Engulu mbuya eyahandikawa na Matayo 25:1-46
25 “Obwami bw’elubula bwanganasosekanibwa n’abambesa* ikumi abaghenda n’esyotala syabo bakayalindirira iba w’omulunga.*
2 Abatano babya bakiru n’abandi batano babya b’amenge.
3 Kusangwa abakiru mubaheka esyotala syabo aliwe mubataheka amaghuta.
4 Nikwa ab’amenge mubaheka esyotala syabo bamaheka n’awandi maghuta omo syotsupa.
5 Iba w’omulunga mwatasa luba; neryo abosi mubatsuka eriyitsingirako n’eriyato.
6 Omo kati k’ekiro, abandu mubatsuka eribirikira bati: ‘Iba w’omulunga* amahika! Muyamukokaye.’
7 Neryo abambesa bosi mubahangana n’eriteghekania esyotala syabo.
8 Abakiru mubabwira ab’amenge bati: ‘Mutuhe oko maghuta wenyu kusangwa esyotala syetu sikasonda erilima.’
9 Ab’amenge mubasubirya bati: ‘Alinga syendighonera okw’itwe nenyu; mughende aho bakaghulayagho, muyaghule.’
10 Babere ibane omo nzira bakayaghula, iba w’omulunga mwahika. Abambesa ababya ibanayiteghekenie, mubingira naye omo kisendebele ky’endwa. Neryo omulango mwakingwa.
11 Enyuma syaho, n’abambesa abayaghula amaghuta mubahika. Mubabugha bati, ‘Mukama, Mukama, kisi tukingulire.’
12 Mwasubiryabo ati, ‘Oko kwenene ngababwira, sinibasi.’
13 “Busana n’ekyo mubye imunateghirye kundi simwasi ekiro kutse endambi.
14 “Kandi Obwami bw’elubula bwanganasosekanibwa n’omundu oyo wabirikira abaghombe biwe, amabasighira ebindu biwe akasonda eriya omo kindi kihugho.
15 Mwaha omughuma y’esyotalanta* itano, n’oghundi amamuha esyotalanta ibiri, n’oghundi amamuha etalanta nguma. Mwaha obuli mundu erikwamana n’obutoki bwiwe. Neryo mwaghenda.
16 Oyo wahabawa esyotalanta itano mwalw’inyayakola musyo mw’obuhingania; syamatunda, syamabuta esindi itano.
17 N’oyo wahabawa esyotalanta ibiri, mwatundisyasyo syamabuta esindi ibiri.
18 Aliwe omughombe oyo wahabawa etalanta nguma, mwayatakulirayo omo kitaka.
19 “Habere halaba mughulu muli, omukama w’abaghombe abo mwasa; neryo amakola emighanzo haghuma nabo.
20 Neryo oyo wahabawa esyotalanta itano mwasa, amaleta esindi itano. Mwabugha ati, ‘Mukama, muwamba esyotalanta itano; nabiritundisyasyo, syabiributa esindi itano.’
21 Omukama wiwe mwabugha ati, ‘Wasingya kutsibu, mughombe mubuya kandi mutaleghula! Wabiribya mutaleghula oko bindu bike. Ukendibya muteya w’ebindu bingyi. Ingira omo butseme bw’omukama waghu.’
22 Enyuma syaho, oyo wahabawa esyotalanta ibiri naye mwasa. Mwabugha ati, ‘Mukama, muwamba esyotalanta ibiri; nabiritundisyasyo, syabiributa esindi ibiri.’
23 Omukama wiwe mwabugha ati, ‘Wasingya kutsibu, mughombe mubuya kandi mutaleghula! Wabiribya mutaleghula omo bindu bike. Ukendibya muteya w’ebindu bingyi. Ingira omo butseme bw’omukama waghu.’
24 “Oko nduli omughombe oyo wahabawa etalanta nguma mwasa. Mwabugha ati, ‘Mukama, munaminya ngoko uli mundu oyukalire; ukaghesa aho utabiba, kandi ukasonga-songaya aho utaghulukiraya.
25 Neryo munasagha, munayatakulira etalanta yaghu y’omo kitaka. Etalanta yaghu eyo, y’eyi.’
26 Omukama wiwe mwamusubirya ati, ‘Iwe mughombe mubi kandi mughata! Wamabibugha uti muwaminya ngoko ngaghesa aho natabiba, n’erisongya-songya aho ndaghulukiraya, ko bite bitya?
