Engulu mbuya eyahandikawa na Matayo 10:1-42
10 Neryo Yesu mwabirikira abigha biwe 12. Mwabaha ehamuli oko birimu bibi. Mwabaha ehamuli y’eritibita kubyo n’erilamya emihanda yosi y’esyondwala n’amakoni.
2 Amena w’abakwenda 12 wano: Hali Simoni oyukahulawa mo Petro, na Andrea mughala wabo; Yakobo na Yohana, abaghala ba Zebedayo;
3 Filipo na Bartolomayo; Toma na Matayo omulihisya w’ebitasi;* Yakobo mughala wa Alfayo; Tadayo;
4 Simoni Omukanani;* na Yuda Iskariote, oyo wahotera Yesu.
5 Yesu mwatuma abalume 12 aba, n’eribahana ati: “Isimwaghenda omo biharo by’abandu b’ebihanda, kandi isimwingira n’omo muyi n’omughuma w’Abasamaria.”
6 Nikwa mubye mukatulira esyombuli esiherire sy’omo kihanda kye Israeli sisa.
7 Omughulu mukayatula engulu, mubye mukabugha muti: ‘Obwami bw’elubula buli hakuhi.’
8 Mulamaye abakoni, mulubukaye abaholi, mulamaye abahagha, n’erihigha esyombinga. Mwabirihabwa butsira eriliha, muhitaye butsira erilihisya.
9 Simuheke ehoro, efeza,* kutse ekwivre omo hifuko* hyenyu hy’eribikamo esyofranga.
10 Kandi simuheke engunza y’erihiramo endanda, kutse eriheka esyongyimba ibiri,* kutse ebiryato, kutse omutso. Kusangwa oyukakola omubiiri atolere iniahabwa akalyo kiwe.
11 “Omo muyi kutse omulongo wosi-wosi ogho mukendingiramo, musondaye nga nindi yutolere. Kandi musighaleho erihika aho mukendiluirayo.
12 Omughulu mukingira omo nyumba muramukaye ab’omo nyumba eyo.
13 Ab’omo nyumba eyo bamabya ibanatolere; obuholo obo mukabasunzira ibwabasighalako. Aliwe bamabya isibatolere, obuholo bwenyu ibwasuba okw’inywe.
14 Abandu b’omo nyumba nyilebe, kutse ab’omo muyi mulebe bamatendibahulikirira, mukungute olututu l’oko bisando byenyu mukalua omo nyumba eyo kutse omo muyi oyo.
15 Oko kwenene ngababwira, Ekiro ky’Eritswera, olubanza lwe Sodomo ne Gomora lukendisyoloba kulenga olw’omuyi oyo.
16 “Ngabatuma ng’esyombuli omo kati-kati k’esyombwa sy’omoli. Busana n’ekyo muyilandeko ng’esyonzoka aliwe kandi imunayibombekire ng’ehilikuku.
17 Muyiteghaye oko bandu. Kusangwa bakendisyabatwala oko syotribinali n’eribahunzira omo syosinagogi* syabo.
18 Kandi mukendisyatwalwa embere sy’abami n’abatabali busana naghe. Ekyo kikendisyabya bwimiri okw’ibo n’oko bihanda.
19 Nikwa omughulu bakabatwala embere sy’abakulu, isimwahanga-hangaya nga mukendibughaki kutse nga mukendibugha muti. Kusangwa oko ndambi eyo mukendihabwa ebyo mwangabugha.
20 Kundi ebinywa ebyo mukendisyabugha si byenyu; ekirimu kya Tata wenyu kikendisyabaha eby’eribugha.
21 Kandi omughala wabo mundu akendisyamuhira omo byala by’abakendimwita; na tata kw’anemwendisyakolera omwana wiwe y’atya. N’abana bakendisyalwa n’ababuti babo n’eritisyabo.
22 Kandi abandu bosi bakendisyabapona* busana n’erina ryaghe. Aliwe oyukendisyayiyinia erihika oko nduli, yukendisyalamibwa.
23 Omughulu bakabendereraya omo muyi mughuma, imwatibita omo ghundi. Oko kwenene ngababwira, simwendisyabugha emiyi yosi ye Israeli Omughala w’omundu ate ahika.
24 “Omwigha syalengire omukangirirya wiwe, n’omukobe syalengire omukama wiwe.
