Engulu mbuya eyahandikawa na Mariko 4:1-41
4 Kandi Yesu mwatsuka erikangirirya oko musike w’engetse; n’abandu bangyi mubahindana aho ali. Neryo mwasambira omo bwato n’eryikala mubo, amaya hali oko musike w’engetse. Nikwa abandu bosi babya hakuhi n’engetse oko musike.
2 Neryo mwatsuka erikangiriryabo emyatsi mingyi omo misyo. Omughulu abya akakangirirya, mwabwirabo ati:
3 “Muhulikirire! Omulimi mwayabiba embuto.
4 Omughulu abya akabiba, esindi mbuto musyatoghera oko musike w’enzira, n’esyonyunyu musyasa syamalyasyo.
5 Esindi mbuto musyatoghera oko kitaka ky’amabwe ahate omutaka munene; neryo kundi sihabya mutaka munene musyalw’isyalasa.
6 Nikwa eryuba ryabere ryakola mulyahisyasyo, nasyo musyuma kundi syabya isisiwite emirihi.
7 Esindi mbuto musyatoghera omo mahwa. Neryo amahwa mwalasa amaleka isyakusa; neryo musitahetya.
8 Nikwa esindi mbuto musyatoghera oko mutaka oghuwene. Neryo musyalasa, syamabogha-bogha. Musyatsuka erihetya. Musyasako esindi mbuto; esindi ngendo 30, esindi ngendo 60, n’esindi ngendo 100.”
9 Yesu mwasyabugha ati: “Oyuwite amatwi w’eryowa, owe.”
10 Neryo omughulu abya iyuwene, abigha ababya naye haghuma n’abakwenda 12 mubatsuka erimubulya oko misyo eyo.
11 Mwabwirabo ati: “Inywe mwabirilighirwa eriminya ekumbo* eyibuyirire y’Obwami bw’oMungu. Nikwa oko bandu b’ehihya, emyatsi yosi yiri omo misyo.
12 Neryo nomo bangasamalira; ibakendisamalira aliwe isibendilangira. Kandi nomo bangahulikirira; ibakendihulikira aliwe isibendyowa, kandi isibendyowa nga bikasonda eribugha bitiki. Kandi sibangabinduka oMungu atoke eribaghanyira.”
13 Kandi Yesu mwababwira ati: “Mwamabya isimwetowa omusyo ono, mukendisyowa eyindi misyo yo muti?
14 “Omubibi w’embuto akabiba ekinywa.
15 Abali oko musike w’enzira aho ekinywa kyabibawa, ba bandu abakowa ekinywa, neryo Sitani inialw’iniasa n’erikula ekinywa ekyabibawa omo mitima yabo.
16 Embuto eyabibawa oko kitaka ky’amabwe, kye kinywa ekyabibawa omo mitima y’abandu. Abandu aba bakabya babyowa ekinywa, bakalw’ibalighakyo n’obutseme.
17 Aliwe kundi bakabya isibawite emirihi, bakalola embere omo mughulu muke. Neryo omughulu amaghali kutse eryendereribwa bikabahikira busana n’ekinywa, bakalu ibatwikala.*
18 Hane n’embuto eyabibawa omo mahwa. Aba, ba bandu abakowa ekinywa;
19 nikwa erihangya-hangya ly’omo kihugho* kino n’obutebya bw’obuteke, n’esyongumbu sy’ebindi bindu, bikingira neryo ibyaleka ekinywa ikyakusa; neryo ekinywa ekyo sikyehetaya.
20 N’embuto eyabibawa oko mutaka oghuwene, b’abakowa ekinywa n’eryangirirakyo ndeke; n’erihetya ngendo 30, 60, na ngendo 100.”
21 Kandi mwabugha nabo ati: “Etala ikanahirawa omo kitiri kutse emwisi w’engyingo kwehi? Ikahirawa ahayisumbire. Ko bite bitya?
22 Kundi sihali ekindu ekibisamire ekitendisyabisulwa, kutse sihali ekindu ekyabiribiswa ndeke, ekitendisyalangirika ndeke.
23 Owosi-wosi oyuwite amatwi w’eryowa, owe.”
24 Kandi Yesu mwabwirabo ati: “Muhulikirire ndeke ebyo mukowa. Olulengo olo mukalengamo, lo munemwendisyalengerwamo. Mukendisyahabwa n’ebingyi okw’aho.
25 Kusangwa oyuwite akendisyahabwa ebindi, nikwa oyutawite akendisyasaghulwa n’ekyo awite.”
26 Kandi Yesu mwabugha ati: “Obwami bw’oMungu buli ng’omughulu omundu akabiba embuto.
27 Omo kiro akaghotsera n’engyakya iniabuka; n’embuto ikalasa n’erikula, syaliminya ng’ikakula yiti.
28 Ekitaka kikaleka embuto eyo iyalasa n’eryera; erimbere emighera ikahuluka, enyuma syaho iyasohola, n’enyuma w’aho amakundi awerire.
29 Embuto eyi ikabya yabyera, akatwayo omo mughusu kundi omughulu w’erighesa iniabirihika.”
30 Kandi Yesu mwabugha ati: “Twangasosekania Obwami b’oMungu naki? Kutse twangakolesya omusyo wahi erikania kubo.
31 Buli ng’embuto y’eharadali. Omughulu yabibawa, yabya iyo nge oko syombuto syosi esiri oko kihugho.
32 Nikwa ikabya yabibibwa, ikakula n’eribya muti munene kwilaba eyindi miti yosi y’esyonyinyi, n’eribya n’emitahi minene-minene; neryo esyonyunyu sy’omo kyanya sikatoka eribana obwikalo omo kitsutsu kyagho.”
33 Yesu mwakaniryabo ekinywa akakolesya emisyo mingyi eyiri ng’eyo. Mwakaniryabo erikwamana n’ebyo bangatoka eryowa.
34 Inyakakanaya nabo omo misyo misa-misa; aliwe iniakakumbulira abigha biwe b’emyatsi yosi omughulu ali nabo ibobene.
35 Ekiro ekyo omw’igholo-gholo, Yesu mwabwirabo ati: “Tusokere oko ghundi musirya.”
36 Neryo babere babibwira abandu bati baghende, mubalw’ibaheka Yesu y’omo bwato. N’awandi mato mwaghenda haghuma naye.
37 Neryo ekihunga kinene ekikalire mukyabuhirira omo ngetse. N’ebisunda mubyabya bikayihumanga oko bwato, neryo obwato mubwasonda eryusulamo amaghetse.
38 Aliwe Yesu abya enyuma omo bwato inianaghotsere oko kiseghemero. Neryo abigha mubamubukya n’erimubwira bati: “Mukangirirya sighulangire ngoko tukahwa?”
39 Neryo Yesu mwahangana amahayira ekihunga n’eribwira engetse ati: “Huna! Ubye bukutu!” Ekihunga mukyumbya. Neryo muhabya eritulera linene.
40 Neryo mwababwira ati: “Mukasagha busanaki. Simulimwanabya n’obwikirirya?”
41 Nikwa mububaha kutsibu n’eribwirana bati: “Oyu nindi kwe? Nibya ekihunga n’engetse bikamwowa.”
