Engulu mbuya eyahandikawa na Matayo 20:1-34
20 Kusangwa Obwami bw’elubula buli ng’omukama w’enyumba oyo watsinduka akayarondya abahingyi abakendikola omo ririma liwe ry’emizabibu.
2 Mwabya abilighirana n’abahingyi ngoko akendibaliha edinari* nguma oko kiro, mwabatuma omo ririma liwe ry’emizabibu.
3 Kandi mwahuluka oko yiri nga saa isatu, mwalangira abandi bandu ibanimene omo soko* isibawite mubiiri.
4 Nabo mwababwira ati, ‘Nenyu mughende omo ririma ry’emizabibu. Ngendibaliha esyofranga esyo mutolere.’
5 Neryo mubaya omw’irima. Kandi omukama w’eririma mwahuluka oko yiri nga medi y’eritungyi n’oko yiri nga saa tisa; mwaleta abandi bahingyi.
6 N’oko yiri nga saa kumi na moya, mwahuluka; mweya abandi bandu ibanimene kandi isibawite omubiiri. Mwababulya ati, ‘Busanaki mwimene hano ho buyira omo musibo wosi kwehi?’
7 Mubamusubirya bati, ‘Kusangwa situtabana oyukatuha omubiiri.’ Naye mwababwira ati, ‘Nenyu mughende omo ririma ry’emizabibu.’
8 “Erigholo ryabere ryahika, omukama w’eririma mwabirikira omughombe wiwe oyukimanira abahingyi. Mwamubwira ati, ‘Ubirikire abahingyi; uhebo obuhingyi bwabo. Utsuke oko balyahika oko mwiso, n’eribughira oko balyahika erimbere.’
9 Abahinga oko saa kumi na moya babere bahika, obuli mughuma wa kubo mwahabwa edinari* nguma.
10 Abatsuka omw’irima babere bahika, mubalengekania bati bakendihabwa nyingyi okw’aho. Aliwe nabo mubahabwa edinari* nguma.
11 Babere bahabwa edinari eyo, mubatsuka eriyilungumula oko mukama w’enyumba.
12 Mubabugha bati, ‘Abalyahinga oko mwiso mubakakola omo saha nguma nyisa; aliwe nabo wamabaha esingaha n’esyetu itwe tulyasiba tukanuba omo ryuba!’
13 Nikwa omukama mwasubirya omughuma wa kubo ati, ‘Tahi mulikyetu! Sinitakukola nabi. Mutukalighirana ngoko ngendikuha edinari* nguma, ko bite bitya?
14 Wimaye obuhingyi bwaghu, ughende. Oyulyatsuka oko mwiso naye nanzire inamuha esilingene n’esyaghu.
15 Nyiri n’ehamuli y’erikola ebyo nanzire omo bindu byaghe, ko bite bitya? Kutse ukatsura* kundi nyiri mubuya* kwehi?’
16 Litya ab’erimbere bakendisyabya b’omwiso; n’ab’omwiso bakendisyabya b’erimbere.”
17 Yesu iniane omo nzira akaya e Yerusalema, mwahengeka abigha biwe 12. Neryo ibane omo nzira mwababwira ati:
18 “Tukahetukira e Yerusalema; n’eyo Omughala w’omundu akendihirwa omo byala by’abahereri bakulu n’abakangirirya b’Emighambo. Nabo bakendimutswera oluholo.
19 Kandi bakendimuhira omo byala by’abandu b’ebihanda; bamusekereraye n’erimuhunza omo bikoba n’erimuhanika oko muti. Neryo ekiro ky’akasatu akendisyalubukibwa.”
20 Neryo mama w’abaghala ba Zebedayo iniane n’abaghala biwe, mwasa ahali Yesu, amunama embere siwe n’erimusaba ati amukolere omwatsi mulebe.
21 Yesu mwamubulya ati: “Ukasondaki kwehi?” Naye mwamusubirya ati: “Uhamule uti abaghala baghe aba, omughuma asyikala oko luhande lwaghu lw’amali n’oghundi oko lw’amalembe omo Bwami bwaghu.”
22 Yesu mwasubirya ati: “Simwasi ekyo mukasaba. Mwanganatoka erinywa ekikombe* ekyo nikisiya inanywa?” Mubamusubirya bati: “Inga.”
23 Yesu mwabwirabo ati: “Kwenene mukendisyanywa oko kikombe kyaghe. Aliwe eryikala oko luhande lwaghe lw’amali kutse olw’amalembe, singye ngahamulakyo; Tata waghe yukasombola abakendisyikala omo myanya eyo.”
24 Abandi bakwenda erikumi, babere babyowa omwatsi oyo, mubahitana oko bandi bigha babiri abo.
25 Aliwe Yesu mwabirikira abosi, amabwirabo ati: “Munasi ngoko abatabali b’abandu bakatabala kubo, n’abakulu babo bakabya n’ehamuli kubo.
26 Inywe simutolere mukabya mutya. Aliwe oyo wanzire eribya mukulu omo kati-kati kenyu litolere iniakolera abandi,
27 n’oyo wanzire eribya w’erimbere omo kati-kati kenyu, litolere iniabya mughombe wenyu.
28 Kusangwa Omughala w’omundu mwatasa busana n’erikolerwa; aliwe mwasa erikolera abandi n’eriherera engebe yiwe mo mbanulo busana n’abandu bangyi.”
29 Omughulu babya bakalua e Yeriko, abandu bangyi mubamukwama.
30 Neryo abalume babiri, esyondimetime ababya bikere oko musike w’enzira mubowa ngoko Yesu anemulaba. Neryo mubabirikira bati: “Mukama, mughala wa Daudi utuwatikaye!”*
31 Nikwa abandu mubabakunga n’eribabwira bati babye bukutu. Aliwe mubabirikira kutsibu okw’aho bati: “Mukama, mughala wa Daudi utuwatikaye!”*
32 Neryo Yesu mwimana, amababirikira n’eribabulya ati: “Mwanzire inabakoleraki kwehi?”
33 Mubamubwira bati: “Mukama, ulibule ameso wetu.”
34 Yesu mwabakwira obulighe amatula oko meso wabo. Nabo mubalw’ibatsuka erilangira. Neryo mubamukwama.
Amaelezo awehikwa
^ Ulebaye endomeko B14.
^ Kutse “akatale.”
^ Ulebaye endomeko B14.
^ Ulebaye endomeko B14.
^ Ulebaye endomeko B14.
^ Kinywa kwa kinywa, “ukabya n’eriso ribi.”
^ Kutse “Oyukahitaya, Omwenge.”
^ Kutse “olutehi.”
^ Kinywa kwa kinywa, “utukwire obulighe.”
^ Kinywa kwa kinywa, “utukwire obulighe.”
