Engulu mbuya eyahandikawa na Mariko 14:1-72
-
Abahereri bakaya embita y’eryita Yesu (1, 2)
-
Yesu amutwako amaghuta awakakumba ndeke (3-9)
-
Yuda akahotera Yesu (10, 11)
-
Epasaka y’omwiso (12-21)
-
Eritsukisya Akalyo k’Erigholo-gholo k’Omukama (22-26)
-
Yesu akabugha ati Petro akendimughana (27-31)
-
Yesu akasaba inyane omo ririma rye Getesemane (32-42)
-
Yesu akahambawa (43-52)
-
Eritondesibwa embere sye Sanhedrini (53-65)
-
Petro akayighana Yesu (66-72)
14 Habya ihakisiya ebiro bibiri Epasaka* n’ekiro kikulu ky’erirya omukate owatemo elevire* ibyahika. Abakulu b’abahereri n’abakangirirya b’Emighambo babya ibanemusondekania enzira y’erihamba Yesu omo menge n’erimwita.
2 Kusangwa mubabya bakabwirana bati: “Isitwakolakyo omo kiro kikulu; kundi abandu ibanganatutsatsuhirako.”
3 Omughulu Yesu abya e Betania inianemulya* omo nyumba ya Simoni omuhagha, omukali mughuma mwahika. Abya inyanawite oko tsupa ye alabasta eyabyamo amaghuta awakakumba ndeke aw’enardo iyiyene-yene, kandi awakaghula franga nene. Mwatula etsupa eyo n’eritsuka eryuta amaghuta ayo oko mutwe wa Yesu.
4 Abandi mubahitana n’eribwirana bati: “Amaghuta awakakumba ndeke aya akatakwira busa busanaki?
5 Kundi amaghuta awakakumba ndeke aya, alyendighulibwa esyodinari* esilabire oko 300 n’esyofranga esyo isyahabwa oko bera!” Kandi mubahitana* oko mukali oyo ko kutsibu.
6 Aliwe Yesu mwabugha ati: “Mumuleke, mukamukenderaya busanaki? Amanyikolera omwatsi mubuya.
7 Kusangwa abera mune nabo ebiro byosi, kandi mwanganakolerabo ebibuya endambi yosi-yosi eyo mwanzire; nikwa ingye simwendibya naghe ebiro byosi.
8 Amakola ekyo angatoka. Amuta amaghuta awakakumba ndeke oko mubiri waghe akateghekaniagho busana n’eritabwa.
9 Kwenene ngababwira, ehosi eyo engulu mbuya ikendisyatulaghanibwa omo kihugho kyosi, omwatsi ogho omukali oyu amakola nagho akendisyabya akakanibwako busana n’erimwibuka.
10 Neryo Yuda Iskariote omughuma w’oko bakwenda 12, mwaya eyiri abahereri bakulu eriyahotera Yesu.
11 Babere babyowa ekyo, mubatsema kutsibu. Mubalagha erimuha esyofranga sy’efeza.* Neryo Yuda mwatsuka erisondekania akanya ak’erimuhoteramo.
12 Neryo oko kiro ky’erimbere ky’eriteghekania Omukati Owatemo Levire,* omughulu babya bakakera enyama ye Pasaka,* abigha biwe mubamubulya bati: “Wanzire itwayakuteghekanirya Epasaka* yo hayi?”
13 Neryo mwatuma abigha babiri n’eribwirabo ati: “Muye omo muyi. Mukendihindana omulume inianahekire eriregha ry’amaghetse. Mukendimukwama.
14 Akendibya abingira omo nyumba, mukendibwira omukama w’enyumba muti, ‘Omukangirirya ati: “Ekyumba ky’abagheni kiri hayi aho ngendilira Epasaka* haghuma n’abigha baghe?”’
15 Naye akendibakangya ekyumba kinene eky’endata ekiteghekanibwe kandi ekirimo ebyosi. Eyo, mukendituteghekanirya Epasaka.”*
16 Neryo abigha mubaghenda. Babere babingira omo muyi, mubeya emyatsi iyine ngoko Yesu anabwirabo. Neryo mubateghekania Epasaka.*
17 Bwabere bwabya igholo-gholo Yesu mwasa n’abakwenda erikumi n’ababiri.
18 Neryo ibane oko mesa bakalya, Yesu mwabugha ati: “Ngababwira ekwenene, omughuma w’okw’inywe oyukalya haghuma naghe akendinihotera.”
19 Mubakwa obulighe n’erimubulya mughuma-mughuma bati: “Ikwa ningye kwehi?”
20 Yesu mwabwirabo ati: “Ni mughuma w’oko bakwenda 12 oyukakolaya haghuma naghe omo kibakuli.*
21 Kusangwa Omughala w’omundu akendilusibwa okw’inywe ngoko Amasako anamubughireko. Aliwe obulighe oko oyukendihotera Omughala w’omundu. Kyangabere kibuya omundu oyo kw’atalibutawa.”
