Engulu mbuya eyahandikawa na Mariko 11:1-33
11 Neryo babere babihika e Betfage ne Betania, oko Kitwa ky’Emizeituni hakuhi ne Yerusalema; Yesu mwatuma abigha biwe babiri.
2 Mwabwirabo ati: “Mughende oko mulongo olya. Mukendibya mwabinahikayo, mukendilangira ekyana ky’epunda ekyo omundu ate atikalako ikinahangire. Muhangulekyo muletekyo hano.
3 N’omundu amabibabulya ati, ‘Mukahangulakyo busanaki?’ mumubwire muti, ‘Omukama amalagha kukyo, kandi akendilw’iniatumakyo.’”
4 Neryo mubaghenda. Mubeya ekyana ky’epunda ikinahangire oko nzira ehihya hakuhi n’olukyo.* Neryo mubahangulakyo.
5 Nikwa abandu ababya bimeneho, mubababulya bati: “Mukahangula ekyana ky’epunda busanaki?”
6 Abigha mubabwirabo ebyo Yesu abalayira. Neryo abandu abo mubabaleka baghende.
7 Mubaletera Yesu y’ekyana ky’epunda ekyo. Kandi mubahira kukyo kw’esyongyimba syabo. Neryo Yesu mwikala kukyo.
8 N’abandu bangyi mubasanza esyongyimba syabo sy’omo nzira; aliwe abandi mubatwa ebisanza by’omoli.
9 Ababya embere sya Yesu n’enyuma siwe mubabya bakabirikira omo mulenge muli bati: “Tukakusaba Mungu umulamaye! Omuyisa ali oko oyukasa omo rina rya Yehova!*
10 Omuyisa abye oko Bwami bwa Tata wetu Daudi obukasa! Tukakusaba Mungu iwe uli endata kutsibu, umulamaye!”
11 Yesu mwingira omo muyi we Yerusalema, amingira omo hekalu. Neryo mwalebya ebyosi ebiri omo hekalu. Nikwa kundi bwabya ibwabiryira, mwaya e Betania n’abakwenda 12.
12 Ekiro ekyakwama, akalua e Betania, mwakwa enzala.
13 Inyane hali, mwalangira omuti w’omutini inyaneko ebiti. Mwaya eyiri omuti oyo akalebya ng’anemwendibanako amatunda. Aliwe mwabya abihika ahali omuti oyo mwatabanako kindu; kwabya ebiti bisa kundi sikyabya kirimo ky’emitini.
14 Neryo mwabwira omuti oyo ati: “Isihasyasyabya omundu oyukalya oko matunda waghu.” N’abigha biwe babya ibanowire.
15 Neryo mubahika e Yerusalema. Mwingira omo hekalu, amahighira ehihya abakaghulirayamo n’erighuliramo. Mwakunanga ehimesa hy’abakahinganaya esyofranga n’ebitumbi by’abakaghulaya ehilikuku;
16 mwataligha n’omundu wosi-wosi akalaba omo hekalu inianahekire ekindu.
17 Abya akabakangirirya n’eribabwira ati: “Simwasi ngoko kinahandikire kiti, ‘Enyumba yaghe ikendisyahulwa mo nyumba y’erisabiramo busana n’ebihanda byosi’? Nikwa inywe mukayirayo mo bwikalo bw’abanyeyi.”
18 Abahereri bakulu n’abakangirirya b’Emighambo mubowa ekyo. Neryo mubatsuka erisondekania nga bangamwita bati. Aliwe ibakamusagha kundi abandu bosi ibakasweka busana n’erikangirirya riwe.
19 Bwabere bwabibya igholo-gholo, Yesu n’abigha biwe mubalua omo muyi.
20 Engyakya omo tututu, mubalaba hakuhi n’omuti w’omutini. Mubalangira ngoko omuti oyo abiryuma eritsuka oko mirihi.
21 Petro mwibuka ebyabya. Mwabugha ati: “Rabi,* lebaya! Omuti w’omutini ogho watakira abiryuma.”
22 Yesu mwabasubirya ati: “Mwikiriraye oMungu.
23 Oko kwenene ngababwira, omundu amabibwira ekitwa eki ati, ‘Ukulike hano uye omo ngetse,’ amabya isyali n’eritika-tika omo mutima wiwe; aliwe inianikirirye ngoko ekyo amabugha kikendibya, ikikendibya.
24 Busana n’ekyo ngababwira; emyatsi yosi eyo mukasaba n’eribulya omo musabe, mubye n’obwikirirya ngoko mwabiribanayo. Aho imukendibanayo.
25 N’omughulu mukasaba, mwamabya n’omwatsi oko mundu, mumughanyire; Tata wenyu w’elubula naye atoke erighanyira amalolo wenyu.”
26 * ——
27 Kandi mubahika e Yerusalema. Yesu inyanemulaba omo hekalu, abahereri bakulu, abakangirirya b’Emighambo, n’abasondoli b’Abayahudi mubasa aho ali,
28 n’erimubulya bati: “Ukakola emyatsi eyi omo hamuli yandi? Kandi nindi yo wakuha ehamuli y’erikola emyatsi eyi?”
29 Yesu mwasubiryabo ati: “Naghe ngendibabulya eribulyo righuma. Munisubiraye, naghe ngendibabwira nga ngakola emyatsi eyi y’omo hamuli yandi.
30 Olubatiso lwa Yohana lwalua oko Mungu* kutse oko bandu? Munyisubiraye.”
31 Neryo mubatsuka eribwirana bati: “Twamabibugha tuti, ‘Lwalua oko Mungu,’* iniakendibugha ati, ‘Neryo ekyaleka imutamwikirirya niki?’
32 Ikwa twanganabugha tuti, ‘Lwalua oko bandu?’ Babya bakasagha abandu; kundi abandu babya ibanasi ngoko Yohana kwenene abya muminyereri.
33 Neryo mubasubirya Yesu bati: “Sitwasi.” Yesu mwabwirabo ati: “Kwesi naghe sinendibabwira nga ngakola emyatsi eyi omo hamuli yandi.”
Amaelezo awehikwa
^ Kutse “omulango.”
^ Ulebaye endomeko A5.
^ kutse “Mukangirirya.”
^ Ulebaye endomeko A3.
^ Kinywa kwa kinywa, “lwalua elubula?”
^ Kinywa kwa kinywa, “lwalua elubula.”
