Engulu mbuya eyahandikawa na Matayo 14:1-36
14 Oko mughulu oyo, Herode omutabali w’ekiharo kye Galilaya mwowa oko ngulu ya Yesu.
2 Neryo Herode mwabwira abaghombe biwe ati: “Oyo ni Yohana Mubatisya; abirilubuka n’ekyo kyo kikaleka iniabya n’obutoki bw’erikola ebitiko-tiko.”
3 Herode* abya iniabirihamba Yohana n’erimuboha n’erimuhira omo muliki busana na Herodia omukali wa Filipo, mughala wabo.
4 Kusangwa Yohana abya iniakabwira Herode ati: “Emighambo ibughire yiti sighutolere erimya Herodia.”
5 Herode abya anzire eryita Yohana, aliwe iniakasagha abandu kundi ibasi Yohana ko ni muminyereri.
6 Aliwe omo kiro ky’eryibuka eributwa lya Herode, mwali wa Herodia mwasata, amatsemesya Herode yo kutsibu.
7 Busana n’ekyo Herode mwamulagha n’erilahirya* ati akendimuha ekyosi-kyosi ekyo akendisaba.
8 Nikwa mama wiwe mwamuhana ati abughe ati: “Umbe omutwe wa Yohana Mubatisya oko sahani eyi.”
9 Ekyo mukyaletera Omwami Herode y’obulighe. Aliwe busana n’abandu ababya bakalya haghuma naye kandi kundi abya iniabirilahirya, mwabugha ati baletere omumbesa oyo y’omutwe wa Yohana.
10 Neryo mwatuma omundu y’omo ngomo eriyatwa omutwe wa Yohana.
11 Mubaleta omutwe wa Yohana oko sahani, bamahagho omumbesa oyo, naye amatwaliragho mama wiwe.
12 Enyuma syaho, abigha ba Yohana mubasa bamaheka ekinda kya Yohana bamayatakyo. Neryo mubayabwira Yesu.
13 Yesu mwabya abyowa omwatsi oyo, mwingira omo bwato amaghenda ahate bandu. Nikwa abandu b’omo miyi mbiriri-mbiriri babere balangira ngoko amabighenda, mubamukwama omo bisando.
14 Mwabya abihika oko musike w’engetse, mwalangira abandu bangyi. Mwabakwira obulighe kandi mwalamya abakoni babo.
15 Nikwa bwabere bwabya igholo-gholo, abigha biwe mubahika aho ali. Mubamubwira bati: “Tuli hali oko miyi kandi bwamabira. Ubwire abandu uti baghende omo miyi bayayironderaye akalyo.”
16 Nikwa Yesu mwasubirya abigha biwe ati: “Sibatolere erighenda; mubahe akalyo.”
17 Nabo mubamusubirya bati: “Situwite okuki; tuwite oko mikati itano misa n’oko syosamaki ibiri.”
18 Mwababwira ati: “Muletebyo hano.”
19 Neryo Yesu mwabwira abandu ati bikale oko biti. Neryo mwimya emikati itano eyo n’esyosamaki ibiri, amasamalira elubula n’erisaba. Mwatsutsanga emikati eyo, amahayo abigha biwe, n’abigha biwe bamahayo abandu.
20 Abosi mubalya, bamughuta. Mubakuma-kuma ehihande-hihande ehyasaka. Muhyusulya ebitiri 12.
21 Abalya babya balume nga 5 000, aliwe abakali n’abana mubataghanzwa.
22 Neryo mwalw’iniabwira abigha biwe ati bingire omo bwato, basokere oko ghundi musirya w’engetse. Naye mwasighala akabwira abandu ati baghende.
23 Abandu babere baghenda, Yesu mwahetukira oko kitwa amayasaba. Obutuku mubwira inyane oko kitwa kw’iyuwene.
24 Nikwa obwato bwabya ibwabirihika omo ngetse mo hali n’ebisunda byabya bikayihumanga kubo kusangwa ekihunga kyabya kikabuhirira embere syabo.
25 Nikwa obutuku bukasonda erikya,* Yesu mwasa eyo bali inianemutandayira oko maghetse.
26 Abigha biwe babere bamulangira akatandayira oko maghetse, mubakwa obuba n’eribugha bati: “Twamatingwa eee!” Kandi mubalaka busana n’obuba.
27 Nikwa Yesu mwalw’iniababwira ati: “Isimwahahukaya emitima. N’ingye; simubahe.”
28 Petro mwamusubirya ati: “Mukama, amabya ininawe unihamule niase eyo uli inyinemutandayira oko maghetse.”
29 Yesu mwamubwira ati: “Asa.” Neryo Petro mwalua omo bwato amatandayira oko maghetse, amaya eyiri Yesu.
30 Nikwa Petro abere abilangira ekihunga, mwakwa obuba n’eritsuka eritobera. Neryo mwalaka ati: “Mukama, unilamaye!”
31 Neryo Yesu mwakakya ebyala, amamuhamba n’erimubwira ati: “Iwe mundu w’erikirirya rike, busanaki mughukatika-tika kwehi?”
32 Babere babisambira omo bwato, erihunga mulyatulera.
33 Neryo ababya omo bwato mubamunamira n’eribugha bati: “Kwenene, uli Mughala w’oMungu.”
34 Neryo mubasoka bamahika omo kihugho kye Genezareti.
35 Abandu b’omo muyi oyo babere bamuminya, mubatuma engulu omo biharo byosi. Neryo abandu mubamuletera abakoni bosi.
36 Kandi mubalemba-lemba Yesu bati abalighire eritatula lisa oko musike w’olukimba* lwiwe. N’abosi abatula kulo mubalama ndeke-ndeke.
Amaelezo awehikwa
^ Oyu ni Herode Antipa. Ulebaye amaana w’ebinywa.
^ Kutse “erilapa.”
^ Kinywa kwa kinywa, “ekisisimuko ky’akani, ni bugha ambu, eritsuka oko saa tisa y’ekiro erihika omo mitsange.”
^ Kutse “olukimba lw’eryambalira oko lundi.”
