Engulu mbuya eyahandikawa na Mariko 9:1-50

CHINGULA

Erihindukibwa lya Yesu (1-13)
Omulwana oyuliko embinga amalamibwa (14-29)
- Emyatsi yosi ikatokekana oko yuwite obwikirirya (23)
Kandi Yesu akakanaya oko luholo lwiwe (30-32)
Abigha bakakuba obuhaka omukulu nga nindi (33-37)
Oyutelwa netu inyali oko luhande lwetu (38-41)
Ebikatwikalaya (42-48)
“Mubyemo omunyu emwisi syenyu” (49, 50)

9 Kandi Yesu mwabugha ati: “Kwenene ngababwira ngoko hano hane abatendisyahola batebalangira Obwami bw’oMungu bukasa n’obutoki.” ² Habere habilaba ebiro ndatu (6), Yesu mwaghenda na Petro, Yakobo, na Yohana. Mubahetukira oko kitwa kiri-kiri bamabyako ibibene. Neryo mwahendukibwa embere syabo. ³ Esyongyimba siwe musyatsuka erikangabasania. Musyabya nyeru-nyeru kutsibu; nibya n’oko kihugho isikuli oyo wangatoka eryeryasyo atya. ⁴ Neryo Eliya na Musa mubababutukira. Kandi babya ibanemukania na Yesu. ⁵ Neryo Petro mwabwira Yesu ati: “Rabi,* ni lusunzo okw’itwe eribya hano. Tuhimbe hano h’esyohema isatu; eyaghu, eya Musa, n’eya Eliya.” ⁶ Oko kwenene Petro mwabula eky’eribugha; kundi babya ibabiryubaha kutsibu. ⁷ Neryo ekitu mukyasa kyamaswikabo. N’omulenge mwalua omo kitu ati: “Oyu ni Mughala waghe, omwanzwa. Mumwowe.” ⁸ Aho n’aho mubatimbya ameso; aliwe mubalangira Yesu musa. Mubatalangira oghundi mundu. ⁹ Babere bakandaghala bakalua oko kitwa, Yesu mwakongomererabo ati isibakaniraya omundu wosi-wosi ebyo balyalolako erihika omughulu Omughala w’omundu akendisyalubukibwa erilua oko baholi. ¹⁰ Neryo mubakwama erihano eryo.* Aliwe mubabulania Yesu ng’alyasonda eribugha atiki omughulu alyakanaya okw’ilubuka erilua oko baholi. ¹¹ Neryo mubatsuka erimubulya bati: “Ekikaleka abakangirirya b’Emighambo ibabugha bati litolere Eliya iniatsuka eryasa niki?” ¹² Yesu mwabasubirya ati: “Kwenene Eliya akenditsuka eryasa n’erisubya emyatsi yosi; nikwa busanaki kihandikire kiti litolere Omughala w’omundu inyaghalibwa kutsibu n’erighanwa? ¹³ Nikwa ngababwira, oko kwenene Eliya abiryasa; kandi mubamukolera ngoko banzire, ngoko Amasako anabugha okw’iye.” ¹⁴ Mubabya babihika eyiri abandi bigha, mubalangira abandu bangyi ibanabatimbireko, n’abakakingirirya b’Emighambo ibanemukuba nabo obuhaka. ¹⁵ Abandu babere babilangira Yesu mubasweka. Neryo mubatibita eyo ali bakaya muramukya. ¹⁶ Neryo Yesu mwabulyabo ati: “Mukakuba nabo obuhaka busana n’omwatsi wahi kwehi?” ¹⁷ Neryo omundu mughuma mwamusubirya ati: “Mukangirirya mungakuletera mughala waghe kusangwa aliko ekirimu kibi ekikaleka iniabya mumu.* ¹⁸ Omughulu kikamuhikako, kikamukinda ahisi. Neryo akaburura erihulo n’erikeregheta ameno neryo inialuha. Mungasaba abigha baghu niti bahighe ekirimu kibi ekyo, aliwe mubatitatoka.” ¹⁹ Yesu mwabasubirya ati: “Inywe kizazi* ekitawite bwikirirya! Ngendisyabya nenyu erihika mughulu wahi kwe? Ngendisyahanda omutima busana nenyu erihika mughulu wahi kwe? Mumulete hano.” ²⁰ Neryo mubamuletera omulwana oyo. Nikwa ekirimu kibi ekyo mukyabya kyanabilangira Yesu, mukyatsuka erinyola-nyola omwana oyo. Neryo omwana oyo mwawa ahisi n’eritsuka eriyighalya-ghalya n’erihulo irinemulua omo buno. ²¹ Neryo Yesu mwabulya baba w’omulwana oyo ati: “Abiribya atya eritsuka mughulu wahi?” Naye mwamusubirya ati: “Erilua omo bwana. ²² Ekirimu ekyo kyabirisonda erimwita ngendo nyingyi. Kikamughusa omo liko n’omo maghetse. Nikwa, wamabya iwanganatoka erikola omwatsi mulebe, kisi utukwire obulighe, utuwatikaye.” ²³ Yesu mwamusubirya ati: “Ekikaleka iwabugha