Engulu mbuya eyahandikawa na Matayo 23:1-39
23 Neryo Yesu mwabugha n’abigha biwe n’abandu bangyi ababyaho ati:
2 “Abakangirirya b’Emighambo n’Abafarisayo, babiriyiha ehamuli eyo Musa abya nayo.
3 Neryo ebyosi ebyo bakababwira, mukwamebyo n’erikolabyo; aliwe isimwakola ebyo bakakola. Kundi bakabugha emyatsi nikwa sibalikolayo.
4 Bakasenga emiheke eyilitohire n’erihirayo oko bitigho by’abandu; nikwa ibo sibalyanza n’omunwe wabo akatulya kuyo.
5 Ebyosi ebyo bakakola, bakakolabyo busana n’eriyikangania oko bandu. Kusangwa ehisanduku ehirimo amasako, ehyo bakambala busana n’eriyiteya bakayirahyo mo hinene-hinene, kandi bakayira emisike y’esyongyimba syabo mo miri-miri.
6 Kandi bakanza eryikala oko bitumbi by’olukengerwa ahali erirya, n’eryikala oko bitumbi by’embere-mbere omo syosinagogi.*
7 Bakanza eriramukibwa omo syosoko,* kandi bakanza abandu ibabirikirabo mo bakangirirya.*
8 Nikwa inywe, isimwahulawa mo Mukangirirya,* kusangwa Omukangirirya wenyu ni mughuma, n’inywe bosi muli baghala kwa baghala.
9 Kandi isimwabirikira omundu wosi-wosi mo tata wenyu hano h’oko kihugho, kundi Tata wenyu ni mughuma oyuli omo lubula.
10 Kandi isimwahulawa mo basondoli, kusangwa Omusondoli wenyu ni mughuma, ye Kristo.
11 Nikwa omukulu omo kati-kati kenyu, atolere iniabya mughombe wenyu.
12 Oyukayihamaya* akendisyakehibwa; n’oyukayikehaya, akendisyahamibwa.
13 “Obulighe okw’inywe batebya, bakangirirya b’Emighambo n’Abafarisayo! Kusangwa mukakingira abandi b’Obwami bw’elubula. Kundi inywe simul’ingira mubo, n’abakasonda eringira mubo mukakakirayabo.
14 * ——
15 “Obulighe okw’inywe batebya, bakangirirya b’Emighambo n’Abafarisayo! Kusangwa mukalaba omo ngetse n’oko kitaka ekyumire mukasonda omundu mughuma w’eringirya omo kisomo kyenyu. Mukabya mwabimwingirya mukyo, mukaleka iniatolera eriya omo Gehena* mo ngendo ibiri kubalenga.
16 “Obulighe okw’inywe basondoli ndimetime! Inywe mukabugha muti, ‘Omundu amalahirya oko hekalu si kibi nomo ate angaberererya; aliwe amalahirya oko horo eyiri omo hekalu, litolere iniaberererya.’
17 Inywe bakiru kandi ndimetime! Ehoro kutse ehekalu eyikaleka ehoro iyabya nyibuyirire, ekikulu oko kindi kye kyahi?
18 Kandi mukabugha muti, ‘Omundu amalahirya oko kiherero si kibi; aliwe amalahirya oko kihembo ky’oko kiherero litolere iniaberererya.’
19 Inywe bandu ndimetime! Omo kati-kati k’oluhembo n’ekiherero ekikaleka ekihembo ikyabya kibuyirire, ekikulu oko kindi kye kyahi?
20 Omundu amabilahirya oko kiherero, akabya iniamalahirya oko kiherero n’oko byosi ebiri kukyo.
21 N’omundu amabilahirya oko hekalu, akabya iniamalahirya oko hekalu, n’oko Mungu omwenye hekalu.
22 N’oyukalahiraya oko lubula, akabya iniamalahirya oko kitumbi ky’obwami ky’oMungu n’oko oyo wikere mukyo.
23 “Obulighe okw’inywe batebya, bakangirirya b’Emighambo n’Abafarisayo! Kusangwa mukaliha oMungu y’ekighuma ky’omw’ikumi ky’esyonyinyi sy’omunana, n’ebizari n’ejira; aliwe simulitsomana emyatsi mikulu-mikulu y’omo Mighambo; ng’eritswera eritunganene, erikwira abandi b’obulighe n’obutaleghula. Mukayira ndeke mukaliha ekighuma ky’omw’ikumi; aliwe siritolere mukalekerania eyindi myatsi.
