Engulu mbuya eyahandikawa na Mariko 15:1-47
15 Omo tututu,* abahereri bakulu haghuma n’abakulu b’Abayahudi n’abakangirirya b’Emighambo; ni bugha ambu Esanhedrini* yosi mubahindana haghuma. Neryo mubaboha Yesu bamamutwala ewa Pilato.
2 Neryo Pilato mwamubulya ati: “Uli Mwami w’Abayahudi kwehi?” Naye mwamusubirya ati: “Ighuwene-wene wamabibugha.”
3 Nikwa abahereri bakulu babya bakamutsongera emyatsi mingyi.
4 Neryo kandi Pilato mwamubulya ati: “Siwendisubirya kwehi? Langira ko banemukubughako emyatsi mingyi.”
5 Aliwe Yesu mwatasyamusubirya. Na Pilato mwasweka kutsibu.
6 Oko buli kiro kikulu, omuguvernere inyabeghere eribaboholera omundu w’omuliki mughuma oyo bamasaba.
7 Oko mughulu oyo, omo muliki mwabya omulume oyukahulawa mo Baraba. Abya abohirwe haghuma n’abandu abayisamambula oko butabali. Omughulu bayisamambula mubita abandu.
8 Neryo abandu mubasa n’eritsuka erisaba Pilato bati akolerebo ekyo abya abeghere erikolerabo.
9 Mwasubiryabo ati: “Mwanzire inababoholera Omwami w’Abayahudi kwehi?”
10 Kusangwa Pilato abya inyanasi ngoko eritsuro ryo riryaleka abahereri bakulu ibahotera Yesu.
11 Nikwa abahereri bakulu mubatsotsya abandu eribugha bati ababoholere Baraba omo mwanya wa Yesu.
12 Neryo Pilato mwasyabugha nabo n’eribulyabo ati: “Neryo Yesu oyo mukahula mo Mwami w’Abayahudi nimuyire liti.”
13 Kandi mubabirikira n’omulenge munene bati: “Ahanikawe oko muti!”
14 Aliwe kandi Pilato mwabulyabo ati: “Busanaki? Akolire kibi kyahi?” Nikwa mubabirikira kutsibu okw’aho bati: “Ahanikawe oko muti!”
15 Neryo Pilato akasonda eritsemesya abandu, mwababoholera Baraba. Neryo abere abihamula ati Yesu ahunzawe omo bikoba, mwabaha Yesu bayamuhanike oko muti.
16 Neryo abasuda mubatwala Yesu y’omo kibugha, ni bugha ambu ekyaghanda* ky’omuguvernere. Kandi mubahindania abasuda bosi bo haghuma.
17 Mubamwambalya olukimba lw’erangi y’olubono-bono.* Mubaluka embita y’amahwa n’erihirayo oko mutwe wiwe.
18 Kandi mubabya bakamubirikirako bati: “Kuti kwe Mwami w’Abayahudi!”
19 Mubabya bakamuswirya oko mutwe omo luseke n’erimutwirako amatandi. Kandi mubakukama embere siwe n’erimunamira.
20 Mubabya babimusekererya, mubamulusya olukimba lw’erangi y’olubono-bono* olo, bamamwambalya ekanzu yiwe. Neryo mubamutwala eriyamukongomerera oko muti.
21 Habya omundu we Kirene oyo wabya akalaba akalua emulongo. Erina riwe abya iyo Simoni, baba wa Aleksanda na Rufu. Neryo mubamukasa eriheka omuti* ogho Yesu akendihanikwako.
22 Neryo mubaleta Yesu ahakahulawa mo Golgota. Eribindula riti, “Ah’erikuha ry’omutwe.”*
23 Neryo mubasonda erimuha edivai eyitulungenemo edawa eyikatamiraya, ey’amane-mane. Nikwa mwaghanayo.
24 Neryo mubamukongomerera oko muti. N’enyuma syaho mubakola obukanga bakaghaba esyongyimba siwe, batoke eriminya nga nindi yukendimya olukimba lwahi.
