Engulu mbuya eyahandikawa na Matayo 16:1-28
16 Neryo Abafarisayo n’Abasadukayo mubahika ahali Yesu. Bakasonda erimulengako mubabugha bati abakolere ekitiko-tiko erilua elubula.
2 Yesu mwasubiryabo ati: “Bukabya bwabya igholo-gholo, mukabugha muti, ‘Omungya obutuku bukendisyuwana kusangwa ekyanya kihenirye.’
3 N’engyakya-ngyakya muti, ‘Munabwire bukendibya mulumbi kusangwa ekyanya kiri n’erangyi y’omuliro kandi kirimo ebitu.’ Munasi eriyiteghererya ebiminyikalo by’ekyanya, aliwe simulitoka eriyiteghererya ebiminyikalo by’emighulu.
4 Abandu b’ekizazi* kino ni babi kandi ni basingiri;* bakahatikana bati bakolerawe ekitiko-tiko. Nikwa sibendihabwa ekindi kitiko-tiko kite ikye n’ekitiko-tiko ky’omuminyereri Yona.” Neryo Yesu mwasighabo aho amaghenda.
5 Neryo abigha mubasokera oko ghundi musirya. Nikwa mubibirirwa eriheka emikati.
6 Yesu mwabwirabo ati: “Isimwayato, kandi muyiteghaye oko kihamya* ky’Abafarisayo n’Abasadukayo.”
7 Neryo mubatsuka eribwirana bati: “Eee! Kwesi twabiribirirwa emikati!”
8 Yesu abere abiminya ebyo bakalengekanaya, mwababulya ati: “Inywe bandu bw’obwikirirya buke, ekikaleka imwabwirana muti simwetaheka emikati niki?
9 Simwemwanowa enzumwa y’ekyo ngabugha? Kutse mwabiribirirwa emikati itano eyo abalume 5 000 balya n’eribirirwa nga mumwakuma-kuma ebitiri bingahi?
10 Kutse mwabiribirirwa emikati irinda (7) eyo abalume 4 000 balya kandi nga mumwakuma-kuma ebitiri bingahi?
11 Neryo ekikaleka imutaminya ngoko sindikanaya nenyu oko mikati niki kwehi? Nikwa muyiteghaye oko kihamya* ky’Abafarisayo n’Abasadukayo.”
12 Neryo mubaminya ngoko syalyababwira ati bayiteghaye oko kihamya* ky’emikati, nikwa oko makangirirya w’Abafarisayo n’Abasadukayo.
13 Yesu abere abihika omo kiharo kye Kaisaria Filipi, mwabulyabo ati: “Abandu bakabugha bati Omughala w’omundu nindi kwehi?”
14 Mubamusubirya bati: “Abaghuma bakabugha bati Yohana Mubatisya, abandi bati Eliya, n’abandi bati Yeremia kutse omughuma w’oko baminyereri.”
15 Mwabulyabo ati: “Ikwa nenyu mukabugha muti nyirindi?”
16 Simoni Petro mwasubirya ati: “Uli Kristo, Mughala w’oMungu oyuliho.”
17 Yesu mwamusubirya ati: “Uli w’obutseme Simoni mughala wa Yona. Kusangwa omundu w’omubiri n’omusasi yutalyakubisulira omwatsi oyu; nikwa Tata waghe oyuli elubula yulyakubisuliragho.”
18 Kandi ngakubwira, uli Petro. N’oko lukuka olu ngendisyahimbako endeko yaghe. N’Eyisinda* siyendisyalengya endeko eyo y’amaka.”
19 Ngendisyakuha amafunguro w’Obwami bw’elubula. Kandi ekyosi-kyosi ekyo ukendisyaboha oko kihugho, kikendisyabya ikyabiribohwa omo lubula. N’ekyosi-kyosi ekyo ukendisyabohola oko kihugho kikendisyabya ikyabiriboholwa omo lubula.”
20 Neryo Yesu mwakongomerera abigha biwe ati isibabwira omundu wosi-wosi ngoko iye yo Kristo.
21 Eritsuka omughulu oyo, Yesu mwatsuka erikanirya abigha biwe ngoko litolere iniaya e Yerusalema; abasondoli b’Abayahudi, n’abahereri bakulu n’abakangirirya b’Emighambo ibamwaghalya kutsibu neryo initibwa n’enyuma sy’ebiro bisatu inialubuka.
22 Neryo Petro mwahengeka Yesu n’eritsuka erimukunga ati: “Isiwayahuliraya ebiri ng’ebyo Mukama; ebyo sibyendikuhikira n’ahake.”
23 Nikwa Yesu mwabindukirya Petro y’omughongo n’erimubwira ati: “Labira enyuma syaghe* iwe Sitani! Uli ndwikale okw’ingye. Kusangwa ukaghaniraya amalengekania w’abandu butsira aw’oMungu.”
24 Neryo Yesu mwabwira abigha biwe ati: “Omundu amanza erinikwama ayighane n’eriheka omuti wiwe w’amaghali, n’erinikwama ebiro byosi.
25 Kusangwa omundu oyukasonda erilamya engebe yiwe akendisyaheryayo, n’oyukaheraya engebe yiwe busana naghe akendisyabanayo.
26 Kusangwa omundu angabana ndundi yahi amabya n’ebyosi ebiri omo kihugho, nikwa iniaherya engebe yiwe? Kutse omundu angahingania engebe yiwe na kindu kyahi kwehi?
27 Kusangwa Omughala w’omundu akendisyasa n’abamalaika biwe omo lukengerwa lwa Tata wiwe. Kandi akendisyaliha obuli mundu erikwamana n’emighendere yiwe.
28 Kwenene ngababwira ngoko hano hane abatendisyahola batebalangira Omughala w’omundu akasa omo Bwami bwiwe.”
Amaelezo awehikwa
^ Kutse “olulengo.”
^ Kutse “bakaleghula.”
^ Kutse “elevire.”
^ Kutse “elevire.”
^ Kutse “elevire.”
^ Kutse “amaka w’oluholo, kinywa kwa kinywa, “esyongyo sy’Ehadesi.” Ulebaye amaana w’ebinywa.
^ Kutse “sinendyowa ebyaghu.”
