, mwahitana n’eribwirabo ati: “Muleke abana balere base aho niri; isimwabakakiraya. Kusangwa Obwami bw’oMungu ni bw’abandu abali ng’abana.
15 Oko kwenene ngababwira, obuli mundu oyutyangirira Obwami bw’oMungu ng’omwana mulere, syendisyingira mubo n’ahake.”
16 Neryo mwahamba abana abo omo byala biwe. Mwahira kubo kw’ebyala, amatsumulabo.
17 Inianemughenda, omulume mwasa akatibita eyo ali, amakukama embere siwe n’erimubulya ati: “Mukangirirya Mubuya, ni myatsi yahi yo litolere inakola imo nasyabana engebe y’erikota?”
18 Yesu mwamubwira ati: “Busanaki ukanyahula mo mubuya? Omubuya ni mughuma musa; y’oMungu.
19 Unasi ebyalayiro: ‘Isiwita, isiwasingira, isiwiba, isiwabugha amabehi, isiwanyegha, usikaye baba waghu na mama waghu.’”
20 Omulume oyo mwabwira Yesu ati: “Mukangirirya, ngakwama ebyalayiro byosi ebyo erilua omo bulwana bwaghe.”
21 Yesu mwatungerera omulume oyo, mwamwanza. Mwabugha ati, “Ukisigha kindu kighuma: Ughende uyaghulaye ebindu ebyo uwite, n’eriwatikya abera. Aho, ukendibya iwamabya n’ebindu omo lubula. Enyuma syaho wase unikwame.”
22 Mwabya abyowa ebinywa ebyo, mwakwa obulighe. Neryo mwaluaho iniabirisusumana, kundi abya n’ebindu bingyi.
23 Yesu mwabya abitungerera abandu, mwabwira abigha biwe ati: “Likendisyakala oko bandu b’esyofranga eringira omo Bwami bw’oMungu!”
24 Aliwe abigha mubaswekera ebinywa biwe. Neryo Yesu mwababwira ati: “Bana, likalire eringira omo Bwami bw’oMungu!
25 Lyolobire oko ngamia erilaba omo kuna k’esindani kwilaba omuteke eringira omo Bwami bw’oMungu.”
26 Mubasweka kutsibu okw’aho n’eribugha bati: “Oyo wangalamibwa nindi kwe?”
27 Yesu mwatungererabo n’eribugha ati: “Oko bandu sikitokekene; aliwe ko bite bitya oko Mungu. Kusangwa oko Mungu emyatsi yosi ikatokekana.”
28 Neryo Petro mwatsuka eribugha naye ati: “Ibwa itwe ka twabirisigha ebindu byetu byosi n’erikukwama!”
29 Yesu mwabugha ati: “Oko kwenene ngababwira, sihali omundu oyo wabirisigha enyumba, kutse abaghala babo, kutse abali babo, kutse mama wiwe, kutse baba wiwe, kutse abana, kutse amalima, busana naghe na busana n’engulu mbuya,
30 oyutendisyasunga ngendo 100 kwilaba aho oko mughulu ono; amanyumba, abaghala babo, abali babo, abo mama, abana, n’amalima, haghuma n’eryendereribwa; n’oko mughulu* owakasa engebe y’erikota.
31 Nikwa abangyi abali b’erimbere lino, bakendisyabya b’enduli; n’ab’enduli, bakendisyabya b’erimbere.”
32 Neryo ibane omo nzira bakaya e Yerusalema, Yesu abya embere syabo; neryo mubasweka. Nikwa ababya enyuma syabo mubatsuka eryubaha. Neryo kandi mwahengeka abakwenda biwe 12 n’eritsuka eribabwira emyatsi eyikisiya iyamuhikira:
33 “Tukahetukira e Yerusalema. N’eyo, Omughala w’omundu akendihirwa omo byala by’abahereri bakulu n’abakangirirya b’Emighambo; nabo bakendimutswera oluholo. Kandi bakendimuhira omo byala by’abandu b’ebihanda.