25 Yabya nga saa tatu* omughulu bakongomerera Yesu y’oko muti.
26 Ebinywa ebyo babya bakamuhandikirirya ebyabya oko kibenete, byabya bibughire biti: “Omwami w’Abayahudi!”
27 Kandi mubahanika abibi* babiri hakuhi naye; omughuma oko luhande lwiwe lw’amali n’oghundi oko lw’amalembe.
28 * ——
29 N’ababya bakalabaho mubabya bakatsingya emitwe yabo n’eritsuma Yesu bati: “Si haho! Iwe wabya ukabugha uti wanganasambula ehekalu n’erihimbayo omo biro bisatu,
30 lero uyilamaye, ukime oko muti!”*
31 Abahereri bakulu n’abakangirirya b’Emighambo, nabo babya bakamusekererya bati: “Mwalamya abandi, nikwa syangatoka eriyilamya!
32 Lero Kristo Omwami we Israeli akime oko muti,* tulangire! Neryo tukendimwikirirya.” Nibya n’abahanikawa oko muti hakuhi naye mubamusekererya batya.
33 Yabere yabya saa sita,* ekihugho kyosi ekyo mukyabyamo omwirimya erihika oko saa tisa.*
34 N’oko saa tisa,* Yesu mwalaka ati: “Eli, Eli, lamasabaktani?” Eribindula liti: “Mungu waghe, Mungu waghe, busanaki wabirinzighania?”
35 N’abaghuma b’oko babya bimene hakuhi babere babyowa ekyo, mubabugha bati: “Mulebaye! Akabirikira Eliya.”
36 Neryo omundu mwatibita amahira ekivuta* ky’omo tsaghu-tsaghu y’edivai amahirakyo oko luseke n’erimuhayo ati anywe. Mwabugha ati: “Tusamalire. Tulebaye Eliya ng’anemwendyasa akasyamulusya oko muti.”
37 Nikwa Yesu mwalaka omo mulenge muli, neryo amahola.
38 N’erido ry’ehekalu* mulyatulika mo bihande bibiri; eritsuka endata erihika eyikwa.
39 Omughulu omukulu w’abasuda oyo wabya imene hakuhi na Yesu alangira ebyabya Yesu akatwa omutima, mwabugha ati: “Kwenene omulume oyu alue Mughala w’oMungu.”
40 Habya n’abakali ababya bakasamalira ibanimene hali. Oko bakali abo habya Salome, Maria Magdalena, haghuma na Maria mama wa Yose bana Yakobo Mulere.
41 Abakali aba babya bakakwama Yesu n’erimuwatikya omughulu abya e Galilaya. Habya n’abandi bakali bangyi abahetukira e Yerusalema haghuma naye.
42 Neryo kundi bwabya ibwabiribya igholo-gholo, kandi kusangwa kyabya kiro ky’Eriteghekania, ni bugha ambu omo milaliryo y’Esabato,
43 Yozefu we Arimatea mwasa. Abya mulume oyusikibwe omo kyaghanda kikulu ky’Abayahudi. Naye abya akalindirira Obwami bw’oMungu. Mwayiha obulume-lume, amaya eyiri Pilato amamusaba omubiri wa Yesu.
44 Nikwa Pilato mwanza eriminya Yesu ng’anabirihola. Neryo mwabirikira omukulu w’abasuda amamubulya Yesu ng’anabirihola.
45 Neryo omukulu w’abasuda abere amubwira ngoko Yesu abirihola, mwalighira Yozefu y’omubiri oyo.
46 Yozefu abere abighula olukimba lw’ekitani ekyuwene n’erikimya Yesu y’oko muti, mwamulingira omo kitani ekyuwene ekyo n’erimuhira omw’isinda eyabatsawa omo lukuka. Neryo mwakumbaghalirya eribwe oko bwingiriro bw’eyisinda.
47 Aliwe Maria Magdalena na Maria mama wa Yose mubasighala bakalebya aho Yesu amahirwa.
Amaelezo awehikwa
^ Kutse “emitsange.”
^ Ulebaye amaana w’ebinywa.
^ Kutse “ekikali.”
^ Kutse “omunyama.”
^ Kutse “erangyi y’omunyama, pourpre.”
^ Ulebaye amaana w’ebinywa.
^ Kutse “Ah’erihanga.”
^ Kutse 9:00.
^ Kutse “abarahi, abanyeyi.”
^ Ulebaye endomeko A3.
^ Ulebaye amaana w’ebinywa.
^ Ulebaye amaana w’ebinywa.
^ Kutse 12:00.
^ Kutse 15:00.
^ Kutse 15:00.
^ Kutse “esipongyi, embughuma.”
^ Erido eri irakaghaba Ahabuyirire n’Ahabuyirire Kutsibu.
