Engulu mbuya eyahandikawa na Matayo 2:1-23
2 Yesu mwabya abibutirwa e Betlehemu ye Yudea omo biro by’Omwami Herode,* abakalaghula omw’ilebya esyongununu mubalua eluhande lw’eyo eryuba rikasira bakasa e Yerusalema.
2 Mubabugha bati: “Omwami w’Abayahudi oyulyabutawa ali hayi? Kundi mutukalangira engununu yiwe itune eluhande lw’eyikasira eryuba. Neryo tulyasa erisyamukukamira.”
3 Omwami Herode abere abyowa omwatsi oyo, mwahangya-hagya; iye n’abandu bosi be Yerusalema.
4 Mwahindania abakulu bosi b’abahereri n’abahandiki, amabulyabo Kristo* ng’angabutirwe hayi.
5 Mubamusubirya bati: “E Betlehemu ye Yudea; kundi omuminyereri mwahandika ati:
6 ‘Naghu Betlehemu y’omo muyi we Yuda, sighuli muyi muke n’ahake omo meso w’abatabali be Yuda. Kusangwa omw’iwe mwasyalua omutabali oyukendisyateya abandu baghe Israeli.’”
7 Neryo Herode mwabirikira omo bubiso-biso abakalaghula omw’ilebya esyongununu. Mwabuliriryabo engununu eyo nga yiryalangirika mughulu wahi.
8 Omughulu abatuma e Betlehemu, mwababwira ati: “Mughende muyasonda-sondaye aho omwana oyo angabya. Mukendibya mwamubana, imwasyanibwira naghe nitoke eriyayo eriyamukukamira.”
9 Mubabya babyowa ebyo omwami ababwira, mubaghenda. Neryo engununu eyo balangira ibane eluhande lw’eyikasira eryuba, muyababera embere. Neryo muyabya yahika endata oko nyumba eyo omwana oyo abyamo, muyimana.
10 Mubabya babilangira engununu eyo, mubatsema kutsibu.
11 N’omughulu bingira omo nyumba, mubalangira omwana inyane na Maria mama wiwe. Neryo mubamukukamira. Kandi mubakingula ehisanduku hyabo n’eriha omwana y’ebihembo. Mubamuha: Ehoro, oubani, n’amane-mane.
12 Aliwe kundi oMungu mwabwirabo omo nzoli ati isibasuba eyiri Herode, mubalaba omo yindi nzira, bamasuba ewabo.
13 Babere babighenda, omumalaika wa Yehova* mwahulukira Yozefu y’omo nzoli. Mwamubwira ati: “Uhangane utibite e Misri haghuma n’omwana na mama wiwe. Isimwasyaluayo nitenababwira niti mulueyo. Kundi hakisiya hake Herode inyasondya-sondya omwana oyu atoke erimwita.”
14 Neryo Yozefu mwahangana omo kiro amatibita e Misri iye n’omwana na mama w’omwana.
15 Mwasighalayo erihika oko mughulu Herode ahola. Ekyo mukyaberererya ebyo Yehova* abugha erilabira omuminyereri wiwe ati: “Munabirikira mughala waghe niti alue e Misri.”
16 Herode mwabya abilangira ngoko abakalaghula omw’ilebya esyongununu babirimuteba, mwahitana kutsibu. Neryo mwabugha ati abana bosi b’obulume b’eBetlehemu n’omo biharo by’endambi-ndambi, eritsuka oko myaka ibiri erindaghala bitawe. Abugha ati eritsuka oko myaka ibiri n’erindaghala, erikwamana n’omughulu ogho abakalaghula omw’ilebya esyongununu bamubwira.
17 Neryo, ebinywa by’omuminyereri Yeremia mubyabererera. Mwabugha ati:
18 “Ekiriro kinene mukyowika omo muyi we Rama. Kyabya kiriro kya Rakeli akalira abana biwe. Mwaghana erikiranibwa kundi abana biwe ibabirihola.”*
19 Herode abere abihola, omumalaika wa Yehova* mwahulukira Yozefu y’omo nzoli. Oko mughulu oyo Yozefu abya inyakine e Misri.
20 Omumalaika mwabwira Yozefu ati: “Hangana, uheke omwana na mama wiwe, musube omo kihugho kye Israeli. Kundi ababya bakasonda eryita omwana babirihola.”
21 Neryo mwahangana, amaheka omwana na mama wiwe, bamasuba omo kihugho kye Israeli.
22 Aliwe mwowa ngoko Arkelayo yo wabya akatabala e Yudea omo mwanya wa baba wiwe ye Herode. Neryo mwasagha eriyayo. Nikwa kundi oMungu mwamubwira omo nzoli eky’erikola, mwaghenda omo kiharo kye Galilaya.
23 Neryo mwayikala omo muyi owakahulawa mo Nazareti. Ekyo mukyaberererya ebinywa bino, ebyabughawa n’abaminyereri: “Akendisyahulwa mo Munazareti.”*
Amaelezo awehikwa
^ Ulebaye amaana w’ebinywa.
^ Kutse “Masiya, Oyuhirirweko Amaghuta.”
^ Ulebaye endomeko A5.
^ Ulebaye endomeko A5.
^ Kutse “isibakiri.”
^ Ulebaye endomeko A5.
^ Alinga kiluire omo kinywa ky’Ekiebrania ekikasonda eribugha kiti “erisasa.”
