Engulu mbuya eyahandikawa na Matayo 22:1-46
22 Kandi, Yesu mwabakanirya eyindi misyo, ati:
2 “Obwami bw’elubula bwanganasosekanibwa n’omwami oyo wateghekanaya akalyo kanene busana n’endwa ya mughala wiwe.
3 Neryo mwatuma abaghombe biwe eriyabirikira abandu ababirikirawa oko ndwa eyo. Aliwe, abandu abo mubaghana eryasa.
4 Kandi mwatuma abandi baghombe. Mwababwira ati, ‘Muyabwire abalyakokibawa muti: “Nabiriteghekania akalyo, nabirikera esyonume syaghe sy’esyonde, n’esyonyama syaghe esinenehire. Nabiriteghekania obuli mwatsi; mwase oko ndwa.”’
5 Aliwe, mubatatsomana. Abaghuma mubaya omo malima wabo, n’abandi mubaya omo mibiiri yabo.
6 Nikwa n’abandi mubahamba abaghombe b’omwami, bamabakola nabi, n’eritabo.
7 “Omwami mwahitana kutsibu. Neryo mwatuma abasuda biwe, bamayita abiti abo, n’eritimya omuyi wabo.
8 Neryo mwabwira abaghombe biwe ati, ‘Emyatsi yosi yabiriteghekanibwa; aliwe abalyabirikirawa sibalue batolere.
9 Neryo, Mughende omo syonzira nene-nene sy’omuyi, mubirikire obuli mundu oyo mukendisunga, muti ase oko ndwa.’
10 Neryo, abaghombe mubaya omo syonzira. Mubaleta abosi abo basunga; ababi n’ababuya. Neryo ekyumba ekyabyamo endwa mukyusulamo abandu ababya bakalya.*
11 “Omughulu omwami ingira omo kyumba ekyabyamo endwa akasyalebya abagheni, mwalangira omulume oyutambite olukimba lw’endwa.
12 Mwamubulya ati, ‘Tahyee, ul’ingira muno mo ghuti isiwambite olukimba lw’endwa?’ Omulume oyo mwabula eky’erisubirya.
13 Okw’ekyo, omwami mwabwira abaghombe biwe ati, ‘Mumubohe oko byala n’oko bisando. Mumughuse ehihya omo mwirimya. Eyo akendilira n’erikeregheta ameno.’
14 “Kusangwa abakabirikirawa ni bangyi, aliwe abakasombolawa ni bake.”
15 Neryo Abafarisayo mubaghenda, bamaya embita erilangira nga bangamutegha bati omo binywa biwe.
16 Neryo, Abafarisayo mubamutumako abigha babo, haghuma n’abandu b’omo kyama kya Herode, bati: “Mukangirirya, tunasi ngoko ukabugha ekwenene, kandi ngoko ebyo ukakangiriraya oko Mungu ni by’ekwenene. Kandi sulirondaya enyanzawe oko bandu; kusangwa sulikwama erilangirika ry’ehihya ly’abandu.
17 Neryo, utubwire amalengekania waghu. Erikwamana n’Emighambo, linatolere eriliha Kaisari y’omusolo?”
18 Nikwa, kundi Yesu abya inianasi amalengekania wabo mabi, mwabugha ati: “Inywe batebya, ekikaleka imwanilengako niki?
19 Munikanganaye ekitsere ky’omusolo.” Neryo mubamuletera edinari.*
20 Yesu mwabulyabo ati: “Epitsa eyi, n’ebihandiko ebi, ni byandi?”
21 Mubamusubirya bati: “Ni bya Kaisari.” Neryo mwabwirabo ati: “Kwesi, mulihe Kaisari y’ebindu bya Kaisari, n’oMungu ebindu by’oMungu.”
22 Mubabya babyowa ekyo, mubasweka kutsibu. Neryo mubaluaho bamaghenda.
23 Ekiro ekyo Abasadukayo mubasa ahali Yesu. Abasadukayo bikirirye bati sihali erilubuka. Mubamubulya bati:
24 “Mukangirirya, Musa mwabugha ati: ‘Omundu amabihola isyalyabuta abana, litolere mughala wabo inyasighalya omukali oyo, atoke eributira mughala wabo y’abana.’
25 Neryo, habya abalume irinda (7) abasubeneko. Ow’erimbere mwatahya neryo amahola. Aliwe kundi abya isyawite abana, mughala wabo mwasighalya omukali wiwe.
26 Mubyabya bitya oko w’akabiri, n’oko w’akasatu, erihika oko w’eririnda (7).
27 N’oko nduli, omukali naye mwahola.
28 Neryo kundi mwabya mukali w’abalume irinda (7) bosi, omughulu w’erilubuka, akendisyabya mukali wandi oko bosi abo?”
29 Yesu mwabasubirya ati: “Muherire, kundi simwasi Amasako kutse obutoki bw’oMungu.
30 Kusangwa omughulu w’erilubuka, abalume sibendisyatahya, n’abakali sibendisyatahibwa; aliwe bakendisyabya ng’abamalaika omo lubula.
31 Oko mwatsi w’erilubuka ly’abaholi, simwetasoma ebyo oMungu ababwira ati:
32 ‘Niri Mungu wa Abrahamu, Mungu wa Isaka, na Mungu wa Yakobo?’ Iye, ni Mungu w’abaliho, si Mungu w’abaholi.”
33 Abandu mubabya babyowa eki, mubasweka busana n’erikangirirya riwe.
34 Abafarisayo babere babyowa ngoko Yesu mwakaleka Abasadukayo ibabula eky’eribugha, mubasa eyo ali mo kikumula.
35 Neryo, omughuma wa kubo, oyo wasi Emighambo yo kutsibu, akasonda eritegha Yesu mwamubulya ati:
36 “Mukangirirya, ekyalayiro kikulu omo Mighambo ni kyahi kwehi?”
37 Yesu mwamusubirya ati: “‘Litolere iwanza Yehova* Mungu waghu n’omutima waghu wosi, n’obuyingo* bwaghu bosi, n’obulengekania bwaghu bosi.’
38 Eki kye kyalayiro kikulu kandi eky’erimbere.
39 Eky’akabiri ekisosirekyo kya kino: ‘Litolere iwanza mulikyenyu ngoko uyanzire.’
40 Emighambo yosi, n’amakangirirya w’abaminyereri, biseghemere oko byalayiro bibiri ebyo.”
41 Neryo omughulu Abafarisayo bahindana haghuma, Yesu mwababulya ati:
42 “Muwite amalengekania wahi oko Kristo? Ni mughala wandi?” Mubamusubirya bati: “Ni mughala wa Daudi.”
43 Mwababulya ati: “Neryo busanaki ekirimu mukyasondola Daudi erimwahula mo Mukama, omughulu abugha ati,
44 ‘Yehova* mwabwira Omukama waghe ati: “Wikale oko luhande lwaghe lw’amali, erihika omughulu ngendisyahira esyonzighu syaghu sy’eyikwa w’ebisando byaghu?”’
45 Daudi amabya inyakahula Kristo mo Mukama wiwe, Kristo akatasyabya ati mughala wiwe?”
46 Muhatabya oyo watoka erimusubirya. Eritsuka ekiro ekyo muhatasyabya oyukamubulaya eribulyo.
Amaelezo awehikwa
^ Kutse “ababya oko mesa.”
^ Ulebaye endomeko B14.
^ Ulebaye endomeko A5.
^ Ulebaye amaana w’ebinywa.
^ Ulebaye endomeko A5.
