Engulu mbuya eyahandikawa na Matayo 24:1-51
-
EKIMINYIKALO KY’ERIBYAHO LYA KRISTO (1-51)
24 Neryo omughulu Yesu abya akalua omo hekalu, abigha biwe mubahika aho ali erimukangania emihimbire y’ehekalu.
2 Mwababwira ati: “Munalangire ebyosi ebi? Oko kwenene ngababwira, hano sihali eribwe n’erighuma erikendisyasighala oko rindi eritendisyasambulwa.”
3 Neryo Yesu inianikere oko Kitwa ky’Emizeituni, abigha biwe mubasa aho ali ahate bandu bamamubulya bati: “Utubwire emyatsi eyi nga ikendisyabya mughulu wahi. Kandi, ekiminyikalo ky’eribyaho ryaghu* n’eky’ebiro by’enduli y’ekihugho ni kyahi?”
4 Yesu mwasubiryabo ati: “Mulebaye ndeke isihabya omundu oyukabatebaya.
5 Kusangwa abangyi bakendisyasa omo rina ryaghe bakabugha bati, ‘Ingye Kristo.’ Kandi bakendisyatebya abandu bangyi.
6 Mukendisyalangira amalwa n’eryowa esyongulu sy’amalwa. Muyiteghaye, simuhahukaye emitima; kusangwa litolere emyatsi eyi iyabya, aliwe enduli isiyiriyahika.
7 “Kusangwa ekihanda kikendisyalwa n’ekindi kihanda; n’obwami n’obundi bwami; kandi hakendisyabya erikeha ly’akalyo, ihabya n’emisiki omo biharo mbiriri-mbiriri.
8 Emyatsi yosi eyi yiri ng’eritsuka ry’obulumi obo omukule akabya nabo akasonda eributa.
9 “Neryo abandu bakendisyabaghalya* n’eribita. Kandi ebihanda byosi bikendisyabapona* busana n’erina ryaghe.
10 N’abandu bangyi bakendisyaleka obwikirirya.* Kandi, abandu bakendisyahoterana n’eriponana.
11 Abaminyereri bangyi b’amabehi bakendisyahuluka, kandi bakendisyatebya abandu bangyi.
12 Kandi kusangwa obubi bukendisyakanyirira, olwanzo lw’abandu bangyi lukendisyaholoka.
13 Nikwa oyukendisyayiyinia erihika oko nduli yukendisyalamibwa.
14 N’engulu mbuya y’Obwami eyi ikendisyatulaghanibwa omo kihugho kyosi abandu b’ebihanda byosi boweyo,* neryo enduli ikendisyahika.
15 “Neryo omughulu mukendisyalangira ekindu ekikita esyonye kandi ekikaheraya, ekyo omuminyereri Danieli ahula kikahangana ahabuyirire (oyukasoma ayiteghereraye),
16 abali e Yudea batsuke eritibita oko bitwa.
17 N’omundu oyuli oko nyumba kw’endata, isyingira omo nyumba ati akendamo ebindu.
18 N’oyuli omw’irima syasubire olukimba* lwiwe.
19 Obulighe oko bakule n’abakendisyabya n’abana abakanyonya* omo biro ebyo!
20 Mubye mukasaba isimwasyatibita omughulu w’embeho nene* kutse ekiro ky’Esabato.
21 Kusangwa oko biro ebyo, hakendisyabya eryaghalwa rinene* eriteryatabya eritsuka okw’ihangyikwa ly’ekihugho kandi eritendisyasyabya enyuma syaho.
22 OMungu amatendisyayira ebiro ebyo mo bikuhi, isihendisyabya oyukalama. Nikwa akendisyakehyabyo busana n’abasombolwa* biwe.
23 “Omundu amabibabwira ati, ‘Kristo ane hano,’ kutse, ‘Ane erya!’ Isimwamwikiriraya.
24 Kusangwa abo Kristo b’amabehi n’abaminyereri b’amabehi bakendisyahuluka. Bakendisyakola ebitiko-tiko n’emyatsi eyikaswekaya eyikendisyaleka abandu bangyi ibahera; nibya, kyamatokekana n’abasombolwa.*
25 Batahi, namabibabwira embere emyatsi eyi yibye!
26 Neryo bamabibabwira ambu, ‘Kristo ane omo mbwarara,’ isimwayayo. Kandi bamabibabwira ambu, ‘Ane omo byumba,’ isimwaligha.
27 Kusangwa, ngoko akarabyo* kakalua eyo eryubya rikahuluka n’erikolerya eyo likalengera; eribyaho* ry’Omughala w’omundu ko rinemwendisyabya litya.
