Engulu mbuya eyahandikawa na Matayo 27:1-66
27 Bwabere bwabya tututu, abahereri bakulu n’abasondoli b’Abayahudi, mubaya embita y’erita Yesu.
2 Neryo babere babimuboha, mubamutwala ew’omuguvernere we Yudea ye Pilato.
3 Yuda oyo wahotera Yesu abere alangira ngoko Yesu amabitswerwa oluholo, mwayikubya b’omo. Neryo mwasubulya ebitsere 30 by’efeza* eyiri abahereri bakulu n’abasondoli b’Abayahudi.
4 Mwabugha ati: “Nabirikola nabi ngahotera omundu oyuteko olubanza.” Mubamusubirya bati: “Ebyo ni byaghu, sibitulebirye!”
5 Neryo Yuda mwaghusa ebitsere by’efeza* ebyo omo hekalu. Neryo mwaluaho amayayihanika.
6 Aliwe abahereri bakulu mubimya ebitsere by’efeza* ebyo, n’eribugha bati: “Erikwamana n’Emighambo sibitolere bikahirwa omo kibo ky’ehekalu; kusangwa ni franga sy’omusasi.”
7 Babere babisoha, mubaghula oko syofranga esyo kw’ekitaka ky’omubumbi busana n’eribya bakata mukyo mw’abagheni.
8 Erihika na munabwire ekitaka ekyo kikahulawa mo Ekitaka ky’omusasi.
9 Neryo ebinywa bino ebyo omuminyereri Yeremia abugha mubyabererera: “Mubimya ebitsere 30 by’efeza;* eyi ye beyi eyo batswera oko mundu; omundu oyo abana be Israeli balebe bahirako ebeyi.
10 Kandi mubaghula kubyo kw’ekitaka ky’omubumbi ngoko Yehova* ananyilayira.”
11 Neryo Yesu mwimana embere sy’omuguvernere. Omuguvernere mwamubulya ati: “Uli Mwami w’Abayahudi kwehi?” Yesu mwamusubirya ati: “Ighuwene-wene wamabibugha.”
12 Aliwe omughulu abahereri bakulu n’abasondoli b’Abayahudi babya bakamutsongera eby’amabehi, mwatasubirya.
13 Neryo Pilato mwamubulya ati: “Siwowire emyatsi yosi eyi eyo banemukubughako kwehi?”
14 Nikwa Yesu mwatamusubirya n’ekinywa n’ekighuma; ekyo mukyaleka Pilato iniasweka kutsibu.
15 Oko buli kiro kikulu omuguvernere inyakaboholera abandu b’omundu mughuma w’omuliki oyo bakendyanza.
16 Oko mughulu oyo babya ibanabohire omulume mughuma oyo wabya asibwe ko ni mutsibu. Abya iyo Baraba.
17 Neryo omughulu abandu babya bahindene haghuma, Pilato mwababulya ati: “Mwanzire inababoholera ndi? Ye Baraba kutse ye Yesu oyukahulawa mo Kristo?”
18 Kusangwa Pilato abya inyanasi ngoko eritsuro ryo riryaleka ibahotera Yesu.
19 Kandi Pilato inyanikere oko kitumbi kiwe ky’eritswera, omukali wiwe mwamutumako omulaghe ati: “Isiwayingiraya omo mwatsi w’omundu mutunganene oyo. Kusangwa munabwire omo kiro mungaghalawa kutsibu omo syonzoli busana naye.”
20 Nikwa abahereri bakulu n’abakulu b’abandu mubatsotsya abandu eribugha bati Baraba yuboholawe, na Yesu itawe.
21 Neryo Pilato mwababulya ati: “Oko babiri nibaboholere ndi?” Mubasubirya bati: “Ye Baraba.”
22 Pilato mwabulyabo ati: “Neryo Yesu oyukahulawa mo Kristo, nimuyire liti?” Abosi mubasubirya bati: “Ahanikawe oko muti!”
23 Mwabugha ati: “Busanaki? Akolire kibi kyahi?” Nikwa mubabirikira kutsibu okw’aho n’eribugha omo mulenge muli bati: “Ahanikawe oko muti!”
24 Neryo Pilato mwabya abilangira ngoko omwatsi amatalukana, kandi ngoko abandu banganatsatsuha; mwimya amaghetse amanaba oko byala embere sy’abandu n’eribugha ati: “Sindiko musango* wosi-wosi w’omusasi w’omundu oyu! Olo ni lubanza lwenyu.”
25 Neryo abandu bosi mubasubirya bati: “Omusasi wiwe abye okw’itwe n’oko bana betu.”
26 Neryo mwababoholera Baraba. Aliwe mwahamula ati Yesu ahunzawe omo bikoba. Kandi mwabaha Yesu bayamuhanike oko muti.
27 Neryo abasuda ba Pilato mubatwala Yesu y’omo kyaghanda* kya Pilato n’erihindania abasuda bosi, bamamutimbako.
28 Neryo mubabya babimulusya ekanzu yiwe, mubamwambalya erikoti ery’erangi y’omunyama.*
29 Neryo mubaluka embita y’amahwa bamahirayo oko mutwe wiwe, n’erihira oluseke l’omo byala biwe by’amali. Kandi mubabya bakakukama embere siwe ibanemumusekererya bati: “Kuti kwe Mwami w’Abayahudi!”
30 Mubamutwirako amatandi kandi mubimya oluseke bamatsuka erimuswirya oko mutwe.
31 Mubabya babimusekererya, mubamulusya erikoti eryo, bamamwambalya ekanzu yiwe. Neryo mubamutwala eriyamukongomerera oko muti.
32 Babere banemughenda, mubahindana n’omulume we Kirene oyukahulawa mo Simoni. Neryo mubamukasa eriheka omuti* ogho Yesu akendihanikwako.
33 Neryo babere bahika ahakahulawa mo Golgota ni bugha ambu Ah’erikuha ry’omutwe,*
34 mubamuha edivai eyitulungenemo ebindu ebikalihire ng’endulu; nikwa mwabya abighonza kuyo mwaghana erinywayo.
35 Babere babimukongomerera oko muti, mubakola obukanga bakaghaba esyongyimba siwe.
36 Neryo mubikala ahisi bakamuteya.
37 Kandi endata oko mutwe wiwe, mubahiraho ekibenete ekihandikireko ebinywa ebyo babya bakamutsongeramo biti: “Oyu ni Yesu, Omwami w’Abayahudi.”
38 Mubahanika n’abibi* babiri hakuhi naye; omughuma oko luhande lwiwe lw’amali n’oghundi oko lw’amalembe.
39 N’ababya bakalabaho, mubabya bakatsingya emitwe yabo bakatsuma Yesu
40 ibanemubugha bati: “Iwe wabya ukabugha uti wanganasambula ehekalu n’erihimbayo omo biro bisatu, lero yilamaye! Wamabya ighuli Mughala w’oMungu, kima oko muti!”*
41 Abahereri bakulu, abakangirirya b’Emighambo, n’abasondoli b’Abayahudi nabo mubamusekererya bati:
42 “Oyo walamaya abandi, nikwa syangatoka eriyilamya! Ni Mwami w’Abaisraeli, egho akime oko muti* tumwikiriraye!
43 Abiriyiketera oMungu; ino oMungu amulamaye amabya inyanamwanzire! Kusangwa abya akabugha ati, ‘Niri Mughala w’oMungu.’”
44 Nibya n’abibi abahanikawa oko muti hakuhi naye mubamusekererya batya.
45 Eritsuka oko saa sita* erihika oko saa tisa* y’eritungyi, ekihugho kyosi ekyo mukyabyamo omwirimya.
46 Oko yiri nga saa tisa* Yesu mwalaka ati: “Eli, Eli, lamasabaktani?” Ni bugha ambu, “Mungu waghe, Mungu waghe busanaki wabirinzighania?”
47 Abaghuma b’oko babya bimeneho babere babyowa eki, mubabugha bati: “Omulume oyu akabirikira Eliya.”
48 Neryo omughuma wa kubo mwalw’inatibitira ekivuta,* amahirakyo omo tsaghu-tsaghu y’edivai. Mwahirakyo oko luseke, n’erihirakyo oko buno bwa Yesu ati anywe.
49 Aliwe abandi ba kubo mubabugha bati: “Tusamalire! Tulebaye Eliya ng’anemwendyasa akasyamulamya.”
50 Kandi Yesu mwabirikira omo mulenge muli; neryo amatwa omutima.*
51 Neryo erido ry’ehekalu* mulyatulika mo bihande bibiri eritsuka endata erihika eyikwa. Neryo omusiki mwalaba n’amabwe* amatulangika.
52 N’esisinda musyakingukala, n’emibiri mingyi y’ababuyirire ababya ibabirihola muyaluamo.
53 (N’abandu abalua eyiri esisinda enyuma sy’erilubuka liwe mubingira omo muyi abuyirire), n’abandu bangyi mubalola oko mibiri eyo.
54 Nikwa omukulu w’abasuda n’ababya haghuma naye bakateya Yesu babere balangira omusiki n’emyatsi eyabya, mububaha kutsibu n’eribugha bati: “Kwenene oyu alue Mughala w’oMungu.”
55 Habya n’abakali bangyi ababya bakasamalira ibanimene hali. Abakali aba mubakwama Yesu erilua e Galilaya bakamuwatikya.
56 Oko bakali abo habya, Maria Magdalena, Maria mama wa Yakobo na Yose, na mama w’abaghala ba Zebedayo.
57 Bwabere bwabya igholo-gholo, omuteke mughuma erilua e Arimatea oyukahulawa mo Yozefu mwahika. Naye abya inyabiribya mwigha wa Yesu.
58 Yozefu mwaya eyiri Pilato amamusaba omubiri wa Yesu. Neryo Pilato mwabugha ati bamuhegho.
59 Yozefu mwimya omubiri oyo, amalingira kugho kw’olukimba lw’ekitani ekyuwene kandi eky’erire.
60 Neryo mwahiragho omw’isinda nyihya-nyihya eyo abya inyabiribatsa omo lukuka. Neryo mwabya abikumbaghalirya oko bwingiriro bwayo kw’eribwe; mwaghenda.
61 Aliwe Maria Magdalena n’oghundi Maria mubasighalaho ibanikere ahali eyisinda.
62 Engyakya, ni bugha ambu ekiro ky’Esabato,* abahereri bakulu n’Abafarisayo mubahindana embere sya Pilato.
63 Mubabugha bati: “Mukama, twamibuka ngoko omutebya oyo omughulu abya inyakineho mwabugha ati, ‘Ngendisyalubuka habikya ebiro bisatu.’
64 Neryo uhamule eyisinda yiteghibawe erihika oko kiro eky’akasatu abigha biwe bakasyayamwiba n’eribwira abandu bati, ‘Abirilubuka erilua oko baholi.’ Neryo amabehi aya inyakendikala kwilaba aw’erimbere.”
65 Pilato mwababwira ati: “Mwimaye abateya; mughende muyateghaye eyisinda ngoko mwangatoka.”
66 Neryo mubaghenda bamahira oko ribwe kw’ekibohi n’erihira okw’isinda kw’abateya.
Amaelezo awehikwa
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Ulebaye endomeko A5.
^ Kutse “olubanza.”
^ Kutse “ekikali.”
^ Kutse “eyisondire erisosa engula, erangyi eyisondire erisosa omusasi.”
^ Ulebaye amaana w’ebinywa.
^ Kutse “ah’erihanga.”
^ Kutse “abarahi, abanyeyi.”
^ Ulebaye amaana w’ebinywa.
^ Ulebaye amaana w’ebinywa.
^ Ni bugha ambu, 12:00.
^ Ni bugha ambu 15:00.
^ Ni bugha ambu, 15:00.
^ Kutse “esipongyi, embughuma.”
^ Kutse “amahola.”
^ Erido eri irakaghaba Ahabuyirire n’Ahabuyirire Kutsibu.
^ Kinywa kwa kinywa, “esyonguka.”
^ Kinywa kwa kinywa, “ekiro ky’Eriteghekania kyabilaba.”