24 Basondoli ndimetime! Mukaghenenula* akahuka kake nikwa imwamera engamia.
25 “Obulighe okw’inywe batebya, bakangirirya b’Emighambo n’Abafarisayo! Kusangwa mukeraya ehihya w’ekopo n’ehihya w’ekibakuli,* nikwa emwisi byoswiremo omururu n’esyongumbu nyibi.
26 Iwe Mufarisayo ndimetime! Utsuke werya emwisi w’ekopo ne w’ekibakuli bitoke eryera n’ehihya.
27 “Obulighe okw’inywe batebya, bakangirirya b’Emighambo n’Abafarisayo! Kusangwa muli ng’esisinda esihakireko erangi nyeru,* esikalangirika ehihya isighambire, nikwa emwisi isyoswiremo amakuha w’abaholi n’emyatsi yosi eyikita nye.
28 Nenyu, abandu bakabalangira ehihya nga mutunganene, nikwa emwisi moswiremo obutebya n’ebibi.
29 “Obulighe okw’inywe batebya, bakangirirya b’Emighambo n’Abafarisayo! Kusangwa mukahimba amasinda w’abaminyereri n’eripamba amasinda w’abatunganene.
30 Kandi mukabugha muti, ‘Ko twabyaho omughulu w’abotata-kulu betu sitwangasangire haghuma nabo eryuta omusasi w’abaminyereri.’
31 Neryo, inywe bene-bene mukakanganaya ngoko muli bana b’abandu abita abaminyereri.
32 Neryo mubughirire omubiiri* ogho abotata-kulu benyu batsuka.
33 “Inywe nzoka, olubuto lw’esyonzoka!* Mukesyabala eritswera rye Gehena* lyo muti kwehi?
34 Busana n’omwatsi oyu, ngabatumira abaminyereri, abandu b’amenge, n’abakangirirya. Abandi mukendisyitabo, abandi mukendisyahanikabo oko miti, n’abandi mukendisyaswiriryabo omo syosinagogi* syenyu, n’abandi imwahigha-highaniabo omo miyi.
35 Neryo emisasi y’abatunganene bosi ababiritwa oko kihugho itoke eribya oko mitwe yenyu; eritsuka oko musasi wa Abeli erihika oko musasi wa Zekaria mughala wa Barakia, oyo mwitira omo kati-kati k’ehekalu n’ekiherero.
36 Oko kwenene ngababwira, ekizazi* eki kikendisyasuyirwa busana n’emyatsi eyi.
37 “Yerusalema, Yerusalema! Iwe ukita abaminyereri n’erita omo mabwe abandu abo oMungu akakutumira! Nabirisonda ngendo singahi erikuma-kumira abana baghu bo haghuma ngoko eributi ly’engoko likanakuma-kumira emipyeghe yalyo y’omo bipupa byalyo! Nikwa mughutanza.
38 Lebaya! Wamasighirwa oko waghu.
39 Kusangwa ngakubwira, siwendisyanyilolako erihika omughulu ukendisyabugha uti, ‘Omuyisa ali oko oyukasa omo rina rya Yehova!’”*
Amaelezo awehikwa
^ Ulebaye amaana w’ebinywa.
^ Kutse “ehitale.”
^ Kutse “Rabi.”
^ Kutse “Rabi.”
^ Kutse “oyukayihahamisaya.”
^ Ulebaye endomeko A3.
^ Ulebaye amaana w’ebinywa.
^ Kutse “erigheghena.”
^ Kutse “ekibindi.”
^ Kutse “erangyi y’omusohe, ey’enzeru.”
^ Kinywa kwa kinywa, “musuliriraye olulengo lw’abotata-kulu wenyu.”
^ Kinywa kwa kinywa, “esyomboma, ebikweta.”
^ Ulebaye amaana w’ebinywa.
^ Ulebaye amaana w’ebinywa.
^ Kutse “olulengo.”
^ Ulebaye endomeko A5.