28 Ahali ekinda ho amasamba akendisyayikuma-kumira.
29 “Neryo eryaghalwa ly’ebiro ebyo ryabinahwa, eryuba rikendisyabya mwirimya, n’omughenda syendisyakolerya. N’esyongununu sikendisyatoghonga erilua omo kyanya; n’ebindu by’amaka by’omo kyanya bikendisyasuka-sukanibwa.
30 Neryo ekiminyikalo ky’Omughala w’omundu kikendisyahuluka omo kyanya; n’ebihanda byosi by’oko kihugho bikendisyalira busana n’obulighe. Kandi bakendisyalangira Omughala w’omundu akasa omo bitu by’ekyanya n’obutoki n’olukengerwa lunene.
31 Kandi akandisyatuma abamalaika biwe omo mulenge munene w’engubi. Neryo bakendisyahindania abasombolwa* biwe erilua oko mahunga ani w’ekihugho; eritsuka oko nduli nguma y’ekyanya erihika oko yindi nduli.
32 “Muleberaye oko muti w’omutini. Omughulu ehitahi hyagho hilere-hilere hikoloberera n’eryasako ebiti, mukaminya ngoko omughulu w’omwisi ali hakuhi.
33 Nenyu kutya, omughulu mukendisyalangira emyatsi yosi eyi ikabya, imwaminya ngoko Omughala w’omundu ali hakuhi oko lukyo.
34 Oko kwenene ngababwira, ekizazi* eki sikyendisyalaba emyatsi yosi eyi iteyabererera.
35 Ekyanya n’ekihugho bikendisyalaba, aliwe ebinywa byaghe bikendisyabyaho kera na kera.
36 “Sihali oyo wasi ekiro ekyo n’endambi eyo; nomo bangabya abamalaika kutse Omughala w’omundu. Tata musa yunasi.
37 Kusangwa ngoko emyatsi yanabya oko mughulu wa Noa, n’eribyaho* ry’Omughala w’omundu ko rikendisyabya litya.
38 Kusangwa embere w’eribwagha ly’amaghetse, abandu babya bakalya n’erinywa; abalume babya bakatahya, n’abakali eritahibwa; erihika ekiro Noa ingira omo bwato.
39 Mubatatsomana erihika aho eribwagha ly’amaghetse ryasira n’eribirya abosi. N’eribyaho ry’Omughala w’omundu ko rinemwendisyabya litya.
40 Oko mughulu oyo, abalume babiri bakendisyabya ibane omw’irima. Bakendisyaghenda n’omughuma, n’oghundi iniasighala.
41 Abakali babiri bakendisyabya ibanemuswa oko luso lughuma; bakendisyaghenda n’omughuma n’oghundi iniasighala.
42 Busana n’ekyo muteghaye, kundi simwasi Omukama wenyu ng’akendisyahika kiro kyahi.
43 “Aliwe muminye eki: Omwenye nyumba kw’aliminya endambi eyo omwibi akendyasirako, syangayireto; syangalighire enyumba yiwe ikatulwa.
44 Busana n’ekyo mubye imunayiteghekenie; kusangwa Omughala w’omundu akendisyasa oko ndambi eyo mutalengekenie.
45 “Nindi yo mughombe mutaleghula n’ow’amenge, oyo omukama wiwe asighira abaghombe b’enyumba yiwe atoke erihabo akalyo kabo oko mughulu atolere?
46 Obutseme buli oko mughombe oyo, omughulu omukama wiwe akasubula n’erimweya inianemukola atya!
47 Oko kwenene ngababwira, iniakendimuyira mo muteya w’ebindu biwe byosi.
48 “Nikwa omughombe oyo amabya ini mubi n’eritsuka eribugha omo mutima wiwe ati, ‘Omukama waghe syendisyasa luba,’
49 neryo iniatsuka erihunza abaghombe balikyabo n’erirya n’erinywa haghuma n’abatamiri,
50 omukama w’omughombe oyo iniakendisyasa oko kiro n’endambi eyo omughombe oyo atalengekenie.
51 Omukama wiwe iniakendimusuyira kutsibu n’erimughusa eyiri abatebya. Eyo akendisyalira n’erikeregheta ameno.
Amaelezo awehikwa
^ Ulebaye amaana w’ebinywa.
^ Kutse “bakendisyabahotera mughalibawe.”
^ Kutse “bakendisyabakwa obusu.”
^ Kutse “eritwikala.”
^ Kinywa kwa kinywa, “eribya bwimiri.”
^ Kutse “olukimba lw’eryambalira oko lundi.”
^ Kutse “abakonga.”
^ Kutse “amatsuku.”
^ kutse “obulighe bunene.”
^ Kutse “abayisoghawa.”
^ Kutse “abayisoghawa.”
^ Kutse “eripalya ly’obutuku.”
^ Ulebaye amaana w’ebinywa.
^ Kutse “abayisoghawa.”
^ Kutse “olulengo.”
^ Ulebaye amaana w’ebinywa.
