Engulu mbuya eyahandikawa na Matayo 12:1-50

  • Yesu, ni “Mukama we Sabato” (1-8)

  • Omulume w’ebyala ebilehemire akalamibawa (9-14)

  • Omughombe mwanzwa w’oMungu (15-21)

  • Esyombinga sikahighawa omo butoki bw’ekirimu kibuyirire (22-30)

  • Erilolo eriteryangaghanyirwa (31, 32)

  • Omuti akaminyirawa oko matunda wagho (33-37)

  • Ekitiko-tiko kya Yona (38-42)

  • Omughulu ekirimu kibi kikasubula (43-45)

  • Abaghala babo Yesu na mama wiwe (46-50)

12  Oko mughulu oyo, Yesu mwalaba omo malima w’engano omo kiro ky’Esabato. Abigha biwe mubakwa enzala. Neryo mubatsuka eritwa amakundi w’engano n’eriryayo. 2  Nikwa omughulu Abafarisayo balangira ekyo, mubabugha na Yesu bati: “Abigha baghu banemukola ebyo Emighambo ikaghanaya erikola ekiro ky’Esabato.” 3  Mwabasubirya ati: “Simwetasoma ekyo Daudi akola omughulu iye n’abandu ababya naye bakwa enzala? 4  Ngoko mwingira omo nyumba y’oMungu neryo iye n’abalume biwe ababya naye bamalya emikati eyibuyirire?* Erikwamana n’Emighambo, sibabya bahamulirwe erirya emikati eyo; aliwe abahereri basa bo babya n’ehamuli y’eriryayo. 5  Kutse simwetasoma omo Mighambo ngoko abahereri abakakola omo hekalu oko kiro ky’Esabato sibalisikaya omughambo w’Esabato, kandi ibatabyako olubanza kwehi? 6  Nikwa ngababwira, hano hane oyulengire ehekalu. 7  Nikwa ko mulue mwasi amasako awakabugha ati, ‘Ekyo nyanzire abandu ibakola, ry’erikwira abandi b’obulighe butsira erinyiletera obuhere,’ simwangatswere abandu abateko olubanza. 8  Kusangwa Omughala w’omundu ni Mukama w’Esabato.” 9  Neryo Yesu mwaluaho, amaya omo sinagogi* yabo. 10  Omo sinagogi* eyo mwabya omundu ow’ebyala ebilehemire.* Neryo abandu bakasonda eritegha Yesu, mubamubulya bati, “Omo Mighambo, kinahamulirwe erilamya omo kiro ky’Esabato kwehi?” 11  Mwababwira ati: “Wamabya ighuwite embuli nguma, neryo embuli eyo iyatoghera omo kyuna omo kiro ky’Esabato; nindi okw’inywe oyutewangasumbayo, n’erilusyayo omo kyuna kwehi? 12  Omundu ni w’obughuli bunene kutsibu kwilaba embuli. Neryo kwesi, Emighambo siyighanirye erikola ekibuya omo kiro ky’Esabato.” 13  Neryo Yesu mwabwira omulume oyo ati: “Lingola ebyala byaghu.” Naye mwalingolabyo. Neryo ebyala ebyo mubyalama n’eribya ng’ebindi. 14  Nikwa Abafarisayo mubahuluka n’eriya embita y’erita Yesu. 15  Yesu abere abiminya omwatsi oyo, mwaluaho. Kandi abandu bangyi mubamukwama, neryo mwalamya abosi. 16  Nikwa Yesu mwabakongomerera ati isibamuminyikalaya. 17  Abugha atya, atoke eriberererya ebyo omuminyereri Isaya abugha ati: 18  “Lebaya, omughombe waghe oyo nabiriyisogha! Omughombe waghe mwanzwa oyo nabiriligha.* Ngendisyamuhirako ekirimu kyaghe, kandi akendisyawatikya ebihanda eriminya ekitunganene. 19  Syendisyalwa omo binywa* kutse eribuya olukanda. N’omulenge wiwe syendisyowibwa omo syonzira. 20  Syendisyatwa oluseke olubunikire. Kandi syendisyalimya orutambi olukatumba lukasonda erilima erihika aho akendisyahiriraho eritswera eritunganene. 21  Kwenene, abandu bosi bakendisyahira amaha wabo omo rina riwe.” 22  Neryo abandu mubaletera Yesu y’omulume oyuliko embinga. Omulume oyo, abya ndimetime, kandi ini mumu.* Neryo Yesu mwalamya omulume oyo, amatsuka erilangira n’eribugha. 23  Neryo abandu mubasweka n’eritsuka eribugha bati: “Omulume oyu anganabya ini Mughala wa Daudi.” 24  Omughulu Abafarisayo bowa eki, mubabugha bati: “Omulume oyu akahigha esyombinga omo maka wa Belzebuli,* omutabali w’esyombinga.” 25  Yesu mwaminya ebyo bakalengekanaya. Neryo mwabwirabo ati: “Obuli bwami obughabene bukatera; n’omuyi kutse enyumba eyighabene sibyangahangana. 26  Neryo Sitani amatibita oko Sitani, ni bugha ambu inyamalwa niye iyuwene-wene. Neryo obwami bwiwe ibukendihangana buti kwehi? 27  Naghe, namabya ingahigha esyombinga omo maka wa Belzebuli, abana benyu ibakahighasyo omo maka wandi kwehi? Ekyo kyo kikendisyaleka abana benyu ibabatswera. 28  Aliwe namabya ingahigha esyombinga omo maka w’ekirimu ky’oMungu, kwesi Obwami bw’oMungu ibwabiribahikako isimwasi. 