uti, ‘Wamabya iwanganatoka’ niki? Oko yuwite obwikirirya obuli mwatsi akatokekana.” ²⁴ Baba w’omwana oyo mwalw’iniabugha omo mulenge muli ati: “Ninawite obwikirirya! Uniwatikaye aho nilaghire oko bwikirirya!” ²⁵ Yesu mwabya abilangira abandu bangyi ibanemwasa eyo bali, mwahayira ekirimu kibi ekyo ati: “Iwe kirimu ky’obutsiha n’eky’eritendibugha, ngakubwira, umulueko. Kandi isiwasyasyamuhikako.” ²⁶ Omwana abere abilaka n’eriyinyola-nyola kutsibu, ekirimu ekyo mukyamuluako. N’omwana oyo mwabya ng’aholire; kyo kyaleka abangyi ibabugha bati amabihola. ²⁷ Aliwe Yesu mwamuwata oko byala amamuhangania. Naye mwahangana. ²⁸ Neryo Yesu abere abingira omo nyumba, abigha biwe mubamubulya ahate bandu bati: “Ekiryaleka itwataluka erihighakyo niki?” ²⁹ Yesu mwabasubirya ati: “Omusabe musa w’angatoka erihigha embinga y’omuhanda oyu.” ³⁰ Neryo mubaluaho, bamalaba omo Galilaya. Nikwa mwatanza abandu bakaminya. ³¹ Kusangwa abya akakangirirya abigha biwe n’eribabwira ati: “Omughala w’omundu akendihoterwa n’erihirwa omo byala by’abandu kandi bakendimwita. Aliwe nomo banemwendimwita, akendisyalubuka habikya ebiro bisatu.” ³² Aliwe mubatowa ekyo abya akasonda eribugha kandi babya bakasagha erimubulya. ³³ Neryo mubahika e Kapernaumu. Mwabya abingira omo nyumba, Yesu mwababulya ati: “Mulue mukakuba obuhaka bwaki omo nzira?” ³⁴ Mubabya bukutu; kusangwa omo nzira babya bakakuba obuhaka omukulu omw’ibo nga nindi. ³⁵ Neryo Yesu mwikala amabirikira abakwenda 12 n’eribabwira ati: “Omundu amanza eribya w’erimbere, litolere iniabya w’enduli oko bosi kandi iniakolera abandi bosi.” ³⁶ Neryo Yesu mwaleta omwana mulere amamwimania omo kati-kati kabo, amamutimbyako amaboko wiwe n’eribabwira ati: ³⁷ “Oyukakokaya omughuma w’oko bana balere ng’oyu busana n’erina ryaghe, naghe akabya iniamanikokya. N’oyukanikokaya akabya isyatanikokya ingye musa, akabya inyamakokya n’oyo wanituma.” ³⁸ Yohana mwabugha na Yesu ati: “Mukangirirya, mutukalangira omundu akahigha esyombinga inianemukolesya erina ryaghu. Neryo mutukasonda erimukakirya kundi syalitukwama.” ³⁹ Aliwe Yesu mwasubirya ati: “Isimwasonda erimukakirya. Kusangwa sihali omundu oyo wangakola ekitiko-tiko omo rina ryaghe n’enyuma syaho inialw’inianibughako muhanda. ⁴⁰ Kusangwa oyutelwa netu inyali oko luhande lwetu. ⁴¹ Oko kwenene ngababwira, oyukabaha ekopo y’amaghetse w’erinywa kusangwa muli bandu ba Kristo, syendisyabula oluhembo lwiwe. ⁴² Nikwa oyukaleka omughuma w’oko balere aba abanikirirye iniatwikala, kyanganuwana bamabohera omo bikya biwe m’oluso lunene olukatimbibawa n’epunda, neryo iniaghuswa omo ngetse. ⁴³ “Neryo ebyala byaghu byamabya ibikaleka iwatwikala, utwebyo. Kusangwa, kwanya iwaherya ebyala byaghu wanamatabana engebe, omo mwanya w’eriya omo Gehena* ighuneko ebyala bibiri; omo muliro owate angalima. ⁴⁴ * —— ⁴⁵ Kandi ekisando kyaghu kyamabya ikikaleka iwatwikala, utwekyo. Kusangwa, kwanya iwaherya ekisando kyaghu wanamatabana engebe, omo mwanya w’erighuswa omo Gehena* ighuneko ebisando bibiri. ⁴⁶ * —— ⁴⁷ Kandi eriso ryaghu ryamabya irikaleka iwatwikala, ughuseryo. Kusangwa, kwanya iwingira omo Bwami bw’oMungu n’eriso righuma omo mwanya w’erighuswa omo Gehena* ighuneko ameso abiri, ⁴⁸ eyo emihuka itehola n’eyo omuliro atelima. ⁴⁹ “Kusangwa litolere obuli mundu inialungwa omo munyu owali ng’omuliro. ⁵⁰ Omunyu uwene. Nikwa omunyu amabiherya obusi bwagho ighukendisubyabo naki? Mubyemo omunyu emwisi syenyu. Kandi mubye n’obuholo omo kati-kati kenyu.”