Engulu mbuya eyahandikawa na Mariko 3:1-35
3 Kandi Yesu mwingira omo sinagogi.* Mwabya imune omulume ow’ebyala ebilehemire.*
2 Abandu mubatungerera Yesu bakalebya ng’anemwendilamya omundu oyo omo kiro ky’Esabato, bakasondya eky’erimutsongeramo.
3 Mwabwira omulume ow’ebyala ebilehemire* oyo ati: “Hangana, asa omo kati-kati.”
4 Neryo mwababulya ati: “Omo Mighambo kinahamulirwe ekiro ky’Esabato erikola ekibuya kutse erikola ekibi; erilamya engebe* kutse eriita?” Aliwe mubabya bukutu.
5 Yesu mwatimbya ameso wiwe akabasamalira inianahitene, kandi iniabiribya n’obulighe bunene busana n’emitima yabo eyikalire. Neryo mwabwira omulume oyo ati: “Lingola ebyala byaghu.” Naye mwalingolabyo. Neryo ebyala biwe mubyalama.
6 Neryo Abafarisayo mubahuluka; mubalw’ibaya embita n’abandu b’omo kyama kya Herode ey’eriita Yesu.
7 Nikwa Yesu mwaghenda oko musike w’engetse n’abigha biwe. N’abandu bangyi erilua e Galilaya ne Yudea mubamukwama.
8 Nibya n’abandu bangyi erilua e Yerusalema, e Idumea n’oko ghundi musirya we Yordani, n’ab’ebwanga e Tiro ne Sidoni babere babyowa emyatsi mingyi eyo abya akakola, mubasa eyo ali.
9 Kandi Yesu mwabwira abigha biwe ati bamuteghekaniraye obwato buke, abandu bakasyamuhatatania.
10 Kusangwa mwalamya abandu bangyi, abosi ababya n’amakoni awakala-kalire mubamutimbako bakasonda erimutulako.
11 Nibya n’ababyako ebirimu bibi, ehosi eyo babya bakamusunga, ibakawa ahisi embere siwe n’erilaka bati: “Uli Mughala w’oMungu.”
12 Aliwe ngendo nyingyi Yesu iniakabakongomerera ati isibamuminyikalaya.
13 Yesu mwahetukira oko kitwa, amabirikira abandu abo asombola; nabo mubasa eyo ali.
14 Mwasombola abandu 12 amabahula mo bakwenda. Mwabasombola eribya bakaghenda haghuma naye n’eribatuma eriyatula engulu
15 n’eribaha ehamuli y’erihigha esyombinga.
16 Neryo abandu 12 abo asombola, habya Simoni oyo Yesu ahula mo Petro.
17 Yakobo omughala wa Zebedayo, na Yohana mughala wabo Yakobo (mwabaha erina rya Boanerge, ni bugha ambu “abaghala b’omulumo”).
18 Andrea, Filipo, Bartolomayo, Matayo, Toma, Yakobo mughala wa Alfayo, Tadayo, Simoni Mukanani,
19 na Yuda Iskariote oyo wahotera Yesu.
Neryo Yesu mwingira omo nyumba.
20 Kandi abandu bangyi mubamutimbako; nibya Yesu n’abigha biwe mubatasunga endambi y’erirya akalyo.
21 Aliwe abatunga biwe babere babyowa ekyo, mubaghenda bati bakayamuhamba; kusangwa babya bakabugha bati: “Omutwe wiwe abiritsanda.”
22 N’abakangirirya b’Emighambo abalua e Yerusalema, mubabya bakabugha bati: “Aliko e Belzebuli,* kandi akahigha esyombinga omo maka w’omutabali w’esyombinga.”
23 Neryo Yesu mwabya abibirikirabo aho ali, mwabugha nabo omo misyo ati: “Sitani angatoka ati eritibita oko Sitani?
24 Obwami bwamabighabana, obwami obo sibwangahangana.
25 N’enyumba yamabighabana, enyumba eyo siyangatoka erihangana.
26 Na Sitani amabilwa n’iye iyuwene-wene isyangatoka erihangana, aliwe iniakendiwa.
27 Sihali omundu oyo wangatoka eringira omo nyumba y’omundu w’amaka n’eriba ebindu biwe atitatsuka eriboha omundu w’amaka oyo; iniakenditsuka erimuboha imwatoka eriheka ebindu biwe.
28 Oko kwenene ngababwira, abandu bakendisyaghanyirwa emyatsi yosi; nomo bangabya ibakakola ebibi bya muhanda wahi, kutse eribugha ebitsumi bya muhanda wahi.
29 Aliwe oyukatsuma ekirimu kibuyirire, syendisyaghanyirwa n’ahake. Nikwa olubanza lw’erilolo liwe ni lwa kera na kera.”
30 Abugha atya kusangwa abandu babya bakabugha bati aliko ekirimu kibi.
31 Neryo abaghala babo na mama wiwe mubasa, bamimana ehihya. Mubatuma omundu bati ayamubirikire.
32 Abandu bangyi ibanikere kandi ibanamutimbireko, mubabugha na Yesu bati: “Mama waghu n’abaghala benyu banimene ehihya, banemukusondya.”
33 Nikwa mwabasubirya ati: “Mama waghe n’abaghala betu ni bahi?”
34 Neryo mwasamalira abandu ababya bikere ibanamutimbireko, n’eribugha ati: “Mama waghe n’abaghala betu b’aba.”
35 Omundu wosi-wosi oyukakola erisonda ry’oMungu, oyo yo mughala wetu, mwali wetu, na mama waghe.”
Amaelezo awehikwa
^ Ulebaye amaana w’ebinywa.
^ Kutse “ebyala ebibasire.”
^ Kutse “ebyala ebibasire.”
^ Kutse “obuyingo.”
^ Erina erikakolesibawa oko Sitani.
