Engulu mbuya eyahandikawa na Mariko 2:1-28
2 Enyuma w’ebiro bike, kandi Yesu mwahika e Kapernaumu. N’abandu mubowa ngoko abirihika eka.
2 Neryo abandu bangyi mubahindana omo nyumba eyo abyamo; nibya n’oko lukyo isihakiri omwanya. Neryo Yesu mwatsuka eribakangirirya.
3 Neryo mubamuletera omundu oyubasireko ebitsuko, abandu bani ibanamuhekire.
4 Nikwa mubatatoka erimukolya ahali Yesu, kundi omo nyumba mwabya abandu bangyi. Neryo mubasambula oko lutwe lw’enyumba aho Yesu abya. Babere babibanaho omwanya, mubandaghalyaho omundu oyo iniane oko kakingo.
5 Yesu abere abilangira obwikirirya bwabo, mwabwira oyubasireko ebitsuko oyo ati: “Mwana waghe, ebibi byaghu byamaghanyirwa.”
6 Aliwe abakangirirya balebe b’Emighambo ababya bikereho babya ibanemughanirya omo mitima yabo bati:
7 “Busanaki omulume oyu akabugha atya? Akatsuma oMungu. Nindi yo wangaghanyira amalolo ate iyo n’oMungu musa?”
8 Aliwe Yesu mwalw’iniaminya omo mutima wiwe ebyo bakalengekanaya. Neryo mwabwirabo ati: “Kundiki mukalengekanaya emyatsi eyi omo mitima yenyu kwehi?
9 Eribwira oyubasireko ebitsuko niti, ‘Ebibi byaghu byamaghanyirwa,’ kutse eribugha niti, ‘Hangana, uheke engyingo yaghu ughende,’ ekyolobire oko kindi ky’ekyahi?
10 Nikwa nyanzire imwaminya ngoko Omughala w’omundu awite oko kihugho kw’ehamuli y’erighanyira amalolo.” Neryo Yesu mwabwira omulume oyubasireko ebitsuko ati:
11 “Ngakubwira niti, Hangana uheke engyingo yaghu ughende eka.”
12 Neryo omulume oyo mwahangana, amalw’inyimya engyingo yiwe n’erihuluka omo meso wabo abosi. Neryo abosi mubasweka kutsibu. Kandi abosi mubapipa oMungu bati: “Sitwetwatalola oko kindi ekiri ng’eki.”
13 Kandi Yesu mwasuba oko musike w’engetse ye Galilaya. N’abandu bangyi mubasa eyo ali. Neryo mwatsuka erikangiriryabo.
14 Neryo inianemulaba, mwalangira Lawi mughala wa Alfayo, inianikere aho bakalihira ebitasi.* Neryo mwamubwira ati: “Unikwame.” Neryo mwahangana n’erimukwama.
15 Enyuma syaho, Yesu inianemulya* akalyo omo nyumba ya Lawi, abalihisya b’ebitasi* bangyi n’abakola-nabi mubalya haghuma naye n’abigha biwe; kusangwa abangyi ba kubo mubamukwama.
16 Nikwa abakangirirya b’Emighambo ababya Bafarisayo babere balangira ngoko anemulya haghuma n’abakalihisaya ebitasi* n’abakola-nabi, mubabulya abigha biwe bati: “Busanaki akalya haghuma n’abakalihisaya ebitasi* n’abakola-nabi kwe?”
17 Yesu mwabya abyowa eki, mwababwira ati: “Abakalire sibalilagha oko munganga; nikwa abalwere bo bakamulaghako. Mundasa erisyabirikira abatunganene, nikwa nasa erisyabirikira abakola-nabi.”
18 Abigha ba Yohana n’Abafarisayo ibakakola amafungo. Neryo mubasa eyiri Yesu n’erimubulya bati: “Busanaki abigha ba Yohana n’abigha b’Abafarisayo bakakola amafungo, aliwe abigha baghu sibalikola amafungo kwehi?”
19 Neryo Yesu mwabasubirya ati: “Abira b’iba w’omulunga* banatolere erikola amafungo ibane n’iba w’omulunga kwe? Sibangakola amafungo ibane n’iba w’omulunga.
20 Aliwe omughulu akendisyahika, iba w’omulunga iniabya isyakiri haghuma nabo.* Neryo oko kiro ekyo bakendisyakola amafungo.
21 Sihali omundu oyo wangasonera ekibandiko ky’olukimba* luhya-luhya oko lukimba lwa kera. Amabikola atya, ekibandiko ky’olukimba luhya-luhya ikikenditula olukimba lwa kera; nalo ilukenditulika kutsibu kulenga ngoko lulue.
22 Kandi sihali oyukabika edivai nyihya-nyihya omo bindu by’engobi ebya kera. Amabikola atya, edivai iyikenditula ebindu by’engobi ebyo, neryo edivai n’ebindu by’engobi ebyo ibikendihera. Nikwa edivai nyihya-nyihya ikabikawa omo bindu by’engobi bihya-bihya.”
23 Neryo omughulu Yesu abya akalaba omo malima w’engano omo kiro ky’Esabato, abigha biwe mubatsuka eritwa oko makundi w’engano ibanemughenda.
24 Neryo Abafarisayo mubabugha na Yesu bati: “Talebya! Busanaki bakakola ekyo Emighambo ikaghanaya erikola ekiro ky’Esabato?”
25 Nikwa mwabasubirya ati: “Simwemwatasoma ekyo Daudi akola omughulu abya omo bwagha, omughulu iye n’abandu ababya naye bakwa enzala?
26 Simwemwatasoma oko mwatsi w’omuhereri mukulu ye Abiatari? Ngoko Daudi mwingira omo nyumba y’oMungu n’erirya emikati eyibuyirire?* Kandi ngoko mwaha kuyo kw’abalume ababya naye? Erikwamana n’Emighambo isihali omundu oyuhamulirwe erirya oko mikati eyo; abahereri basa bo babya bahamulirwe.”
27 Neryo mwabwirabo ati: “Esabato yahirawaho busana n’abandu; butsira abandu busana n’Esabato.
28 Neryo Omughala w’omundu ni Mukama w’Esabato nibya.”
Amaelezo awehikwa
^ Kutse “omusolo.”
^ Kutse “iniane oko mesa.”
^ Kutse “abasolesya.”
^ Kutse “abasolesya.”
^ Kutse “abasolesya.”
^ Kutse “omuheruki.”
^ Kutse “inialusibwa kubo.”
^ Kutse “olukimba lw’eryambalira oko lundi.”
^ Kutse “emikati y’erikangania.”
