Engulu mbuya eyahandikawa na Mariko 5:1-43
5 Neryo mubahika oko ghundi musirya w’engetse omo kiharo ky’Abagerase.
2 Yesu abere abinalua omo bwato, omulume oyuliko ekirimu kibi mwahindana naye akalua eyiri esisinda.
3 Omulume oyo abya ikere eyiri amasinda. Erihika omughulu oyo habya isihehatabya omundu oyo wangatoka erimuboha ndeke, nibya n’omo munyororo.*
4 Kangyi-kangyi ibakamuboha omo miseghe n’omo minyororo;* aliwe iniakatsutsanga eminyororo* eyo n’emiseghe eyo. Kandi sihabya omundu oyo wangamughondya.
5 Kandi omo musibo n’omo kiro iniakabya inianemwamirya eyiri esisinda n’oko bitwa n’eriyihutangalya omo mabwe.
6 Nikwa abere alangira Yesu iniane hali, mwatibita eyo ali n’eryunama embere siwe.
7 Neryo mwabirikira omo mulenge muli ati: “Ukanisondakoki kwe Yesu Mughala w’oMungu w’Endata Kutsibu? Ngakusaba ulahiraye embere sy’oMungu ngoko siwendinyaghalya.”
8 Kusangwa Yesu abya akabwira ekirimu ekyo ati: “Ulua omo mundu oyo, iwe kirimu kibi.”
9 Nikwa Yesu mwabulyakyo ati: “Iwe ndi?” Nakyo mukyamusubirya kiti: “Ingye Lejioni,* kusangwa tuli bangyi.”
10 Kandi mwalemba-lemba Yesu ati syahighe ebirimu ebyo erilua omo kihugho ekyo.
11 Neryo habya ekihangulo kinene ky’esyongulube isinemulira oko kitwa.
12 Neryo ebirimu mubyamulemba-lemba biti: “Utughuse omo syongulube, twingire musyo.”
13 Naye mwalighirabyo. Neryo ebirimu bibi ebyo mubyalua omo mundu oyo n’eriyingira omo syongulube. Neryo ekihangulo kyosi mukyatibita oko mukingyi owasenzere, kyamaya omo ngetse. Syabya ngulube nga 2 000. Musyahwera omo ngetse.
14 Nikwa abalisya basyo mubatibita, n’eriyatula omwatsi oyo w’omo muyi, n’omo kihugho ekyo. Abandu mubasa bakasyalebya ekyamabya.
15 Neryo mubahika ahali Yesu bamalola oko mulume oyo wabyako esyombinga. Omulume oyo, oyo wabyako omulondo* w’esyombinga abya inianikere, inianambite kandi iniabiribya n’obulengekania obuwene. Neryo mububaha.
16 Abandu abalangira ebyabya, mubakaniryabo ngoko emyatsi yaghenda. Mubakaniryabo omwatsi w’omulume oyo wabyako esyombinga n’ow’esyongulube.
17 Neryo mubatsuka erilemba-lemba Yesu bati alue omo kihugho kyabo.
18 Omughulu Yesu ingira omo bwato, omulume oyo wabyako esyombinga, mwamulemba-lemba ati akaghenda haghuma naye.
19 Nikwa Yesu mwatamulighira. Aliwe mwamubwira ati: “Ughende eka eyiri abatunga baghu. Uyabakaniraye ebyosi ebyo Yehova* abirikukolera n’obughanyiri obo abirikukangania.”
20 Omulume oyo mwaghenda n’eritsuka eritula omo Dekapoli* yosi emyatsi yosi eyo Yesu alyamukolera. N’abandu bosi mubasweka kutsibu.
21 Yesu abere abitasyasuba oko ghundi musirya w’engetse omo bwato, abandu bangyi mubahindana aho ali oko musike w’engetse.
22 Ye Yairo omughuma w’oko bakulu b’esinagogi* mwasa. Abere abilangira Yesu munama embere sy’ebisando biwe.
23 Mwalemba-lemba Yesu ngendo nyingyi ati: “Mwali waghe atohire. Kisi wase umuhireko ebyala byaghu atoke erilama n’eribyaho.”
