Engulu mbuya eyahandikawa na Matayo 21:1-46
21 Babere bahika e Betfage, oko Kitwa ky’Emizeituni hakuhi ne Yerusalema; Yesu mwatuma abigha biwe babiri.
2 Mwababwira ati: “Mughende oko mulongo olya; mukendilw’imwalangira epunda iyinahangire n’ekyana kyayo. Muhangulesyo, munileteresyo.
3 Omundu amababulya, imwamubwira muti, ‘Omukama amalagha kusyo.’ Akendilw’iniatumasyo.”
4 Ekyo mukyabya busana n’eriberererya ekyo omuminyereri abugha ati:
5 “Mubwire mwali we Sioni muti: ‘Lebaya! Omwami waghu anemwasa eyo uli. Ni w’omutima molo. Anikere oko punda; inga, oko kyana ky’epunda.’”
6 Neryo abigha mubaghenda, n’erikola ngoko Yesu analyabalayira.
7 Mubaleta epunda n’ekyana kyayo. Kandi mubahira kusyo kw’esyongyimba syabo. Naye mwikala kusyo.*
8 Abandu bangyi mubasanza esyongyimba syabo sy’omo nzira; n’abandi mubatwa ebisanza by’emiti, bamasesabyo omo nzira.
9 Kandi abandu ababya embere siwe, n’abandi ababya enyuma siwe, mubabya bakabirikira omo mulenge muli bati: “Tukakusaba Mungu, ulamaye, Omughala wa Daudi! Omuyisa ali oko oyukasa omo rina rya Yehova!* Iwe uli endata kutsibu; tukakusaba, umulamaye!”
10 Neryo mwabya abingira omo muyi we Yerusalema, omuyi wosi mwahuha-huhana. Abandu mubabulania, bati: “Oyu nindi kwe?”
11 Ekikumula ky’abandu ababya na Yesu, mubabya bakasubirya bati: “Oyu ni Yesu, omuminyereri; owe Nazereti ye Galilaya!”
12 Yesu mwingira omo hekalu; neryo mwahighira ehihya abakaghulirayamo n’erighuliramo. Mwakunanga ehimesa hy’abakahinganaya esyofranga, n’ebitumbi by’abakaghulaya ehilikuku.
13 Mwabwirabo ati: “Kyabirihandikwa kiti, ‘Enyumba yaghe, ikendisyahulwa mo nyumba y’erisabiramo;’ nikwa inywe mukayirayo mo bwikalo bw’abanyeyi.”
14 Kandi, esyondimetime n’ebirema mubasa eyiri Yesu omo hekalu; naye mwalamyabo.
15 Abakulu b’abahereri n’abakangirirya b’Emighambo mubahitana omughulu balangira emyatsi y’eriswekera eyo akola, n’omughulu balangira ehilwana ehyabya hikabirikira omo hekalu, hiti: “Mungu tukakusaba, ulamaye Mughala wa Daudi!”
16 Mubamubwira bati: “Unowire ebyo aba bakabugha kwe?” Yesu mwabasubirya ati: “Ninowire. Simwetasoma amasako awakabugha ati, ‘Wabiriteghekania amuno w’abana n’aw’esyomekeke erikupipa’?”
17 Yesu mwabasigha, amalua omo muyi we Yerusalema. Neryo mwaya e Betania, amaghotserayo.
18 Engyakya-ngyakya, Yesu akasuba e Yerusalema, mwakwa enzala.
19 Mwalangira omuti w’omutini oko musike w’enzira. Neryo mwaya ahali omuti oyo; nikwa, mwatabanako kindu; kwabya ebiti bisa. Mwabwira omuti oyo ati: “Isiwasyasyahetaya n’ahake.” N’omuti w’omutini oyo, mwalw’inyuma.
20 Abigha babere babilangira eki, mubasweka kutsibu. Mubabugha bati: “Omuti w’omutini amalw’inyuma ati?”
21 Yesu mwabasubirya ati: “Oko kwenene ngababwira, mwamabya n’obwikirirya kandi mutetabyamo eritika-tika, imukendisyakola ekilengire ekyo niryakolera omuti w’omutini. Nibya imukendibwira n’ekitwa eki, muti, ‘Ukulike hano uye omo ngetse.’ Ekyo mwamabugha ikikendibya.
22 Kandi emyatsi yosi eyo mukasaba imunikirirye, mukendisyahabwayo.”
23 Yesu mwabya abingira omo hekalu, abakulu b’abahereri n’abasondoli b’Abayahudi mubasa aho ali inianemukangirirya. Mubamubulya bati: “Ukakola emyatsi eyi omo hamuli yandi? Kandi nindi yo wakuha ehamuli eyi?”
24 Yesu mwasubiryabo ati: “Naghe ngendibabulya omwatsi mughuma. Mwamabinisubirya, naghe ingendibabwira ng’angakola emyatsi eyi omo hamuli yandi:
25 Olubatiso lwa Yohana Mubatisya lwalua hayi? Lwalua oko Mungu* kutse oko bandu?” Nikwa mubatsuka eribwirana bati: “Twamabibugha tuti, ‘Lwalua oko Mungu,’ iniakenditubulya ati, ‘Neryo, ekyaleka imutamwikirirya niki?’
