Engulu mbuya eyahandikawa na Mariko 7:1-37
7 Neryo Abafarisayo n’abakangirirya balebe b’Emighambo abalua e Yerusalema mubahindana ahali Yesu.
2 Mubalangira abigha biwe balebe ibanemulya omo byala ebitunda-tundire, ni bugha ambu isibanabire oko byala.
3 (Kusangwa Abafarisayo n’Abayahudi bosi, embere balye bakanaba oko byala erihika oko ngokola bakakwamirira emitsye y’abandu ba kera.
4 Kandi omughulu bakalua omo soko* bakatsuka erinaba imo balya. Kandi hane eyindi mitsye mingyi eyo bahabawa eyo bakamakirira; ng’eribatisya esyokopo, amalegha, n’ebindu by’ekwivre.*)
5 Neryo Abafarisayo n’abakangirirya b’Emighambo aba mubabulya Yesu bati: “Busanaki abigha baghu sibalisikaya emitsye y’abandu ba kera, aliwe bakalya omo byala ebitunda-tundire?”
6 Mwabasubirya ati: “Inywe batebya! Isaya mwababughako ndeke-ndeke omo buminyereri ngoko kisakire kiti, ‘Abandu aba bakanyisikaya omo buno* buyira, nikwa emitima yabo yiri hali okw’ingye.
7 Bakaniramaya buyira; kusangwa bakakangiriraya ebihano by’abandu nga ni bihano by’oMungu.’
8 Mukaleka ebihano by’oMungu, imwamakirira emitsye y’abandu.”
9 Kandi mwababwira ati: “Omo menge mukalekeranaya ebihano by’oMungu mutoke erikwamirira emitsye yenyu.
10 Ng’eky’erilebiryako Musa mwabugha ati, ‘Usikaye baba waghu na mama waghu,’ kandi ati, ‘Oyukatsuma baba wiwe kutse mama wiwe litolere iniakwa.’
11 Nikwa inywe mukabugha muti, ‘Omundu amabibwira baba wiwe kutse mama wiwe ati: “Ekyosi-kyosi ekyo nangakuwatikyamo, ni korbani (ni bugha ambu ekindu ekyabirihererwa oko Mungu).”’
12 Mukaleka inyatawatikya baba wiwe kutse mama wiwe.
13 Busana n’ekyo mwabirilekerania ekinywa ky’oMungu busana n’emitsye yenyu eyo mwabirihiraho. Kandi mukakola emyatsi mingyi eyiri ng’eyi.”
14 Yesu abere abibirikira abandu aho ali, mwababwira ati: “Munihulikirire inywe bosi, mutoke eryowa enzumwa y’ebyo ngabugha.
15 Ekindu ekikingira omo mundu kyo kitemutsandaya; nikwa ebikamuluamo byo bikamutsandaya.”
16 * ——
17 Yesu mwabya abisigha abandu n’eringira omo nyumba, abigha biwe mubatsuka erimubulya oko mufano* oyo.
18 Neryo mwabwirabo ati: “Nenyu mukinahumene ng’abo? Simwasi ngoko sihali ekindu ekikingira omo mundu ekyanga mutsandya?
19 Kusangwa kikabya kingira, sikiringira omo mutima wiwe. Nikwa kikingira omo nda n’eritwangana.” Aho mwakangania ngoko ebyalya byosi byowene.
20 Kandi mwabugha ati: “Ekikalua omo mundu kyo kikamutsandaya.
21 Kusangwa omo mitima y’abandu mo mukalua amalengekania mabi, erisingira,* eriba, eriita,
22 amaraghane, omururu, emikolere mibi, amatebo, emighendere mitya-mitya, eritsuro,* ebitsumi, emiyiheko, n’obukiru.
23 Emyatsi yosi eyi ikalua omo mundu, nayo yo yikamutsandaya.”
24 Mwalua aho, amaya omo kiharo kye Tiro ne Sidoni. N’eyo mwingira omo nyumba, kandi mwatanza omundu akaminya. Aliwe mwatatoka eriyibisa.
25 Aho-n’aho, omukali oyo wabya n’omusika mulere oyo wabyako ekirimu kibi mwowa engulu ya Yesu. Neryo mwasa amakukama embere sy’ebisando biwe.
26 Omukali oyo abya Mugiriki owe kihanda ky’Abasirifoinike. Kandi mwahatikana Yesu ati ahighe embinga eyabya oko mwali wiwe.
27 Aliwe Yesu mwabwira omukali oyo ati: “Uleke abana batsuke eryughuta. Kusangwa siryowene erimya akalyo k’abana n’erighusirako ebibwana.”*
28 Omukali oyo mwamusubirya ati: “Ko bine bitya Mukama. Aliwe n’ebibwana* ebiri emwisi w’esyomesa bikanalya oko mitahangukirya eyo abana bakatoghongaya.”
29 Yesu mwabya abyowa ekyo, mwabwira omukali oyo ati: “Kusangwa wamabugha utya, ughende. Embinga yamabilua oko mwali waghu.”
30 Omukali oyo mwasuba eka wiwe. Neryo mweya omwana inyanayilambikire oko ngyingo n’embinga iyabirimuluako.
31 Yesu mwalaba e Sidoni akalua omo kiharo kye Tiro. Neryo mwalaba e Dekapoli* akaya ebwanga bw’engetse ye Galilaya.
32 Neryo mubamuletera omutsiha kandi oyo watabya asi eribugha ndeke. Kandi mubamulemba-lemba bati amuhireko ebyala.
33 Neryo mwamuhengeka, amamutwala ahate abandu. Mwahira eminwe yiwe y’omo matwi w’omulume oyo. Kandi abere abitwa amatandi, mwatula oko lulimi l’omulume oyo.
34 Neryo inianasamalire elubula, mwahumula n’eribwira omulume oyo ati: “Efata,” eribindula liti, “Ulibukale.”
35 Amatwi wiwe mwahomokala* n’olulimi lwiwe mulwaghobokala, neryo amatsuka eribugha ndeke.
36 Neryo mwabwirabo ati isibakaniraya omundu wosi-wosi y’omwatsi oyo. Nikwa iniakabya abibwirabo atya, ibwa ibakalw’ibayatulaghaniagho kutsibu.
37 Mubasweka n’erikukubala. Kandi mubabugha bati: “Akakola emyatsi yosi yo ndeke; nibya akaleka n’abatsiha ibowa, n’abatebugha ibabugha!”
Amaelezo awehikwa
^ Kutse “akatale.”
^ Kutse “omulinga.”
^ Kinywa kwa kinywa, “omo minywa buyira.”
^ Ulebaye endomeko A3.
^ Kinywa kwa kinywa, “omusyo.”
^ Omo Kigiriki ni por·nei′a. Ulebaye amaana w’ebinywa.
^ Kutse “eriso ribi.”
^ Kutse “ebyana by’esyombwa.”
^ Kutse “ebyana by’esyombwa.”
^ Kutse “Ekiharo ky’Emiyi Ikumi.”
^ Kutse “mwahundukala.”