22 Kandi ibakinalya, mwimya omukati, amasaba. Mwatsutsangagho, n’eribahagho ati: “Mwimaye; oyu akasosekanaya omubiri waghe.”
23 Kandi mwimya ekikombe.* Mwabya abisaba, mwabahakyo. Abosi mubanywa kukyo.
24 Mwabwirabo ati: “Eki kikasosekanaya ‘omusasi waghe w’endaghane,’ owakendyutika busana n’abandu bangyi.
25 Oko kwenene ngababwira, sinendisyasyanywa oko divai erihika ekiro ngendisyanywa oko divai nyihya-nyihya omo Bwami bw’oMungu.”
26 Neryo babere babiimba bakapipa oMungu, mubaya oko Kitwa ky’Emizeituni.
27 Neryo Yesu mwabwirabo ati: “Inywe bosi mukenditwikala, kusangwa kyabirihandikwa kiti: ‘Ngendisyahunza omulisya n’esyombuli sikendisyapanzikana.’
28 Aliwe ngendisyabya nabilubuka, ngendisyabatanga e Galilaya.”
29 Nikwa Petro mwamubwira ati: “Abosi aba nomo bangatwikala, ingye sinenditwikala.”
30 Yesu mwamusubirya ati: “Oko kwenene ngakubwira, munabwire omo kiro engoko-lume siyendibika kabiri utewanighana ngendo isatu.”
31 Nikwa mwahatikana ati: “Nibya nomo lyangabya erihola haghuma naghu, sinangatakughana n’ahake.” N’abandi bosi mubatsuka eribugha batya.
32 Neryo mubahika ahakahulawa mo Getesemani. Mwabwira abigha biwe ati: “Mwikale hano, ngayasaba.”
33 Neryo mwaghenda na Petro, Yakobo na Yohana. Neryo mwatsuka eryaghalwa kutsibu omo mutima; n’omutima wiwe mwapuka-puka kutsibu.
34 Mwabwirabo ati: “Nabirikwa obulighe bunene omo mutima, nibya bwangananita. Mubye hano muteghaye.”
35 Neryo mwabya abighenda embere yo hake, mwawa oko kitaka n’eritsuka erisaba ati kyamatokekana endambi eyikalire eyo yimulabeko.
36 Neryo mwabugha ati: “Abba, Tata; okw’iwe emyatsi yosi itokekene. Unilusayeko ekikombe eki. Nikwa butsira erisonda ryaghe, aliwe erikuwaghu.”
37 Mwasubula, ameyabo ibabiriyato. Neryo mwabwira Petro ati: “Simoni, wayireto? Siwetabana akaghala k’eriteya omo saha nguma?
38 Mubye imunateghirye n’erisaba butumbya, mukasyalengwako. Kwenene, omutima ananzire, aliwe omubiri ni mwolo.”
39 Kandi mwaghenda amayasaba. Mwabugha ebinywa bighumerera.
40 Kandi mwasubula ameyabo ibabiriyato; kusangwa ameso wabo abya inyabirilitoha. Neryo mubatabana eky’erimusubirya.
41 Kandi mwasubula engendo y’akasatu n’eribwirabo ati: “Oko ndambi eyiri ng’eno, mukaluhuka n’eriyato! Mubuke! Endambi yamabihika! Mulebaye! Omughala w’omundu akayahoterawa n’erihirwa omo byala by’abakola-nabi.
42 Muhangane tughende. Oyukendinihotera amabihika hakuhi.”
43 Aho n’aho inyakinabugha, Yuda omughuma w’oko bakwenda ikumi n’ababiri mwahika inyane n’ekikumula ky’abandu. Babya ibanahekire emiyali n’emyigho.* Abahereri bakulu n’abakangirirya b’Emighambo n’abakulu b’abandu bo batuma abandu abo.
44 Neryo oyo wamuhotera abya inyabirihabo ekiminyikalo ekyo akendikolesya ati: “Oyo ngendiha ebeze* ini ye, mukendimuwatako n’erimuboha. Mukendimutwala imunamuteghirye kutsibu.”
45 Neryo Yuda mwahika n’eriya ahali Yesu n’eribugha ati: “Kuti kwe Rabi!”* Neryo mwamuha ebeze.*
46 Neryo mubahamba Yesu n’erimuwatako.
47 Nikwa omughuma w’oko babya bimeneho, mwimya omuyali wiwe amabanda omughombe w’omuhereri mukulu, n’eritwa okutu kwiwe.
48 Aliwe Yesu mwabwira abandu abo ati: “Mukasyanihamba n’emiyali n’emyigho* nga mukasyahambaho omwibi?”
49 Ebiro byosi ingabya inine nenyu omo hekalu ngakangirirya, ka mumutanihamba! Aliwe ekyo kyamabya busana n’eriberererya Amasako.”