26 Aliwe kandi sitwangabugha tuti, ‘Lwalua oko bandu.’ Tukubaha kundi abandu banganatukola nabi; kusangwa ibo basi Yohana mo muminyereri.
27 Neryo mubasubirya Yesu bati: “Sitwasi.” Naye mwababwira ati: “Kwesi, naghe sinendibabwira nga ngakola emyatsi eyi omo hamuli yandi.
28 “Mwangabugha mutiki oko mwatsi ono? Habya omundu iniawite abana babiri. Neryo mwabwira ow’erimbere ati, ‘Mwana waghe, ughende ukole omubiiri omo ririma ry’emizabibu munabwire.’
29 Omwana oyo mwamusubirya ati, ‘Sinyanzire.’ Aliwe enyuma syaho mwayisubako, amayayo.
30 Mwahikira ow’akabiri, amamubwira ebinywa ebyo analyabwira ow’erimbere. Mwamusubirya ati, ‘Ngendiyayo Baba.’* Nikwa mwatayayo.
31 Oko babiri, oyo wakola erisonda lya baba wiwe nindi?” Mubamusubirya bati: “Ow’erimbere.” Yesu mwabasubirya ati: “Oko kwenene ngababwira, abakalihisaya ebitasi* n’abambalaka banemubatanga omo Bwami bw’oMungu.
32 Kundi Yohana mwasa eyo muli n’eribakangania enzira eyitunganene,* aliwe mumutamwikirirya. Abakalihisaya ebitasi* n’abambalaka ibo mubamwikirirya; kandi nomo mwanalangira ekyo, mumutabindula emitima yenyu n’erimwikirirya.
33 “Muhulikirire oghundi musyo: Habya omundu, iniawite ekitaka. Mwahira mukyo mw’eririma ry’emizabibu; amatimbya kulyo ko luba, n’erihiramo ah’erikamira edivai. Kandi mwahimbamo omunara, amasighiralyo abalimi n’erighenda omo kindi kihugho.
34 Ekirimo ky’eryera ry’emizabibu kyabere kyahika, mwatuma abaghombe biwe eyiri abalimi eriyamuletera oko mizabibu.
35 Aliwe, abalimi mubahamba abaghombe abo; mubahunza omughuma, oghundi bamamwita, n’oghundi bamamuhunza omo mabwe.
36 Mwasyatuma abandi baghombe; abangyi kulenga ab’erimbere. Aliwe nabo, abalimi mubabakolera ng’ab’erimbere.
37 Oko nduli, mwatuma mughala wiwe. Mwayibwira ati, ‘Bakendisikya mughala waghe!’
38 Abalimi babere balangira omughala wiwe, mubabwirana bati, ‘Oyu, yo mwenye omwandu! Mwase tumwite; tutoke erimya omwandu wiwe!’
39 Neryo mubamuhamba, bamamughusa ehihya w’eririma ry’emizabibu, n’erimwita.
40 Neryo, omwenye ririma ry’emizabibu akendisyabya asa, akendisyayira abalimi abo b’ati?”
41 Mubamusubirya bati: “Kundi abalimi abo ni babi, omwenye ririma akendisyabatoghotya. Neryo inyahira eririma ly’omo byala by’abandi balimi abakendisyabya bakamuha amatunda oko kirimo kyagho.”
42 Yesu mwababwira ati: “Simwemwatasoma Amasako awakabugha ati, ‘Eribwe eryo abahimbi baghana, ryabiribya ribwe rikulu ry’oko ngonde.* Omwatsi oyu akalua oko Yehova* kandi ni w’eriswekera omo meso wetu’?
43 Busana n’ekyo ngababwira ngoko mukendisaghulwa Obwami bw’oMungu; nabo bukendihabwa ekihanda ekikahetaya amatunda wabo.
44 Kandi oyukendisyayitinira oko ribwe eri, akendisyabunangika kutsibu. N’omundu wosi-wosi oyo likendisyatererako, rikendisyamubunzungula.”
45 Abakulu b’abahereri n’Abafarisayo, mubabya babyowa emisyo yiwe, mubaminya ngoko ibo bo akahula.
46 Mobasonda erihamba Yesu. Aliwe mububaha abandu; kundi abandu ibasi Yesu mo muminyereri.
Amaelezo awehikwa
^ Ekinywa “kusyo,” alinga hano kikahula esyongyimba.
^ Ulebaye endomeko A5.
^ Kinywa kwa kinywa, “lwalua elubula?”
^ Kinya kwa kinywa “mukama waghe.”
^ Kutse “abasolesya.”
^ Kutse “omo nzira y’eritunganene.”
^ Kutse “abasolesya.”
^ Kutse “esonda.”
^ Ulebaye endomeko A5.
