Engulu mbuya eyahandikawa na Matayo 17:1-27
17 Habere halaba biro ndatu (6) Yesu mwaghenda na Petro, Yakobo, na Yohana mughala wabo Yakobo. Mubahetukira oko kitwa kiri-kiri bamabyako ibibene.
2 Neryo mwahendukibwa embere syabo. Obusu bwiwe mubwakangabasania ng’eryuba n’esyongyimba siwe musyakolerya ng’ekyakakala.
3 Neryo Musa na Eliya mubababutukira; kandi babya ibanemukania na Yesu.
4 Neryo Petro mwabwira Yesu ati: “Mukama, ni lusunzo okw’itwe eribya hano. Wamanza, ngendihimba hano h’esyohema isatu; eyaghu, eya Musa, n’eya Eliya.”
5 Inyakinabugha, ekitu ekikangabasenie mukyabaswika. Neryo, lebaya! Omulenge mwalua omo kitu mwabugha ati: “Oyu ni Mughala waghe, omwanzwa oyo nabiriligha. Mumwowe.”
6 Abigha babere babyowa eki, mubakukama n’erihira amusu wabo oko kitaka kandi mububaha kutsibu.
7 Neryo Yesu mwasa aho bali; mwabatulako n’eribugha ati: “Muhangane, isimubaha.”
8 Babere babisumba ameso wabo, mubalangira Yesu musa; mubatalangira oghundi mundu.
9 Omughulu babya bakalua oko kitwa, Yesu mwabwira abigha biwe ati: “Isimwakaniraya omundu wosi-wosi ebyo mulyalangira omo nzoli erihika omughulu Omughala w’omundu akendisyalubukibwa erilua oko baholi.”
10 Aliwe abigha biwe mubamubulya bati: “Neryo ekikaleka abakangirirya b’Emighambo ibabugha bati litolere Eliya iniatsuka eryasa niki?”
11 Yesu mwabasubirya ati: “Eliya anemwasa, kandi akendisubya emyatsi yosi.
12 Nikwa ngababwira ngoko Eliya abiryasa aliwe mubatamuminya, kandi mubamukola ngoko banzire. N’Omughala w’omundu ko banemwendimukolera batya; bakendimwaghalya.”
13 Neryo abigha mubaminya ngoko akahula Yohana Mubatisya.
14 Babere bahika ahali abandu bangyi, omundu mwasa ahali Yesu amamukukamira n’eribugha ati:
15 “Mukama, ukwire omughala waghe y’obulighe; akwire ebitutsa kandi alwere kutsibu. Kangyi-kangyi akawa omo liko n’omo maghetse.
16 Munamuletere abigha baghu aliwe mubatitatoka erimulamya.”
17 Neryo Yesu mwabugha ati: “Inywe kizazi* ekitawite obwikirirya kandi ekiherire, ngendisyabya nenyu erihika mughulu wahi kwe? Ngendisyahanda omutima busana nenyu erihika mughulu wahi kwe? Mumulete hano.”
18 Neryo Yesu mwahayira embinga eyo; nayo muyalua oko mulwana oyo, naye mwalw’inialama.
19 Neryo abigha mubasa ahali Yesu ahate bandu. Mubamubulya bati: “Ekiryaleka itwataluka erihighayo niki?”
20 Yesu mwabasubirya ati: “Busana n’obwikirirya bwenyu buke. Kusangwa kwenene ngababwira, mwamabya n’obwikirirya bungana n’akaghuma k’embuto y’eharadali, imukendibwira ekitwa eki muti, ‘Uhume hano, uye erya,’ nakyo ikikendihuma. Kandi isihendibya ekindu ekikendibalema.”
21 * ——
22 Omughulu babya bahindene haghuma e Galilaya, Yesu mwababwira ati: “Omughala w’omundu akendihoterwa, n’erihirwa omo byala by’abandu.
23 Kandi bakendimwita aliwe inialubukibwa enyuma w’ebiro bisatu.” Neryo abigha mubakwa obulighe bunene.
24 Babere bahika e Kapernaumu, abakalihisaya ekitasi* ky’ehekalu mubasa ahali Petro bamamubulya bati: “Omukangirirya wenyu akanaliha ekitasi* ky’ehekalu kwehi?”
25 Petro mwasubirya ati: “Inga, akalihakyo.” Nikwa Petro mwabya abingira omo nyumba, Yesu mwalw’iniamubulya ati: “Simoni, uli n’amalengekania wahi? Abami b’ekihugho bakalihisaya engemu n’omusolo oko bahi kwehi? Oko bana babo kutse oko bandi bandu?”
26 Petro mwabugha ati: “Oko bandi bandu.” Neryo Yesu mwamusubirya ati: “Kwesi abana babo ibo sibaliliha.”
27 Aliwe tukasyabatwikalya; ughende oko ngetse, ughuse endoghano* omo maghetse. Ukendikingula obuno bw’esamaki y’erimbere eyo ukendihamba. Ukendibanamo ekitsere ky’ekitsipa,* ukendimyakyo iwabahakyo. Kikendiliha omusolo waghu n’owaghe.
Amaelezo awehikwa
^ Kutse “olulengo.”
^ Ulebaye endomeko A3.
^ Kinywa kwa kinywa, “esyodrakma ibiri, esilingene n’omupokero w’emisibo ibiri.” Ulebaye endomeko B14.
^ Kutse “omusolo.”
^ Kutse “oburobo.”
^ Kutse “esyodrakma ini, esilingene n’omusahara w’emisibo ini.” Ulebaye endomeko B14.