50 Neryo abosi mubamusigha, bamatibita.
51 Nikwa habya omulwana oyo wabya ambite olukimba lw’ekitani lusa. Abya akakwama Yesu yo hakuhi. Mubasonda erimuhamba.
52 Nikwa mwasigha olukimba lwiwe lw’ekitani, amatibita ndumbu.
53 Neryo mubatwala Yesu eyiri omuhereri mukulu. N’abahereri bakulu bosi n’Abakulu b’Abayahudi, n’abakangirirya b’Emighambo mubahindana haghuma.
54 Nikwa Petro mwamukwama enyuma iniane hali erihika omo kibugha ky’omuhereri mukulu. Neryo mwikala haghuma n’abaghombe b’enyumba inyanemwota oko muliro.
55 Neryo abahereri bakulu n’Esanhedrini* yosi babya ibanemusondekania emyatsi y’amabehi eyo bangahira oko Yesu batoke erimwita. Aliwe mubatamubanako omwatsi wosi-wosi.
56 Abandu bangyi babya bakamutsongera emyatsi y’amabehi. Aliwe emyatsi eyo muyatabya ikahambana.
57 N’abandi mubahangana n’erimubughako emyatsi y’amabehi bati:
58 “Mutwowa akabugha ati, ‘Ngendisambula ehekalu eyi eyo abandu bahimba, n’enyuma w’ebiro bisatu, ngendihimba eyindi eyitendihimbwa n’abandu.’”
59 Aliwe, nibya n’omo mwatsi oyu ebyo babya bakabugha mubitahambana.
60 Neryo omuhereri mukulu mwahangana omo kati-kati kabo amabulya Yesu ati: “Siwendisubirya? Wamabugha utiki oko myatsi eyo abandu aba bakakubughako?”
61 Aliwe mwabya bukutu kandi mwatasubirya ekyosi-kyosi. Kandi omuhereri mukulu mwatsuka erimubulya ati: “Nina we Kristo, Omughala w’oMungu Oyubuyirire?”
62 Yesu mwasubirya ati: “Inga nina ngye; kandi mukendilangira Omughala w’omundu inianikere oko byala by’amali by’obutoki kandi akasa n’ebitu by’ekyanya.”
63 Okw’ekyo omuhereri mukulu mwatula ekanzu yiwe n’eribugha ati: “Tukinalaghire oko bandi bimiri kwehi?
64 Mwamabiyowira ebyo amabugha. Nenyu mwamasoha mutiki?” Abosi mubamutswera bati atolere oluholo.
65 Neryo abaghuma ba kubo mubatsuka eritwira oko Yesu kw’amatandi. Mubaswika obusu bwiwe; bamamuha esyongume n’erimubwira bati: “Minyerera!” Abateya b’etribinali mubamumatula amakofi, neryo bamamutwala.
66 Petro inyane eyikwa omo kibugha, omughuma w’oko basika, abaghombe b’omuhereri mukulu, mwasa.
67 Abere abilangira Petro inyanemwota oko muliro, mwamutungerera n’eribugha ati: “Naghu wabya haghuma n’Omunazareti oyu, ye Yesu.”
68 Nikwa Petro mwayighana ati: “Sinimwasi n’ahake kandi sinyasi n’ebyo ukabugha.” Neryo mwahulukira ehihya oko bwingiriro.
69 Eyo, omusika, omughuma w’oko baghombe b’omuhereri mukulu, mwamulangira n’eribwira ababya bimeneho ati: “Oyu, ni mughuma wa kubo.”
70 Kandi Petro mwayighana. Neryo habere habihwa akatambi kake, ababya bimeneho nabo mubamubwira bati: “Oko kwenene, naghu uli mughuma wa kubo, kusangwa naghu uli Munya Galilaya.”
71 Nikwa Petro mwatsuka eritsuma n’erilapa ati: “Sinasi omulume oyo mukahula oyo.”
72 Neryo aho n’aho engoko-lume muyabika engendo y’akabiri. Na Petro mwibuka ebinywa ebyo Yesu amubwira ati: “Engoko-lume siyendibika kabiri utewanighana ngendo isatu.” Neryo mwakwa obulighe amatsuka erilira.
Amaelezo awehikwa
^ Kutse “Erikiruka.”
^ Kutse “ekihamya.”
^ Kutse “iniane oko mesa.”
^ Ulebaye endomeko B14.
^ Kutse “eribugha naye omo buhitane, erimukubungula.”
^ Ni kindu ky’obughuli ekikalua omo kitaka.
^ Kutse “ekihamya.”
^ Kutse “Erikiruka.”
^ Kutse “Erikiruka.”
^ Kutse “Erikiruka.”
^ Kutse “Erikiruka.”
^ Kutse “Erikiruka.”
^ Kutse “ekibindi.”
^ Kutse “olutehi.”
^ Kutse “esyongoni, emyutso mikuhi-mikuhi.”
^ Kutse “ngendilyatsirira.”
^ Kutse “Mukangirirya.”
^ Kutse “mwamulyatsirira.”
^ Kutse “esyongoni, emyutso mikuhi-mikuhi.”
^ Ulebaye amaana w’ebinywa.
