Engulu mbuya eyahandikawa na Matayo 1:1-25
1 Ekitabu ekikakanaya oko historia* ya Yesu Kristo,* mughala wa Daudi, mughala wa Abrahamu:
2 Abrahamu mwabuta Isaka;Isaka mwabuta Yakobo;Yakobo mwabuta Yuda n’abaghala babo;
3 Yuda mwabuta Perezi na Zera, abutabo oko Tamari;Perezi mwabuta Hezroni;Hezroni mwabuta Ramu;
4 Ramu mwabuta Aminadabu;Aminadabu mwabuta Nasoni;Nasoni mwabuta Salmoni;
5 Salmoni mwabuta Boazi, amubuta oko Rahabu;Boazi mwabuta Obedi, amubuta oko Ruta;Obedi mwabuta Yese;
6 Yese mwabuta Omwami Daudi.
Daudi mwabuta Solomona, amubuta oko muka Uria;
7 Solomona mwabuta Rehoboamu;Rehoboamu mwabuta Abiya;Abiya mwabuta Asa;
8 Asa mwabuta Yehosafati;Yehosafati mwabuta Yehoramu;Yehoramu mwabuta Uzia;
9 Uzia mwabuta Yotamu;Yotamu mwabuta Ahazi;Ahazi mwabuta Hezekia;
10 Hezekia mwabuta Manase;Manase mwabuta Amoni;Amoni mwabuta Yosia;
11 Yosia mwabuta Yekonia n’abaghala babo, oko mughulu Abaisraeli batwalawa omo bunyewa mwe Babiloni.
12 Babere babitwalwa omo bunyewa mwe Babiloni, Yekonia mwabuta Salatieli;Salatieli mwabuta Zerubabeli;
13 Zerubabeli mwabuta Abihudi;Abihudi mwabuta Eliakimu;Eliakimu mwabuta Azora;
14 Azora mwabuta Zadoki;Zadoki mwabuta Akimu;Akimu mwabuta Elihudi;
15 Elihudi mwabuta Eleazari;Eleazari mwabuta Matani;Matani mwabuta Yakobo;
16 Yakobo mwabuta Yozefu. Yozefu yo wabya mwira* wa Maria oyo wabuta Yesu, oyukahulawa mo Kristo.
17 Neryo ebizazi* byosi erilua oko Abrahamu erihika oko Daudi byabya 14; erilua oko Daudi erihika oko mughulu Abaisraeli batwalawa omo bunyewa mwe Babiloni, byabya bizazi 14; n’erilua oko mughulu Abaisraeli batwalawa omo bunyewa mwe Babiloni erihika oko Kristo, byabya bizazi 14.
18 Omughulu Yesu Kristo abutawa, emyatsi ko yabya yitya: Mama wiwe ye Maria babya ibabirilaghana na Yozefu ngoko bakendilunga. Aliwe, mwabya mukule erilabira ekirimu kibuyirire* isibebalunga.
19 Aliwe kundi mwira wiwe ye Yozefu abya mundu oyutunganene mwatanza erimuhemula, neryo mwasonda erimuleka bubiso-biso.
20 Nikwa Yozefu abere abilengekania oko mwatsi oyo, omumalaika wa Yehova* mwamuhulukira omo nzoli. Mwamubwira ati: “Yozefu, mughala wa Daudi, isiwasagha erileta Maria mukali waghu y’eka waghu. Obukule obwahekire, alyahekabo omo butoki bw’ekirimu kibuyirire.
21 Akendisyabuta omwana w’obulume. Ukendisyamwahula mo Yesu,* kundi akendisyasabula abandu biwe b’omo malolo.”
22 Emyatsi yosi eyo yabya yitya, eriberererya ebyo Yehova* abugha erilabira omuminyereri wiwe ati:
23 “Omubikira akendisyaheka obukule, neryo akendisyabuta omwana w’obulume. Akendisyahulwa mo Emanueli,” ni bugha ambu, “oMungu ali haghuma netu.”
24 Neryo Yozefu abere abibuka, mwakola ngoko omumalaika wa Yehova* amubwira. Mwaleta Maria y’eka wiwe.
25 Nikwa mwatimya Maria erihika omughulu abuta omwana. Neryo Yozefu mwahula omwana oyo mo Yesu.
Amaelezo awehikwa
^ Kutse “esyondengo.”
^ Kutse “Masiya, Oyuhirirweko Amaghuta.”
^ Kutse “iba.”
^ Kutse “esyondengo.”
^ Kutse “akaghala k’oMungu.”
^ Erina ry’oMungu rikasungika omo Masako w’Ekigiriki ngendo 237. Eno, y’engendo y’erimbere. Ulebaye endomeko A5.
^ Omo Kiebrania, Yesu ni Yesua kutse Yosua, ni bugha ambu, “Yehova ni Mulamo.”
^ Ulebaye endomeko A5.
^ Ulebaye endomeko A5.