Engulu mbuya eyahandikawa na Matayo 18:1-35
18 Oko ndambi eyo abigha mubahika ahali Yesu bamamubulya bati: “Omukulu kutsibu omo Bwami bw’elubula nindi kwehi?”
2 Neryo mwabirikira omwana mulere amamwimania omo kati-kati kabo.
3 Mwabugha ati: “Kwenene-kwenene ngababwira, mwamatendibinduka n’eribya ng’abana balere, isimwendisyingira n’ahake omo Bwami bw’elubula.
4 Neryo oyukayikehaya ng’omwana mulere oyu, yo mukulu kutsibu omo Bwami bw’elubula.
5 Kandi oyukakokaya omwana mulere ng’oyu busana n’erina ryaghe, naghe akabya iniamanikokya.
6 Nikwa oyukaleka omughuma w’oko balere aba abanikirirye iniatwikala, kyanganuwana ibabohera omo bikya biwe m’oluso lunene olukatimbibawa n’epunda, neryo iniasendibwa omo ngetse.”
7 Obulighe oko kihugho busana n’emyatsi eyikaleka abandu ibatwikala! Ni kwenene emyatsi eyikaleka abandu ibatwikala siyendisyabula eribyaho. Aliwe obulighe oko mundu oyukaleka abandu ibatwikala batya.
8 Ebyala byaghu kutse ekisando kyaghu byamabya ibikaleka iwatwikala, utwebyo, ughusebyo. Kusangwa, kwanya iwaherya ebyala byaghu kutse ekisando kyaghu wanamatabana engebe, omo mwanya w’erighuswa omo muliro wa kera na kera ighuneko ebyala bibiri n’ebisando bibiri.
9 Kandi eriso ryaghu ryamabya irikaleka iwatwikala, ukuleryo ughuseryo. Kusangwa, kwanya iwabana engebe ighuneko eriso righuma, omo mwanya w’erighuswa omo Gehena* eyikaka m’omuliro ighuneko ameso abiri.
10 Muyiteghaye isimwaghonera omughuma w’oko balere aba. Kusangwa ngababwira, mughulu wosi omo lubula abamalaika babo bakabya ibane ahali Tata waghe oyuli omo lubula.*
11 * ——
12 Mwangabugha mutiki oko mwatsi ono? Omundu amabya iniawite esyombuli 100, neryo enguma ya kusyo iyahera; isyendisigha esyombuli 99 oko bitwa neryo iniayasondya enguma eyiryahera?
13 Kandi amabibanayo, ngababwira ekwenene, akatsema busana nayo kwilaba esyombuli 99 esitalyahera.
14 Kutya Tata waghe oyuli elubula syanzire n’ahake omughuma w’oko balere aba akahera.
15 N’ekindi, omulikyenyu amabikosa, ughende ukanaye naye oko mwatsi oyo imune inywe babiri basa. Amabikwowa, ighukendibya iwamawatikya mulikyenyu erisuba oko nzira eyitolere.
16 Nikwa amatendikowa, usubeyo n’oghundi mundu mughuma kutse babiri, kundi eriminya omwatsi nga ni w’ekwenene kutse iyehe, ritolere ihabya abimiri* babiri kutse basatu.
17 Amatendibowa, iwabwira endeko. Amatendyowa n’endeko, iwamulangira ng’omundu w’ebindi bihanda kutse ng’oyukalihisaya ebitasi.*
18 Oko kwenene ngababwira, emyatsi yosi eyo mukendisyaboha oko kihugho, ikendisyabya iyabiribohwa n’omo lubula. N’emyatsi yosi eyo mukendisyabohola oko kihugho, ikendisyabya iyabiriboholwa n’omo lubula.
19 Kandi, kwenene ngababwira, abandu babiri okw’inywe bamabilighirana oko kihugho erisaba busana n’omwatsi mulebe w’omughaso, Tata waghe w’elubula iniakendibakoleragho.
20 Kusangwa ahali abandu babiri kutse abasatu abahindene omo rina ryaghe, naghe ngabya inineho omo kati-kati kabo.
21 Neryo Petro mwasa ahali Yesu amamubulya ati: “Mukama omulikyetu oyukanikosera, litolere inamughanyira kangahi? Ngendo irinda (7) kwehi?”
22 Yesu mwamubwira ati: “Ngakubwira butsira ngendo irinda (7) nyisa, aliwe ngendo 77.”
23 Busana n’ekyo, Obwami bw’elubula bwanganasosekanibwa n’omwami mughuma oyo wanza eribughirana n’abaghombe biwe ababya n’amadeni wiwe.
24 Abere atsuka omubiiri w’eribughirana nabo, mubamuletera omulume mughuma oyo wabya n’edeni yiwe y’esyotalanta 10 000.*
25 Nikwa, kundi abya isyangatoka eriliha edeni eyo, omukama wiwe mwabugha ati baghulaye omulume oyo, omukali wiwe, n’abana biwe, n’ebindu biwe byosi; edeni eyo yitoke erilihwa.
26 Neryo omughombe oyo mwakukama n’eryunama embere sy’omukama wiwe. Mwamubwira ati, ‘Mukama, utasyamba akatambi, ngendisyakuliha ebyosi.’
27 Omukama mwakwira omughombe oyo y’obulighe. Neryo mwamuleka n’erimughanyira edeni eyo.
28 Omughombe oyo mwahuluka mwahindana n’oghundi mughombe mulikyabo oyo wabya n’edeni yiwe y’esyodinari* 100. Neryo mwamuhamba, amatsuka erimughatsula n’erimubwira ati: “Unilihe edeni yaghe yosi.”
29 Neryo omughombe mulikyabo oyo mwakukama amatsuka erimulemba-lemba ati, ‘Kisi, tasyamba akatambi, ngendikuliha.’
30 Aliwe mwaghana. Nikwa mwayamughusa omo ngomo erihika aho akendisyamulihira edeni yiwe.
31 Abaghombe balikyabo babere balangira omwatsi oyo, mubakwa obulighe bunene. Neryo mubayabwira omukama wabo y’emyatsi yosi eyo.
32 Neryo omukama wiwe mwamubirikira n’erimubwira ati: ‘Iwe mughombe mubi! Wabere wabinilemba-lemba munakubughira edeni yaghu yosi,
33 neryo naghu siwangaghanyire omughombe mulikyenyu ngoko naghe nakughanyira kwehi?’
34 Omukama wiwe mwakapikira kutsibu. Neryo mwamughusa omo ngomo* erihika aho akendisyalihira edeni yiwe yosi.
35 Tata waghe w’elubula naye kw’anemwendisyakolera atya obuli mughuma w’okw’inywe amatendibya akaghanyira omulikyabo erilua oko mutima.”
Amaelezo awehikwa
^ Ulebaye amaana w’ebinywa.
^ Kutse “omughulu wosi bakabya ibanemulola oko busu bwa Tata waghe oyuli elubula.”
^ Ulebaye endomeko A3.
^ Kutse “abatemwe.”
^ Kutse “omusolesya.”
^ Esyotalanta 10 000 sy’efeza silingene n’esyodinari miliyoni makumi sita (60 000 000). Ulebaye endomeko B14.
^ Ulebaye endomeko B14.
^ Kutse “mwamuhira omo byala by’abateya b’omuliki.”
