Engulu mbuya eyahandikawa na Mariko 13:1-37
13 Yesu inianemulua omo hekalu, omughuma w’oko bigha biwe mwamubwira ati: “Mukangirirya, lebaya! Amabwe n’amanyumba w’eriswekera!”
2 Yesu mwamusubirya ati: “Unalangire amanyumba manene-manene aya? Oko kwenene hano sihali eribwe n’erighuma erikendisyasighala oko rindi eritendisyasambulwa.”
3 Yesu inianikere oko Kitwa ky’Emizeituni, eyisirya oko hekalu, Petro, Yakobo, Yohana, na Andrea, mubamubulya ahate bandu bati:
4 “Utubwire emyatsi eyi nga ikendisyabya mughulu wahi. N’ekiminyikalo ky’erihwerera ly’emyatsi yosi eyi ni kyahi?”
5 Neryo Yesu mwabwirabo ati: “Mulebaye ndeke isihabya omundu oyukabatebaya.
6 Abangyi bakendisyasa omo rina ryaghe bakabugha bati, ‘Ningye Kristo,’ kandi bakendisyatebya abandu bangyi.
7 Omughulu mukendisyalangira amalwa, n’eryowa esyongulu sy’amalwa; isimwahahukaya emitima. Litolere emyatsi eyi iyabya, aliwe enduli isiyiriyahika.
8 “Kusangwa ekihanda kikendisyalwa n’ekindi kihanda, n’obwami n’obundi bwami. Hakendisyabya emisiki omo biharo mbiriri-mbiriri. Hakendisyabya n’erikeha ly’akalyo. Emyatsi eyi yiri ng’eritsuka ly’obulumi obo omukule akabya nabo akasonda eributa.
9 “Nikwa inywe imwayiteya kutsibu. Abandu bakendisyabatwala oko syotribinali. Kandi mukendisyahunzirwa omo syosinagogi,* n’erihirwa embere sy’abami n’abatabali busana naghe; ekyo kikendisyabya bwimiri okw’ibo.
10 Kandi litolere engulu mbuya iyatsuka eritulaghanibwa oko bihanda byosi.
11 N’omughulu bakendisyabya bakabahamba bakabatwala oko syotribinali, isimwatsuka erihangya-hangya nga mukendibugha mutiki. Aliwe imwabugha ebyo mwamahabwa oko ndambi eyo; kusangwa sinywe mukabugha, aliwe kye kirimu kibuyirire.
12 Kandi omughala wabo mundu akendisyahira omughala wabo omo byala by’abakendimwita. Na baba kw’anemwendisyakolera omwana wiwe y’atya. N’abana bakendisyalwa n’ababuti babo n’eritisyabo.
13 Kandi abandu bosi bakendisyabapona* busana n’erina ryaghe. Nikwa oyukendisyayiyinia erihika oko nduli yukendisyalamibwa.
14 “Nikwa omughulu mukendisyalangira ekindu ekikita esyonye kandi ekikaheraya kikahangana aho kitatolere erihangana (oyukasoma ayiteghereraye); abali e Yudea batsuke eritibita oko bitwa.
15 N’oyuli oko nyumba kw’endata syakime kutse eringira omo nyumba ati akendamo ekindu kyosi-kyosi.
16 N’oyuli omwirima syasube enyuma, akayenda olukimba* lwiwe.
17 Obulighe oko bakule n’abakendisyabya n’abana abakanyonya* omo biro ebyo!
18 Mubye mukasaba ekyo isikyasyahika omughulu w’embeho nene.*
19 Kusangwa ebiro ebyo bikendisyabya by’eryaghalwa erite ryatabya eritsuka omughulu oMungu ahangyika ekihugho erihika oko mughulu oyo. Kandi eryaghalwa eryo siryendisyasyabya enyuma syaho.
20 Yehova* kw’ataliyira ebiro ebyo mo bikuhi, sihangabere omundu oyo wangalamibwe. Nikwa abiriyirabyo mo bikuhi busana n’abasombolwa* biwe abo abirisombola.
21 “Neryo omundu amabibabwira ati, ‘Kristo ane hano,’ kutse ati, ‘Ane erya,’ isimwamwikiriraya.
22 Kusangwa abo Kristo b’amabehi n’abaminyereri b’amabehi bakendisyahuluka. Bakendisyakola ebitiko-tiko, n’emyatsi eyikaswekaya busana n’eriherya abasombolwa,* kyamatokekana.
23 Neryo inywe muyiteghaye. Nabiribabwira emyatsi yosi eyi embere yibye.
24 “Aliwe omo biro ebyo, eryaghalwa eryo ryabihwa; eryuba rikendisyabya mwirimya, n’omughenda syendisyakolerya.
25 N’esyongununu sikendisyabya sikatoghonga erilua omo kyanya. N’ebindu by’amaka ebiri omo kyanya bikendisyasuka-sukanibwa.
26 Neryo bakendisyalangira Omughala w’omundu akasa omo bitu n’obutoki bunene n’olukengerwa.
27 Neryo akendisyatuma abamalaika biwe. Nabo bakendisyahindania abasombolwa* biwe erilua oko mahunga ani w’ekihugho; erilua oko nduli sy’ekihugho erihika oko nduli sy’ekyanya.
28 “Muleberaye oko muti w’omutini. Omughulu ehitahi hyagho hirere-hirere hikoloberera n’eryasako ebiti, mukaminya ngoko omughulu w’omwisi ali hakuhi.
29 Nenyu kutya, omughulu mukendisyalangira emyatsi eyi ikabya, imwaminya ngoko Omughala w’omundu ali hakuhi oko lukyo.
30 Oko kwenene ngababwira, ekizazi* eki sikyendisyalaba emyatsi yosi eyi iteyabererera.
31 Ekyanya n’ekihugho bikendisyalaba, aliwe ebinywa byaghe bikendisyabyaho kera na kera.
32 “Sihali oyo wasi ekiro ekyo kutse endambi; nomo bangabya abamalaika kutse Omughala w’omundu. Tata musa yunasi.
33 Neryo muteghaye kandi mubye imunalolire. Kusangwa simwasi endambi eyabirihirwaho ng’ikendisyahika mughulu wahi.
34 Kiri ng’omundu oyukaya oko lughendo omo kindi kihugho. Omughulu akaghenda, iniasigha enyumba yiwe y’omo byala by’abaghombe biwe; iniaha obuli mundu y’ekasi yiwe n’eribwira omuteya w’olukyo ati ateghaye.
35 Busana n’ekyo muteghaye, kundi simwasi omukama w’enyumba ng’akendisyasa mughulu wahi. Kusangwa simwasi ng’akendisyasa omwigholo-gholo, omo kati k’ekiro, kutse engoko-lume ikabika, kutse omo mitsange.
36 Omughulu akasa kitsumbukirania, isyabeghaya imuneto.
37 Nikwa ebyo ngababwira, ngabwirabyo abosi: Muteghaye.”
Amaelezo awehikwa
^ Ulebaye amaana w’ebinywa.
^ Kutse “bakendisyabakwa obusu.”
^ Kutse “olukimba lw’eryambalira oko lundi.”
^ Kutse “abakonga.”
^ Kutse “omughulu w’eritsuku.”
^ Ulebaye endomeko A5.
^ Kutse “abayisoghawa.”
^ Kutse “abayisoghawa.”
^ Kutse “abayisoghawa.”
^ Kutse “olulengo.”