24 Yesu mwaghenda haghuma naye. N’abandu bangyi kutsibu mubamukwama n’erimuhatatania.
25 Nikwa habya omukali oyo wabya iniamabibugha emyaka 12 inianakwire obukoni bw’eriluako omusasi.
26 Abya iniabiryaghalwa kutsibu omo byala by’abanganga bangyi, kandi iniabirikolesya ebindu biwe byosi; nikwa isyalitalama, aliwe iniakalola embere erilwala kutsibu.
27 Omughulu owa engulu ya Yesu, mwayihatatania omo bandu bangyi ababya enyuma sya Yesu n’eritula oko lukimba* lwiwe.
28 Kusangwa abya inianemuyibwira omo mutima ati: “Namabitatula n’oko lukimba lwiwe lisa, ingendilama.”
29 Neryo aho-n’aho erisenda riwe ry’omusasi muryumbya. Neryo mwaminya omo mubiri wiwe ngoko amabilamibwa oko ndwala yiwe eyikalire.
30 Yesu mwalw’iniaminya ngoko obutoki bwamamuluako. Neryo mwabindukira abandu n’eribulya ati: “Nindi yo wamatula oko syongyimba syaghe?”
31 Nikwa abigha biwe mubamusubirya bati: “Unalangire ngoko abandu banakuhatatenie, kandi ukabulaya uti, ‘Nindi yo wamanitulako?’”
32 Aliwe Yesu mwatimbya ameso akalebya nga nindi yo wamamutulako.
33 Nikwa omukali oyo iniabiriminya kw’abirilama, mwasa inianemutitimana n’eryubaha. Mwawa embere sya Yesu n’erimubwira ekwenene yosi.
34 Yesu mwamubwira ati: “Mwali waghe, obwikirirya bwaghu bwamabikulamya. Ughende buholo, ulamibawe oko ndwala yaghu eyikalire.”
35 Yesu iniakinabugha, abandu balebe erilua ew’omukulu w’esinagogi* mubahika. Mubamubwira bati: “Mwali waghu abirihola. Ukinakenderaya Omukangirirya yo busanaki?”
36 Nikwa Yesu mwowa ebyo bakabugha. Neryo mwabwira omukulu w’esinagogi* ati: “Isighubaha.* Ekighuma kisa ubye n’obwikirirya.”
37 Neryo mwatalighira omundu wosi wosi erimukwama. Mwaghenda na Petro, Yakobo, na Yohana mughala wabo Yakobo basa.
38 Neryo mubahika ew’omukulu w’esinagogi.* Na Yesu mwalangira ngoko hane olukanda n’abandu bakalira n’erisusumana kutsibu.
39 Yesu abere abingira omo nyumba, mwabugha nabo ati: “Mukalira busanaki n’eribuya olukanda losi olu? Omwana syaholire, nikwa aghotsere.”
40 Abandu babere bowa ebinywa ebyo mubamusekererya. Aliwe abere abibwira abandu ati bahulukire ehihya, mwaghenda na baba w’omwana na mama wiwe n’abigha ababya naye. Neryo mwingira omo nyumba aho mwana abya.
41 Neryo mwahamba omwana y’oko byala n’erimubwira ati: “Talita kumi,” eribindula riti: “Mumbesa ngabugha naghu, hangana!”
42 Aho-n’aho omusika mwahangana n’eritsuka erighenda. (Abya w’emyaka 12.) Neryo mubasweka n’eritsema kutsibu.
43 Nikwa Yesu mwakongomererabo ngendo-ngendo ati isibabwira omundu wosi-wosi. Kandi mwabugha ati bahe omusika oyo y’akalyo.
Amaelezo awehikwa
^ Kutse “amahulula.”
^ Kutse “amahulula.”
^ Kutse “amahulula.”
^ Kutse “omulondo.”
^ Kutse “lejioni.”
^ Ulebaye endomeko A5.
^ Kutse “Ekiharo ky’Emiyi Ikumi.”
^ Ulebaye amaana w’ebinywa.
^ Kutse “olukimba lw’eryambalira oko lundi.”
^ Ulebaye amaana w’ebinywa.
^ Ulebaye amaana w’ebinywa.
^ Kutse “uleke eryubaha.”
^ Ulebaye amaana w’ebinywa.