25 Omwigha amabibya ng’omukangirirya wiwe inyakanditsema, n’omughombe amabibya ng’omukama wiwe inyakenditsema. Bamabyahula omukama w’enyumba mo Belzebuli,* abandu b’omo nyumba ibakendisyahulwa omo mena mabi kwilaba aho.
26 Neryo isimwasaghabo. Kundi sihali ekindu ekikuningire, ekitendisyakunungulwa; kutse ekindu ekyabiribiswa mo kumbo* ekitendisyaminywa.
27 Ebyo ngababwira omo mwirimya, mubughebyo omo kyakakala; n’ebyo mukowa omo bihwehwe, mubughirebyo oko lutwe lw’enyumba.*
28 Kandi isimwasagha abakita omubiri aliwe isibangaherya obuyingo bw’omundu.* Nikwa, musaghe oyuwite obutoki bw’eriherya omubiri n’obuyingo b’omundu omo Gehena.*
29 Ebisukali bibiri bikaghulibawa ekitsere kighuma* ky’obughuli buke kutsibu; ko bite bitya? Aliwe sihali n’ekighuma kya kubyo ekyangatoghera ahisi Tata wenyu isyasi.
30 Nikwa inywe, n’esyonzwiri syosi sy’oko mitwe yenyu, sinasibwe emighanzo.
31 Neryo isimwasagha. Muli b’obughuli bunene kulenga ebisukali bingyi.
32 “Obuli mundu oyukaligha embere sy’abandu ngoko ni mwigha waghe, naghe ngendisyamuligha embere sya Tata waghe w’elubula.
33 Nikwa oyukanyighana embere sy’abandu, naghe ngendisyamughana embere sya Tata waghe w’elubula.
34 Isimwalengekanaya muti nasa oko kihugho erisyaleta obuholo. Munitaleta obuholo, aliwe omuyali.
35 Kusangwa munasa erisyaghaba baba na mughala wiwe, mama na mwali wiwe, na mabyala na mwalyana wiwe.
36 N’esyonzighu sy’omundu bakendisyabya iban’abandu b’omo nyumba.
37 Oyo wanzire baba wiwe kutse mama wiwe kunilenga, syanitolere. N’oyo wanzire omughala kutse mwali wiwe kunilenga, syanitolere.
38 Kandi omundu oyutanzire eriheka omuti wiwe w’amaghali* n’erinikwama, syanitolere.
39 Omundu oyukasonda erilamya obuyingo bwiwe, akendisyaheryabo. N’oyukaheraya obuyingo bwiwe busana naghe, akendisyabanabo.
40 Omundu oyukabakokaya akanikokaya, n’oyukanikokaya akabya inyamakokya oyo wanituma.
41 Oyukakokaya omuminyereri kusangwa ni muminyereri, akendisyabana ekihembo ky’omuminyereri; n’oyukakokaya omundu oyutunganene kundi omundu oyo ni mutunganene, akendisyabana ekihembo ky’omundu oyutunganene.
42 Kandi oyukendisyaha omughuma w’oko bake-bake aba ekopo y’amaghetse awahuhirire kusangwa ni mwigha waghe, kwenene ngababwira, syendisyabula eribana ekihembo kiwe.
Amaelezo awehikwa
^ Kutse “omusolesya.”
^ Kutse “ow’omuhwa.”
^ Ni kindu ky’obughuli ekikalua omo kitaka.
^ Kutse “omukaba w’eribikamo esyofranga, ekila.”
^ Kutse “olundi lukimba.”
^ Kutse “amanyumba w’eriramiryamo.”
^ Kutse “bakendisyabakwa obusu.”
^ Erina erikahabawa Sitani, omukulu kutse omutabali w’esyombinga.
^ Kutse “eribiswa mo siri.”
^ Kutse “ahali abandu bangyi.”
^ Kutse “abatebanganyegha omundu y’amaha wiwe w’eritasyabyaho.”
^ Ulebaye amaana w’ebinywa.
^ Kinywa kwa kinywa, “easariyoni nguma. Easariyoni nguma ilingene n’omusahara w’ekiro kighuma erighabagho ngendo 16.” Ulebaye endomeko B14.
^ Ulebaye amaana w’ebinywa.
