Engulu mbuya eyahandikawa na Matayo 19:1-30
19 Yesu mwabya abikania emyatsi eyi, mwalua e Galilaya amasokera oko ghundi musirya we Yordani, oko mipaka* ye Yudea.
2 N’abandu bangyi kutsibu mubamukwama. N’eyo, mwalamya abakoni.
3 Kandi Abafarisayo mubasa aho ali. Bakasonda erimulengako, mubamubulya bati: “Erikwamana n’Emighambo, omulume anahamulirwe eritwa endwa na mukali wiwe busana n’obuli mwatsi?”
4 Yesu mwasubirya ati: “Simwetasoma ngoko oyo wahangyikabo, erilua oko nzuko, mwabahangyika omulume n’omukali?
5 Kandi ngoko mwabugha ati: ‘Busana n’omwatsi oyu, omulume akendisyasigha baba wiwe na mama wiwe, naye akendisyamatana na mukali wiwe, neryo ibo babiri bakendisyabya mubiri mughuma?’
6 Neryo ibabya isibakiri babiri; nikwa mubiri mughuma. Okw’ekyo, ekyo oMungu abirimatania haghuma, isihabya omundu oyukaghabulakyo.”*
7 Mubamubwira bati: “Neryo busanaki Musa mwabugha ati omundu iniaha omukali y’ebaruha y’eritwa endwa, n’erimutibitako kwehi?”
8 Mwababwira ati: “Musa mwabalighira eritwa endwa n’abakali benyu busana n’emitima yenyu eyikalire. Aliwe ko byatabya bitya oko nzuko.”
9 Ngababwira ngoko obuli mundu oyukatwa endwa na mukali wiwe, kite busana n’obusingiri,* neryo iniatahya oghundi mukali; omundu oyo akabya iniamasingira.”
10 Abigha mubamubwira bati: “Omwatsi w’omulume n’omukali amabya iko ali atya, kwesi isiritolere omundu akatahya.”
11 Mwasubiryabo ati: “Si ba bandu bosi bo bakatoka erikola omwatsi ogho mwamabugha oyo. Abawite ekihembo ekyo basa bo bakatoka erikola batya.
12 Kusangwa hane abandu abatetahaya kundi babutawa ini bakonwe, n’abandi sibalitahaya kundi abandu babiribayira mo bakonwe, n’abandi sibalitahaya kundi babiriyiyira mo bakonwe busana n’Obwami bw’elubula. Oyo wangaligha omwatsi oyu alighegho.”
13 Neryo abandu mubaletera Yesu y’abana balere bati ahire kubo kw’ebyala n’erisabirabo. Aliwe abigha mubakunga abandu abo.
14 Nikwa Yesu mwabugha ati: “Muleke abana. Kandi isimwabakakiraya eryasa eyo niri. Kusangwa Obwami bw’elubula ni bw’abandu abali ng’abana.”
15 Neryo mwahira kubo kw’ebyala, amaluaho.
16 Neryo omundu mwasa ahali Yesu, amamubwira ati: “Mukangirirya, ni myatsi yahi mibuya yo nitolere erikola imo nasyabana engebe y’erikota?”
17 Yesu mwamubwira ati: “Ekikaleka iwanibulya oko myatsi mibuya niki? Omubuya ni mughuma musa. Aliwe wamabya ighunanzire eribana engebe, ukwame ebyalayiro ebiro byosi.”
18 Mwamubulya ati: “Ebyalayiro byahi?” Yesu mwamusubirya ati: “Isiwita, isiwasingira, isiwiba, isiwabugha amabehi,
19 usikaye baba waghu na mama waghu, kandi ritolere iwanza mulikyenyu ngoko uyanzire.”
20 Omulwana oyo mwabwira Yesu ati: “Ebyalayiro byosi ebyo ngakwamabyo. Nikisiya kyahi kwehi?”
21 Yesu mwamubwira ati: “Wamabya iwanzire erihika-hikana;* ughende, uyaghulaye ebindu byaghu byosi n’eriwatikya abera. Aho, ukendibya iwamabya n’ebindu omo lubula. N’enyuma syaho, wase unikwame.
22 Omulwana oyo mwabya abyowa ekyo, mwaluaho iniabirisusumana kundi abya n’ebindu bingyi.
23 Neryo Yesu mwabwira abigha biwe ati: “Kwenene-kwenene ngababwira, likendisyakala oko muteke eringira omo Bwami bw’elubula.
24 Kandi ngababwira lyolobire oko ngamia erilaba omo kuna k’esindani kwilaba omuteke eringira omo Bwami bw’oMungu.”
25 Abigha mubabya babyowa eki, mubasweka kutsibu. Mubabugha bati: “Oyo wangatoka erilamibwa nindi kwe?”
26 Yesu mwatungererabo n’eribugha ati: “Oko bandu ekyo sikitokekene, aliwe oko Mungu emyatsi yosi ikatokekana.”
27 Neryo Petro mwabugha ati: “Ibwa itwe, ka twabirisigha ebindu byetu byosi n’erikukwama; tukendisyabanaki kwehi?”
28 Yesu mwababwira ati: “Oko kwenene ngababwira, omo mughulu w’erihangyika lihya-lihya; omughulu Omughala w’omundu akendisyikala oko kitumbi kiwe ky’obwami eky’olukengerwa, inywe mwabirinikwama, mukendisyikala oko bitumbi 12 by’obwami mukatswera ebihanda 12 bye Israeli.
29 Kandi obuli mundu oyo wabirisigha amanyumba kutse abaghala babo, kutse abali babo, kutse baba, kutse mama, kutse abana, kutse ebitaka, busana n’erina ryaghe, akendisyabanabyo ngendo 100 kwilaba aho. Kandi akendisyabana engebe y’erikota.
30 “Nikwa abangyi abali b’erimbere lino bakendisyabya b’enduli; n’ab’enduli, bakendisyabya b’erimbere.
Amaelezo awehikwa
^ Kutse “emitano.”
^ Kutse “oyukakatulakyo.”
^ Omo Kigiriki ni por·nei′a. Ulebaye amaana w’ebinywa.
^ Kutse “eriluyirirana.”
