Engulu mbuya eyahandikawa na Matayo 15:1-39
15 Neryo Abafarisayo n’abakangirirya b’Emighambo mubalua e Yerusalama bamasa ahali Yesu n’erimubulya bati:
2 “Busanaki abigha baghu sibalisikaya emitsye y’abandu ba kera kwehi? Ng’eky’erileberyako, sibalinaba oko byala embere sy’erirya.”
3 Yesu mwasubiryabo ati: “Nenyu ekikaleka imutakwama ebyalayiro by’oMungu busana n’erikwamirira emitsye yenyu niki kwehi?
4 Ng’eky’erileberyako, oMungu mwabugha ati, ‘Usikaye baba waghu na mama waghu,’ kandi ati, ‘Oyukatsuma baba wiwe kutse mama wiwe litolere iniakwa.’
5 Nikwa inywe mukakangiriraya ebindi. Omughulu omundu akabwira baba wiwe kutse mama wiwe ati: “Ekyosi-kyosi ekyo nangakuwatikyamo nabirihererakyo oMungu,”
6 mukabugha muti omundu ng’oyo syakitolere erisikya baba wiwe.’ Neryo mwabirilekerania ekinywa ky’oMungu busana n’emitsye yenyu.
7 Inywe batebya, Isaya mwababughako ndeke-ndeke omo buminyereri ati:
8 ‘Abandu aba bakanisikaya omo buno* buyira, nikwa emitima yabo yiri hali okw’ingye.
9 Bakaniramaya buyira, kusangwa bakakangiriraya ebihano by’abandu nga ni bihano by’oMungu.’”
10 Neryo mwabirikira abandu ati baseghere hakuhi naye, mwababwira ati: “Muhulikirire ngabowisaya.
11 Ekikingira omo buno b’omundu kyo kitemutsandaya; nikwa ekikalua omo buno bwiwe kyo kikamutsandaya.”
12 Neryo abigha biwe mubasa aho ali n’erimubwira bati: “Unasi ngoko Abafarisayo mubakahitana omughulu balyowa ebyo ulyabugha?”
13 Naye mwabasubirya ati: “Obuli muti ogho Tata waghe w’elubula atahera akendikulwa.
14 Mulekebo, ni basondoli ndimetime. Endimetime yamabisondola eyindi ndimetime, ababiri bosi bakatoghera omo kyuna.”
15 Petro mwabwira Yesu ati: “Utubwire omufano* oyu ng’akasonda eribugha atiki.”
16 Yesu mwamusubirya ati: “Erihika aho nenyu simwemwanowa?
17 Simwasi ngoko ekik’ingira omo buno kikahika omo nda neryo ikyalaba?
18 Nikwa emyatsi eyo obuno bukabugha ikalua omo mutima; n’emyatsi eyo yo yikatsandaya omundu.
19 Kusangwa omo mutima mo mukalua amalengekania mabi, obwiti, obusingiri, amaraghane,* obwibi, amabehi, n’ebitsumi.
20 Eyi ye myatsi eyikatsandaya omundu; aliwe erirya butsira erinaba oko byala kyo kitetsandaya omundu.”
21 Yesu mwabya abiluaho mwaya omo kiharo kye Tiro ne Sidoni.
22 Neryo omukali Mufoenike ow’omo kiharo ekyo mwasa amabirikira Yesu ati: “Mukama, Mughala wa Daudi uniwatikaye.* Mwali waghe aliko embinga eyikamwaghalaya kutsibu.”
23 Nikwa Yesu mwatamusubirya n’ekinywa n’ekighuma. Neryo abigha ba Yesu mubasa bamamubwira bati: “Umubwire uti aghende kusangwa abiritukenderya.”
24 Mwabugha ati: “Natumawa oko syombuli esiherire sy’enyumba ye Israeli sisa.”
25 Nikwa omukali oyo mwasa amamunamira n’erimubwira ati: “Mukama, niwatikaye.”
26 Yesu mwamusubirya ati: “Siryowene erimya akalyo k’abana n’erighusirako ebibwana.”*
27 Omukali oyo mwabugha ati: “Eyo ni kwenene Mukama. Aliwe ebibwana* bikanalya emitahangukirya eyikatoghonga oko syomesa sy’abakama babyo.”*
28 Yesu mwamusubirya ati: “Mukali uwite obwikirirya bunene; ekyo ulyasaba kibye.” Neryo, mwali w’omukali oyo mwalw’inialama oko ndambi eyo.
29 Yesu mwaluaho n’eriya hakuhi n’engetse ye Galilaya. Neryo mwirukira oko kitwa. Mwabya abihikako, mwikala.
30 Neryo abandu bangyi mubahika aho ali, bamamuletera abandu abakasindoghera, ebirema, esyondimetime, esyomumu,* n’abandi bangyi. Mubahirabo hakuhi n’ebisando biwe. Naye mwalamya abosi.
31 Abandu mubasweka kutsibu bakalangira esyomumu sikabugha, abakasindoghera bakalama, ebirema bikatoka erighenda, n’esyondimetime sikalangira. Kandi mubapipa oMungu we Israeli.
32 Nikwa Yesu mwabirikira abigha biwe, amabwirabo ati: “Namakwira abandu aba b’obulighe, kusangwa bamabisiba naghe ebiro bisatu kandi isibawite eky’erirya. Sinyanzire eribwirabo niti baghende ibanakwire enzala; kusangwa ibanganaleghetsanira* omo nzira.”
33 Nikwa abigha mubamubulya bati: “Hano tuli hali oko miyi; tukendilusya emikati eyangughutya abandu bosi aba yo hayi?”
34 Yesu mwababulya ati: “Muwite oko mikati mingahi?” Nabo mubamusubirya bati: “Tuwite oko mikati irinda (7) n’ehisamaki hike.”
35 Abere abibwira abandu ati bikale,
36 mwimya emikati irinda (7) eyo n’ehisamaki ehyo. Neryo mwabya abisaba, mwatsutsanga emikati eyo n’ehisamaki ehyo amahabyo abigha biwe, nabo bamaghabirabyo abandu.
37 Abosi mubalya, bamughuta. Kandi mubakuma-kuma ehihande-hihande ehyasighalira; muhyusulya ebitiri irinda (7).
38 Abalya babya balume 4 000. Abakali n’abana mubataghanzwa.
39 Neryo Yesu abere abibwira abandu ati baghende, mwingira omo bwato n’eriya omo kiharo kye Magadane.
Amaelezo awehikwa
^ Kinywa kwa kinywa, “eminywa.”
^ Kinywa kwa kinywa, “omusyo.”
^ Omo Kigiriki ni por·nei′a. Ulebaye amaana w’ebinywa.
^ Kutse “unikwire obulighe.”
^ Kutse “ebyana by’esyombwa.”
^ Kutse “ebyana by’esyombwa.”
^ Kutse “ebyana by’esyombwa.”
^ Kutse “abatebugha.”
^ Kutse “erilembera.”