29  Kutse omundu angatoka ati eringirira omundu w’amaka omo nyumba yiwe n’eriheka ebindu biwe atitatsuka eriboha omundu w’amaka oyo kwehi? Iniakenditsuka erimuboha imwatoka eriheka ebindu biwe. 30  Oyute oko luhande lwaghe, ini nzighu yaghe n’oyutekuma-kuma haghuma naghe, iniakapanza-panza. 31  “Busana n’omwatsi oyu, ngababwira, abandu bakendisyaghanyirwa emihanda yosi y’amalolo n’ebitsumi.* Aliwe oyukatsuma ekirimu kibuyirire syendisyaghanyirwa. 32  Ng’eky’erileberyako, omundu wosi-wosi oyukabugha muhanda oko Mughala w’omundu akendisyaghanyirwa. Aliwe oyukabugha muhanda oko kirimu kibuyirire, syendisyaghanyirwa omo mughulu* ono nibya n’omo mughulu owakasa. 33  “Muyire omuti mo mubuya n’amatunda wagho mo mabuya. Kutse muyire omuti mo mubi n’amatunda wagho mo mabi. Kusangwa amatunda w’akakanganaya omuti nga ni mubuya kutse nga ni mubi. 34  Inywe bana b’esyonzoka,* mwangatoka muti eribugha emyatsi mibuya imuli bandu babi kwehi? Kusangwa obuno bukabugha ebyoswire omo mutima. 35  Omundu mubuya akahulukaya emyatsi mibuya omo kighona kiwe ky’emyatsi mibuya; n’omundu mubi, akahulukaya emyatsi mibi omo kighona kiwe ky’emyatsi mibi. 36  Oko kwenene ngababwira, oko kiro ky’eritswera abandu bakendisyatonda busana n’ebinywa byosi bitya-bitya ebyo bakabugha. 37  Kusangwa busana n’ebinywa byaghu, ukendisyahulwa mo mutunganene. Kandi busana n’ebinywa byaghu, ukendisyabyako olubanza. 38  Abandi b’oko Bafarisayo n’abakangirirya b’Emighambo mubamusubirya bati: “Mukangirirya, twanzire itwalangira ukakola ekitiko-tiko.” 39  Yesu mwasubiryabo ati: “Abandu b’ekizazi* kino ni babi kandi ni basingiri.* Bakahatikana bati bakolerawe ekitiko-tiko. Nikwa sibendihabwa ekindi kitiko-tiko, kite ikye n’ekitiko-tiko ky’omuminyereri Yona.” 40  Kusangwa, ngoko Yona anabugha omo nda y’esamaki nene mw’ebiro bisatu n’emisibo isatu, kutya n’Omughala w’omundu akendisyabugha omw’isinda mw’ebiro bisatu n’emisibo isatu. 41  Oko Kiro ky’Eritswera, abandu be Ninawi bakendisyahangana n’erihira oko kizazi* eki k’olubanza. Kusangwa mubabya babyowa omwatsi ogho Yona abatulira, mubabindula emitima. Aliwe hano hane oyulengire Yona. 42  Oko Kiro ky’Eritswera omwami w’obukali* w’eluhande lw’eyikwa akendisyahangana n’erihira oko kizazi* eki k’olubanza; kusangwa mwalua oko nduli-nduli sy’ekihugho akasyahulikirira amenge wa Solomona; nikwa hano hane oyulengire Solomona. 43  “Omughulu ekirimu kibi kikalua omo mundu, kikalaba ahate amaghetse kikasonda ah’eriluhukira; aliwe ikyabulaho. 44  Neryo kikabugha kiti, ‘Ngendisuba omo nyumba yaghe eyo naluamo.’ Kikabya kyabihikayo, ikyeya omo nyumba eyo isimuliki; aliwe iyinabirirye kandi iyine ndeke. 45  Neryo kikahuluka n’eriyaleta ebindi birimu irinda (7); ebibi kukilenga. Neryo bikabya byab’ingira, ibyikalamo. Oko nduli, omundu oyo akabya mubi kutsibu kwilaba erimbere. Ko binemwendisyabya bitya n’oko kizazi* kibi kino. 46  Yesu inyakinakanaya n’abandu, abaghala babo na mama wiwe mubahika. Neryo mubimana ehihya bakasonda erikania naye. 47  Neryo omundu mwabwira Yesu ati: “Mama waghu n’abaghala benyu banimene ehihya, banzire erikania naghu.” 48  Yesu mwamusubirya ati: “Mama waghe yo wahi n’abaghala betu bo bahi?” 49  Neryo mwakangania abigha biwe n’eribugha ati: “Mama waghe n’abaghala betu b’aba. 50  Kusangwa omundu wosi-wosi oyukakola erisonda rya Tata waghe oyuli elubula yo mughala wetu, mwali wetu, na mama waghe.”

Amaelezo awehikwa

^ Kutse “emikati y’erikangania.”
^ Kutse “ebyala ebibasire.”
^ Kutse “oyo omutima waghe abiriligha.”
^ Kutse “syendisyaneghena.”
^ Kutse “oyutebugha.”
^ Erina erikakolesibawa oko Sitani.
^ Kutse “eribugha muhanda oko myatsi eyibuyirire.”
^ Kutse “esyomboma, ebikweta.”
^ Kutse “olulengo.”
^ Kutse “bakaleghula.”
^ Kutse “olulengo.”
^ Kutse “omwami-kali.”
^ Kutse “olulengo.”
^ Kutse “olulengo.”
NEW WORLD TRANSLATION OF THE HOLY SCRIPTURES (2013 REVISION)
Matayo 12
Kinande
Usomere eBiblia oko Enternete
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt