Engulu mbuya eyahandikawa na Matayo 26:1-75
-
Abahereri bakaya embita y’eryita Yesu (1-5)
-
Yesu amutwako amaghuta awakakumba ndeke (6-13)
-
Epasaka y’omwiso n’erihoterwa (14-25)
-
Eritsukisya Akalyo k’erigholo-gholo k’Omukama (26-30)
-
Yesu akabugha ati Petro akendimughana (31-35)
-
Yesu akasaba inyane omo ririma lye Getesemane (36-46)
-
Yesu akahambawa (47-56)
-
Eritondesibwa embere sye Sanhedrini (57-68)
-
Petro akayighana Yesu (69-75)
26 Yesu mwabya abibugha erikania emyatsi yosi eyi, mwabwira abigha biwe ati:
2 “Munasi ngoko hakisiya biro bibiri Epasaka* iyahika; kandi Omughala w’omundu akendihirwa omo byala by’abakendimwita kandi akendihanikwa oko muti.”
3 Neryo abahereri bakulu n’abasondoli b’Abayahudi mubahindana omo kibugha ky’omuhereri mukulu oyo wabya akahulawa mo Kayafa.
4 Kandi mubaya embita y’erihamba Yesu omo menge n’erimwita.
5 Nikwa mubabya bakabwirana bati: “Isitwakolakyo omo kiro kikulu, abandu bakasyatutsatsuhirako.”
6 Omughulu Yesu abya e Betania omo nyumba ya Simoni omuhagha,
7 omukali mughuma mwahika aho ali. Abya n’etsupa ye alabasta eyabyamo amaghuta awakakumba ndeke kandi awakaghula franga nyingyi. Yesu inianemulya,* omukali oyo mwatsuka eryuta amaghuta ayo oko mutwe wiwe.
8 Abigha mubabya babilangira ekyo, mubahitana n’eribugha bati: “Amaghuta aya akatahera busa busanaki?
9 Amaghuta aya alyendighulibwa esyofranga nyingyi, neryo isyahabwa abera.”
10 Yesu mwabya abiminya ebyo bakabugha, mwabugha nabo ati: “Mukakenderaya omukali oyu yo busanaki? Amanikolera omwatsi mubuya.
11 Kusangwa abera mune nabo ebiro byosi, nikwa ingye simwendibya naghe ebiro byosi.
12 Amateghekania omubiri waghe busana n’eritabwa akuta kugho kw’amaghuta awakakumba ndeke aya.
13 Kwenene ngababwira, ehosi eyo engulu mbuya eyi ikendisyatulaghanibwa omo kihugho kyosi, omwatsi ogho omukali oyu amakola, nagho akendisyabya akakanibwako busana n’erimwibuka.”
14 Neryo omughuma w’oko bakwenda 12, oyo wabya akahulwa mo Yuda Iskariote, mwaya eyiri abahereri bakulu.
15 Mwababulya ati: “Mwangambaki namabihotera Yesu mutoke erimuhamba? Mubalagha erimuha ebitsere 30 by’efeza.”*
16 Eritsuka oko ndambi eyo, Yuda mwabya akasondekania akanya akuwene ak’erimuhoteramo.
17 Oko kiro ky’erimbere ky’eriteghekania Omukati owatemo levire,* abigha mubasa ahali Yesu bamamubulya bati: “Wanzire itwayakuteghekanirya Epasaka* yo hayi?”
18 Mwasubiryabo ati: “Muye omo muyi, oho wa lebe, mumubwire muti, ‘Omukangirirya ati: “Endambi yaghe yabirihika. Ngendikolera Epasaka* haghuma n’abigha baghe aho waghu.”’”
19 Neryo abigha mubakola ngoko Yesu anababwira. Mubateghekania Epasaka.*
20 Erigholo-gholo ryabere lyahika, Yesu haghuma n’abakwenda biwe 12, mubikala oko mesa bakalya haghuma.
21 Ibanemulya, Yesu mwabwirabo ati: “Ngababwira ekwenene, omughuma w’okw’inywe akendinihotera.”
22 Babere babyowa ekyo, mubakwa obulighe. Neryo obuli mughuma wa kubo mwatsuka eribulya Yesu ati: “Mukama, ikwa ningye kwehi?”
23 Yesu mwasubiryabo ati: “Oyukakolaya ebyala biwe omo kibakuli* haghuma naghe, yukendinihotera.
24 Ni kwenene Omughala w’omundu, akendilusibwa okw’inywe ngoko Amasako anamubughireko. Aliwe obulighe oko oyukendihotera Omughala w’omundu. Kyangabere kibuya omundu oyo kw’atalibutawa.”
25 Yuda oyo wabya inyasiya iniahotera Yesu, mwasubirya ati: “Mukangirirya,* ikwa ningye kwehi?” Yesu mwamusubirya ati: “Wamabibughakyo iwuwene-wene.”
26 Ibakinalya, Yesu mwimya omukati. Neryo abere abisaba, mwatsutsangagho; amahagho abigha biwe. Mwabugha ati: “Mwimaye, mulye. Oyu akasosekanaya omubiri waghe.”
27 Kandi mwimya ekikombe.* Mwabya abisaba, mwabahakyo. Mwabugha ati: “Munywe kukyo inywe bosi.
28 Kusangwa eki kikasosekanaya omusasi waghe w’endaghane owakendyutika busana n’abandu bangyi batoke erighanyirwa amalolo.
29 Nikwa ngababwira, sinendisyasyanywa oko divai erihika ekiro ngendisyanywa oko divai nyihya-nyihya haghuma nenyu omo Bwami bwa Tata waghe.”
30 Neryo babere babiimba bakapipa oMungu, mubaya oko Kitwa kye Mizeituni.
31 Yesu mwabwirabo ati: “Busana n’ebikendinihikira, inywe bosi mukenditwikala omo kiro kya munabwire. Kusangwa kyabirihandikwa kiti: ‘Ngendisyahunza omulisya, n’esyombuli sy’omo kihyo sikendisyapanzikana.’
32 Aliwe ngendisyabya nabilubuka, ngendisyabatanga e Galilaya.”
33 Nikwa Petro mwamusubirya ati: “Abosi aba nomo bangatwikala busana n’ebikendikuhikira, ingye sinenditwikala n’ahake.”
34 Yesu mwamusubirya ati: “Oko kwenene ngakubwira, munabwire omo kiro, engoko-lume siyendibika utewanighana ngendo isatu.”
35 Petro mwamusubirya ati: “Nibya nomo lyangabya erihola haghuma naghu, sinangatakughana n’ahake.” N’abandi bigha bosi mubabugha batya.
36 Neryo Yesu n’abigha biwe mubahika ahakahulawa mo Getesemani. Mwabwira abigha biwe ati: “Mwikale hano, ngaya halya, ngayasaba.”
37 Mwaghenda na Petro n’abaghala babiri ba Zebedayo. Neryo mwatsuka eribya n’obulighe bunene, n’omutima wiwe mwapuka-puka kutsibu.
38 Neryo mwabwirabo ati: “Nabirikwa obulighe bunene omo mutima, nibya bwangananita. Mubye hano muteghaye haghuma naghe.”
39 Neryo mwabya abighenda embere yo hake, mwunamira oko kitaka amasaba ati: “Tata kyamabitokekana, unilusayeko ekikombe* eki. Nomo bine, erisonda lyaghu ryo rikoleke, butsira eryaghe.”
40 Mwasuba eyiri abigha; ameyabo ibabiriyato. Neryo mwabwira Petro ati: “Mwamataluka eriteya haghuma naghe omo saha nguma?
41 Mubye imunateghirye n’erisaba butumbya, mukasyingira omw’ilengwako. Kwenene, omutima ananzire, aliwe omubiri ni molo.”
42 Kandi mwaghenda engendo y’akabiri amayasaba ati: “Tata kyamabya isikyangatokekana ekikombe* eki eriniluako nitetanywakyo, uleke bibye ngoko usondire.”
43 Kandi mwasubula ameyabo ibabiriyato; kusangwa ameso wabo abya inyabirilitoha.
44 Neryo mwalua aho bali amaghenda, amayasaba engendo y’akasatu. Mwabugha ebinywa bighumerera.
45 Neryo mwasuba ahali abigha n’eribabwira ati: “Oko ndambi eyiri ng’eno, mukaluhuka n’eriyato! Endambi eyo Omughala w’omundu akendihoterwako n’erihirwa omo byala by’abakola-nabi yamabihika.
46 Muhangane tughende. Oyukendinihotera amabihika hakuhi.”
47 Iniakinabugha, Yuda omughuma w’oko bakwenda ikumi n’ababiri mwasa n’ekikumula kinene ky’abandu; ibanahekire emiyali n’emyigho.* Abahereri bakulu n’abasondoli b’Abayahudi bo batuma abandu abo.
48 Neryo oyo wamuhotera abya iniabirihabo ekiminyikalo ati: “Oyo ngendiha ebeze* in’iye. Mukendimuwatako n’erimuboha.”
49 Yuda mwalw’iniaya ahali Yesu, n’eribugha ati: “Kuti kwe Rabi.”* Neryo mwamuha ebeze.*
50 Nikwa Yesu mwamubulya ati: “Tahyee, ukasyenda hano hoki?” Neryo mubasa, bamahamba Yesu n’erimuwatako.
51 Neryo omughuma w’oko ababya na Yesu mwimya omuyali wiwe amabanda omughombe w’omuhereri mukulu n’eritwa okutu kwiwe.
52 Neryo Yesu mwamubwira ati: “Usubaye omuyali waghu w’oho wagho. Kusangwa oyukita omo muyali, naye akendisyakwa omo muyali.
53 Kutse ukalengekanaya uti sinangasaba Tata waghe niti oko ndambi eno anitumire emilondo y’abamalaika eyilabire oko 12 kwehi?
54 Nikwa namabikola nitya, Amasako awabughire ati emyatsi ko yitolere iyaghenda yitya, inyakendisyabererera ati?”
55 Oko ndambi eyo Yesu mwabwira abandu abo ati: “Mukasyanihamba n’emiyali n’esyongoni nga mukasyahambaho omwibi! Ebiro byosi ingabya inine omo hekalu ngakangirirya, ka momutanihamba!
56 Nikwa ebyosi ebi byamabya busana n’eriberererya ebyo abaminyereri bahandika.” Neryo abigha bosi mubamusigha bamatibita.
57 Abahamba Yesu mubamutwala ew’omuhereri mukulu ye Kayafa; eyo abakangirirya b’Emighambo n’abakulu b’abandu babya bahindene.
58 Nikwa Petro mwamukwama enyuma iniane hali. Mwahika omo kibugha ky’omuhereri mukulu. Mwabya abingiramo, mwikala haghuma n’abaghombe b’enyumba akalebya ngoko emyatsi ikendighenda.
59 Neryo abahereri bakulu n’Esanhedrini* yosi babya ibanemusondekania emyatsi y’amabehi eyo bangahira oko Yesu batoke erimwita.
60 Nomo abandu bangyi banabya bakasa bakamubughako emyatsi y’amabehi, mubatamubanako omwatsi w’amabehi n’omughuma. Enyuma syaho muhasa abandu babiri.
61 Mubabugha bati: “Omulume oyu mwabugha ati, ‘Nanganahimbula ehekalu y’oMungu n’eritasyahimbayo omo biro bisatu.’”
62 Neryo omuhereri mukulu mwahangana amabulya Yesu ati: “Siwendisubirya? Wamabugha utiki oko myatsi eyo abandu aba bakakubughako?”
63 Aliwe Yesu mwabya bukutu. Neryo omuhereri mukulu mwamubwira ati: “Ngakulapisaya embere sy’oMungu oyuliho, utubwire nga nina we Kristo, Omughala w’oMungu!”
64 Yesu mwamusubirya ati: “Iwuwene-wene wamabibughakyo. Aliwe ngababwira: Eritsuka lino mukendilangira Omughala w’omundu inianikere oko byala by’amali by’obutoki kandi akasa oko bitu by’ekyanya.”
65 Neryo omuhereri mukulu mwatula ekanzu yiwe amabugha ati: “Amabitsuma oMungu! Tukinalaghire oko bandi bimiri kwehi? Lero mwamabiyowira ebyo amabugha.
66 Nenyu muli n’amalengekania wahi?” Nabo mubasubirya bati: “Atolere iniakwa!”
67 Neryo mubamutwirako amatandi omo busu, n’erimuha esyongume. N’abandi mubamuha amakofi omo busu
68 ibanemubugha bati: “Iwe Kristo, minyerera okw’itwe nga nindi yo wamakuhunza.”
69 Petro, abya inianikere ehihya omo kibugha. Neryo omusika mughuma, omughombe w’omo nyumba y’omuhereri mukulu mwasa aho ali n’eribugha ati: “Naghu wabya na Yesu Omugalilaya!”
70 Nikwa Petro mwayighana embere sy’abosi ati: “Sinasi ebyo ukabugha nga ni bihi.”
71 Petro mwahuluka, amahika oko bwingiriro bw’ekibugha. Oghundi musika mwamuminyerera, n’eribwira ababyaho ati: “Omulume oyu abya na Yesu Omunazareti.”
72 Kandi Petro mwayighana n’erilahirya ati: “Sinasi omulume oyo n’ahake.”
73 Habere habihwa akatambi kake ababya bimeneho mubasa, n’eribwira Petro bati: “Oko kwenene, naghu uli mughuma wa kubo; kundi emibughire yaghu yiri ng’eyikuwabo.”
74 Neryo Petro mwatsuka eritsuma n’erilapa ati: “Sinasi omundu oyo!” Neryo aho n’aho engoko-lume muyabika.
75 Neryo Petro mwibuka ebinywa ebyo Yesu abugha ati: “Engoko-lume siyendibika utewanighana ngendo isatu.” Neryo mwahulukira ehihya, amayalira n’obulighe.
Amaelezo awehikwa
^ Kutse “Erikiruka.”
^ Kutse “inyane oko mesa.”
^ Ni kindu ky’obughuli ekikalua omo kitaka.
^ Kutse “Ekihamya.”
^ Kutse “Erikiruka.”
^ Kutse “Erikiruka.”
^ Kutse “Erikiruka.”
^ Kutse “ekibindi.”
^ Kutse “Rabi.”
^ Kutse “olutehi.”
^ Kutse “olutehi.”
^ Kutse “olutehi.”
^ Kutse “esyongoni, emyutso mikuhi-mikuhi.”
^ Kutse “oyo ngendilyatsirira, oyo ngendiha ebizu.”
^ Kutse “Mukangirirya.”
^ Kutse “mwamulyatsirira.”
^ Ulebaye amaana w’ebinywa.
