Engulu mbuya eyahandikawa na Mariko 8:1-38
8 Enyuma w’ebiro ebyo, abandu bangyi mubahindana ahali Yesu. Kandi babya isibawite eky’erirya. Neryo mwabirikira abigha biwe n’eribwirabo ati:
2 “Namakwira abandu aba b’obulighe, kusangwa bamabisiba naghe ebiro bisatu isibawite eky’erirya.
3 Namabibwirabo niti baghende ewabo ibanakwire enzala, ibakendileghetsanira omo nzira. Kandi abandi ni b’ehali-hali.”
4 Aliwe abigha biwe mubamusubirya bati: “Omo kiharo ekiri hali oko miyi eki, omundu angabana hayi h’emikati y’erighutya abandu bosi aba?”
5 Mwababulya ati: “Muwite oko mikati mingahi?” Nabo mubamusubirya bati: “Tuwite oko mikati irinda (7).”
6 Neryo mwabwira abandu ati bikale. Enyuma syaho mwimya emikati irinda (7) eyo. Mwabya abisaba, mwatsutsangayo n’eritsuka erihayo abigha biwe ati baheyo abandu. Nabo mubaghabirayo abandu.
7 Babya ibanawite n’oko hisamaki hike. Yesu mwabya abisabira oko hisamaki ehyo, mwabugha ati baghabirehyo abandu.
8 Neryo mubalya bamughuta. Mubakuma-kuma ehihande-hihande ehyasighalira; muhyusulya ebitiri irinda (7).
9 Habya abalume nga 4 000. N’enyuma syaho mwabwirabo ati baghende.
10 Mwalw’iningira omo bwato haghuma n’abigha biwe n’eriya omo kiharo kye Dalmanuta.
11 Eyo Abafarisayo mubasa bamakuba naye obuhaka. Bakasonda erimulengako, mubamubwira bati akolerebo ekitiko-tiko erilua elubula.
12 Yesu mwasweka kutsibu omo mutima wiwe n’eribugha ati: “Ekikaleka ekizazi* eki ikyasondekania ekitiko-tiko niki? Oko kwenene ngabugha, ekizazi eki sikyendihabwa ekitiko-tiko.”
13 Neryo Yesu mwasighabo aho, amingira omo bwato n’erisokera oko ghundi musirya w’engetse.
14 Nikwa mubibirirwa eriheka emikati; babya n’omukati mughuma musa omo bwato.
15 Kandi mwabwirabo burora-rora ati: “Isimwayato. Muyiteghaye oko kihamya* ky’Abafarisayo n’oko kihamya kya Herode.”
16 Neryo mubatsuka erikubisania obuhaka kundi mubatitaheka emikati.
17 Yesu mwabya abiminya ekyo, mwababwira ati: “Ekikaleka imwakubisania obuhaka busana n’eritendiheka emikati niki? Erihika lino simulimwatsuka eryowa n’eriyiteghererya? Mukinahumene kwehi?
18 ‘Nomo munawite ameso simulilangira; kandi nomo munawite amatwi simulyowa?’ Simwetibuka
19 omughulu natsutsangira abalume 5 000 b’emikati, mumwakuma-kuma ebitiri bingahi ebyoswiremo ebihande-bihande ebyasighalira?” Mubamusubirya bati: “Ebitiri 12.”
20 “Omughulu natsutsangira abalume hakuhi 4 000 b’emikati irinda (7), mumwakuma-kuma ebitiri bingahi ebyoswiremo ebihande-bihande ebyasighalira?” Nabo mubamusubirya bati: “Ebitiri irinda (7).”
21 Neryo mwababwira ati: “Simulimwanowa enzumwa y’ekyo niryabugha?”
22 Enyuma syaho mubahika e Betesaida. Eyo, abandu mubamuletera endimetime. Neryo mubamulemba-lemba bati atule oko ndimetime eyo.
23 Neryo mwawata omundu oyo y’oko byala amamulusya omo mulongo oyo. Abere abitwira oko meso wiwe kw’amatandi, mwamuhirako ebyala biwe n’erimubulya ati: “Wanamalangira ekindu kyosi-kyosi kwehi?”
24 Omundu oyo mwasumba ameso n’eribugha ati: “Namalangira abandu, aliwe bali ng’emiti eyinemughenda.”
25 Neryo kandi mwasyatula oko meso w’omundu oyo, n’omundu oyo mwalangira ndeke. Ameso wiwe muwana. Neryo mwatsuka erilangira ebindu byosi byo ndeke-ndeke.
26 Neryo Yesu mwamubwira ati aghende ewabo. Mwamubwira ati: “Isiwasuba omo muyi oyo.”
27 Neryo Yesu n’abigha biwe mubaya omo milongo ye Kaisaria Filipi. Ibane omo nzira, mwatsuka eribulya abigha biwe ati: “Abandu bakabugha bati nyirindi?”
28 Mubamusubirya bati: “Yohana Mubatisya, abandi bati Eliya, n’abandi bati omughuma w’oko baminyereri.”
29 Neryo mwabulyabo ati: “Ikwa nenyu mukabugha muti nyiri ndi?” Petro mwamusubirya ati: “Uli Kristo.”
30 Neryo mwabakongomerera ati isibamuminyikalaya oko mundu wosi-wosi.
31 Kandi mwatsuka eribakangirirya ngoko litolere Omughala w’omundu iniaghalibwa kutsibu n’erighanwa n’abasondoli b’Abayahudi, n’abahereri bakulu, n’abakangirirya b’Emighambo, neryo initibwa; n’enyuma sy’ebiro bisatu inialubuka.
32 Yesu mwabakanirya omwatsi oyu w’oburora-rora. Nikwa Petro mwahengeka Yesu n’eritsuka erimukunga.
33 Neryo Yesu mwabinduka amasamalira abigha biwe n’erikunga Petro ati: “Labira enyuma syaghe* iwe Sitani! kusangwa ukaghaniraya amalengekania w’abandu butsira aw’oMungu.”
34 Neryo Yesu mwabirikira abandu haghuma n’abigha biwe. Mwabwirabo ati: “Omundu amanza erinikwama ayighane n’eriheka omuti* wiwe w’amaghali n’erinikwama ebiro byosi.
35 Kusangwa omundu oyukasonda erilamya engebe yiwe akendisyaheryayo, nikwa oyukaheraya engebe yiwe busana naghe na busana n’engulu mbuya, akendisyabanayo.
36 Kusangwa omundu angabana ndundi yahi amabya n’ebyosi ebiri omo kihugho nikwa iniaherya engebe yiwe?
37 Oko kwenene, omundu angahingania engebe yiwe na kindu kyahi kwe?
38 Kusangwa oyukakwa esisoni busana naghe na busana n’ebinywa byaghe omo kizazi* kibi kino kandi ekisingiri,* Omughala w’omundu naye akendisyamukwa esisoni omughulu akendisyasa haghuma n’abamalaika babuyirire omo lukengerwa lwa Tata wiwe.”
Amaelezo awehikwa
^ Kutse “olulengo.”
^ Kutse “elevire.”
^ Kutse “sinendyowa ebyaghu.”
^ Ulebaye amaana w’ebinywa.
^ Kutse “olulengo.”
^ Kinywa kwa kinywa, “ekikaleghula.”