34 Aba bakendimusekererya n’erimutwirako amatandi n’erimuhunza omo bikoba n’erimwita. Aliwe hakendisyabya hakya biro bisatu inialubuka.”
35 Yakobo na Yohana, abaghala ba Zebedayo mubasa aho ali n’erimubwira bati: “Mukangirirya, twanzire iwatukolera ekyosi-kyosi ekyo tukendikusaba.”
36 Mwababulya ati: “Mwanzire inabakoleraki?”
37 Nabo mubamusubirya bati: “Utulighire tusyikala, omughuma oko luhande lwaghu lw’amali n’oghundi oko lw’amalembe omo lukengerwa lwaghu.”
38 Aliwe Yesu mwabasubirya ati: “Simwasi ekyo mukasaba. Mwanganatoka erinywa ekikombe* ekyo nganywa, n’eribatisibwa omo lubatiso olo ngabatisibawamo?”
39 Mubamusubirya bati: “Inga.” Yesu mwabasubirya ati: “Ekikombe* ekyo nganywa, mukendisyanywa kukyo, n’olubatiso olo ngabatisibawamo mukendisyabatisibwa mulo.
40 Aliwe eryikala oko luhande lwaghe lw’amali kutse olw’amalembe, singye ngahamulakyo; emyanya eyo ni y’abandu ababiriteghekaniribwayo.”
41 Abandi bakwenda erikumi babere babyowa omwatsi oyo, mubahitana oko Yakobo na Yohana.
42 Aliwe Yesu mwabirikirabo, amabwirabo ati: “Munasi ngoko abakabya ng’abawite ehamuli oko bandu bakatabala kubo; n’abakulu babo bakabya n’ehamuli kubo.
43 Inywe simutolere mukabya mutya. Aliwe oyo wanzire eribya mukulu omo kati-kati kenyu litolere iniakolera abandi,
44 n’oyo wanzire eribya w’erimbere omo kati-kati kenyu litolere iniabya mughombe w’abosi.
45 Nibya, Omughala w’omundu mwatasa busana n’erikolerwa; aliwe mwasa erikolera abandi n’eriherera engebe yiwe mo mbanulo busana n’abandu bangyi.”
46 Neryo mubahika e Yeriko. Yesu n’abigha biwe ibanemulua e Yeriko, abandu bangyi mubabakwama. Bartimayo mughala wa Timayo abya inianikere oko musike w’enzira. Abya ndimetime kandi iniakasaba-saba.
47 Omughulu owa ngoko ni Yesu Munazareti, mwatsuka eribirikira omo mulenge muli ati: “Yesu Mughala wa Daudi, uniwatikaye.”*
48 Neryo abandu bangyi mubatsuka erimukaramira bati ahune. Nikwa mwabirikira kutsibu okw’aho ati: “Mughala wa Daudi uniwatikaye.”*
49 Neryo Yesu mwimana n’eribugha ati: “Mumubirikire muti ase hano.” Neryo mubabirikira omundu oyo n’erimubwira bati: “Usike! Hangana, anemukubirikira.”
50 Mwaghusa ekanzu* yiwe, amalw’iniahangana n’eriya eyiri Yesu.
51 Neryo Yesu mwamubulya ati: “Wanzire inakukoleraki?” Endimetime eyo muyamusubirya yiti: “Raboni,* uniwatikaye nitoke eritasyalangira.”
52 Neryo Yesu mwamubwira ati: “Ughende. Obwikirirya bwaghu bwamabikulamya.” Omulume oyo mwalw’inialangira. Neryo mwatsuka erikwama Yesu.
Amaelezo awehikwa
^ Kutse “emitano.”
^ Kutse “oyukakatulakyo.”
^ Ulebaye amaana w’ebinywa.
^ Kutse “olutehi.”
^ Kutse “olutehi.”
^ Kinywa kwa kinywa, “ungwire obulighe.”
^ Kinywa kwa kinywa, “ungwire obulighe.”
^ Kutse “olukimba lw’eryambalira oko lundi.”
^ Ni bugha ambu, “Mukangirirya.”