27 Busana n’ekyo, wangahirire esyofranga syaghe sy’omo banke; neryo nangabere nasa, nangalusirye sy’eyo isyabiritunda.’
28 “‘Mumusaghule etalanta eyo awiteko, muheyo oyuwite esyotalanta ikumi.
29 Kusangwa omundu oyuwite akendisyahabwa ebindi, neryo iniabya n’ebingyi. Aliwe oyutawite, nibya n’ebyo awite akendisyasaghulwabyo.
30 Mughuse omughombe mutya-mutya oyu y’ehihya omo mwirimya. Eyo akendilira n’erikeregheta ameno.’
31 “Omughulu Omughala w’omundu akendisyasa omo lukengerwa lwiwe, n’abamalaika bosi haghuma naye; akendisyikala oko kitumbi kiwe ky’obwami ky’olukengerwa.
32 Ebihanda byosi bikendisyahindanibwa embere siwe; naye akendisyasombola abandu ngoko omulisya akasombola esyombuli omo syombene.
33 Neryo akendisyahira esyombuli oko luhande lwiwe lw’amali, n’esyombene oko lw’amalembe.
34 “Neryo Omwami akendisyabwira abali oko luhande lwiwe lw’amali ati: ‘Mwase, inywe mwabiritsumulwa na Tata waghe! Mwimaye Obwami mo mwandu ogho Tata wenyu abiribateghekanirya erilua okw’itsuka ly’ekihugho.
35 Kundi omughulu nabya nikwire enzala, mumwamba eky’erirya. Omughulu nabya nikwire enyota, mumwamba amaghetse w’erinywa. Omughulu nabya mugheni, mumwanikokya ndeke.
36 Omughulu nabya ndumbu, mumwamba eky’eryambala. Omughulu nabya nilwere, mumwanyitsomana. Omughulu nabya omo muliki, mumwaya nibana.’
37 Neryo abatunganene bakendisyamubulya bati: ‘Mukama, twakulolako mughulu wahi ighunakwire enzala twamakuha eky’erirya; ighukwire enyota twamakuha amaghetse w’erinywa?
38 Twakulolako mughulu wahi ighuli mugheni neryo twamakukokya ndeke, kutse ighuli ndumbu twamakuha esyongyimba?
39 Twakulolako mughulu wahi ighulwere kutse ighune omo muliki twamayakubana?’
40 Omwami akendisyabasubirya ati, ‘Oko kwenene ngababwira, omughulu mwakolerakyo omughuma w’oko bake-bake kutsibu w’oko baghala betu aba, n’ingye mwakolerakyo.’
41 “Neryo akendisyabwira abali oko luhande lwiwe lw’amalembe ati: ‘Mulue aho nyiri, inywe mwabiritakirwa! Mughende omo muliro wa kera na kera owateghekanibawa busana na Diabolo n’abamalaika biwe.
42 Kusangwa munakwa enzala, mumutamba eky’erirya. Munakwa enyota, mumutamba amaghetse w’erinywa.
43 Munabya mugheni aliwe mumutanikokya. Munabya ndumbu, mumutamba esyongyimba sy’eryambala. Munalwala n’eriya omo muliki, aliwe mumutanikokya.’
44 Neryo nabo bakendisyamubulya bati: ‘Mukama, twakulolako mughulu wahi ighukwire enzala kutse enyota, kutse ighuli mugheni, kutse ighuli ndumbu, kutse ighulwere, kutse ighuli omo muliki twamaghana erikutsomana?’
45 Naye akendisyabasubirya ati: ‘Omughulu mwaghana erikolerakyo omughuma w’oko bake-bake kutsibu aba, n’ingye mwaghana erikolerakyo.’
46 Aba, bakendisyaheribwa kera na kera; aliwe abatunganene bakendisyabana engebe y’erikota.”
Amaelezo awehikwa
^ Kutse “ababikira.”
^ Kutse “iba w’omuheruki.”
^ Kutse “iba w’omuheruki.”
^ Etalanta nguma y’Abagiriki iyikabyamo ebilo 20,4. Ulebaye endomeko B14.
