Engulu mbuya eyahandikawa na Matayo 11:1-30
11 Yesu abere abibugha eriha abigha biwe 12 b’obusondoli, mwaluaho amayakangirirya n’eritula engulu omo miyi yabo.
2 Nikwa Yohana iniane omo muliki, mwowa engulu y’emibiiri ya Yesu. Neryo mwatuma abigha biwe
3 ati bayabulaye Yesu bati: “Nina we oyukasa? Kutse tulindirire oghundi?”
4 Yesu mwasubiryabo ati: “Mughende mubwire Yohana y’ebyo mwamowa n’ebyo mwamalangira:
5 Esyondimetime sirimulangira n’ebirema binemughenda; abahagha banemulamibwa, n’abatsiha balimwowa; abaholi banemulubukibwa, n’engulu mbuya inemutulaghanibwa oko bera.
6 Obutseme buli oko mundu oyutenitika-tikira.”*
7 Omughulu abigha ba Yohana babya bakasubula, Yesu mwatsuka erikania n’abandu oko Yohana ati: “Mwaya omo mbwarara eriyalebya yo ki? Mwayalebaya oluseke olukatsinga-tsingibawa n’erihunga kwehi?
8 Neryo mwayalebaya yo ki? Mwayalebaya omundu oyumbite esyongyimba esighambire? Abakambala esyongyimba esighambire sibakabya omo manyumba w’abami!
9 Neryo kwesi inywe mwayenda omo mbwarara mo ki? Eriyalola oko muminyereri kwehi? Inga, oko kwenene, ngababwira ni mukulu nibya kwilaba n’abaminyereri.
10 Yohana yo mundu oyo Amasako akahula ati: ‘Lebaya! Ngatuma omukwenda waghe embere syaghu.* Akendikuteghekanirya enzira.’
11 Oko kwenene ngababwira, oko bandu bosi ababutawa n’abakali, sihehatabya oyulengire Yohana Mubatisya. Nikwa omuke kutsibu omo Bwami bw’elubula, amulengire.
12 Eritsuka oko biro bya Yohana Mubatisya erihika lino, abandu banemuyikasa eringira omo Bwami bw’elubula; n’abakayikasa banemwingira mubo.
13 Kusangwa amakangirirya wosi w’abaminyereri n’Emighambo, mubyakania amaminyereri erihika oko mughulu wa Yohana.
14 Kandi mulighe mutendiligha, iye yo Eliya oyo abaminyereri bahula bati akendisyasa.
15 Oyuwite amatwi owe.
16 “Nangasosekania abandu b’ekizazi kino naki? Nangabasosekania n’abana abakatsangira omo soko ibanemubirikiranako,
17 bati: ‘Mutukababuhira enyabulere, nikwa mumutitasata. Mutukabimbira olwimbo lw’ekiriro, nikwa mumutitalira.’
18 Kutya, Yohana mwasa isyalirya kutse erinywa, nikwa abandu bakabugha bati, ‘Aliko embinga.’
19 Omughala w’omundu mwasa inyakalya n’erinywa, nikwa abandu bakabugha bati, ‘Omundu oyu, ni w’omururu kandi ni mutamiri; ni mwira w’abakalihisaya ebitasi* n’abakola-nabi.’ Nikwa amenge akalangirika ko atunganene erilabira emibiiri yagho.
20 Neryo Yesu mwatsuka erihayira emiyi eyo akoleramo ebitiko-tiko biwe bingyi, kusangwa abandu b’omo miyi eyo mubatabindula emitima.
21 “Obulighe okw’iwe, iwe Korazini; obulighe okw’iwe, iwe Betesaida; kusangwa ebitiko-tiko ebyakoleka ewenyu, byalikoleka e Tiro ne Sidoni, abandu bayo ngambe babiribindula emitima yo kera-kera ibanambite esyongyimba sy’esaki* n’eryikala omwibu.
22 Aliwe ngababwira, Ekiro ky’Eritswera, olubanza lwe Tiro ne Sidoni lukendisyoloba kulenga olwenyu.
23 Naghu Kapernaumu, ukalengekanaya uti ukendisumbirwa endata omo kyanya? Iyehe, ukendighuswa omw’Isinda.* Kusangwa ebitiko-tiko ebyakoleka ewaghu byalikoleka e Sodomo, omuyi we Sodomo ngambe akineho na munabwire.
24 Nikwa ngakubwira niti oko Kiro ky’Eritswera, olubanza lwe Sodomo lukendisyoloba kulenga olwaghu.
25 Oko ndambi eyo Yesu mwabugha ati: “Tata, ngakupipa embere sy’abandu, iwe Mukama w’olubula n’ekihugho; kusangwa wabiribisa emyatsi eyi oko bandu b’amenge n’abasomire, aliwe wabiribisulirayo abana balere.
26 Inga, Tata, kusangwa ko ulyanza erikola utya.
27 Tata waghe abirinyiha emyatsi yosi. Sihali oyo wasi Tata yo ndeke kulenga Mughala. Sihali n’oyo wasi Omughala yo ndeke kulenga Tata. Kandi abandu sibangaminya Tata yo ndeke Omughala atalyababisuliraye.
28 Mwase eyo nyiri inywe mukanuba n’eriheka ebiritohire; naghe ngendibaluhukya.
29 Muheke omuketo* waghe kandi mwighire okw’ingye; kusangwa nyiri w’omutima molo kandi ngayikehaya, nenyu mukendisyaluhukibwa.*
30 Kusangwa engomo yaghe ni nyibuya* n’omuheke waghe anguhire.
Amaelezo awehikwa
^ Kutse “oyutetwikala busana naghe.”
^ Kinywa kwa kinywa, “embere sy’obusu bwaghu.”
^ Kutse “abasolesya.”
^ Kutse “epiri, olukimba lw’ekiriro.”
^ Kutse Hadesi. Ulebaye amaana w’ebinywa.
^ Ulebaye amaana w’ebinywa.
^ Kutse “mukendisyaluhukibwa omo mitima yenyu.”
^ Kutse “yolobire eriheka.”
