Engulu mbuya eyahandikawa na Matayo 28:1-20
28 Esabato yabilaba, omo mitsange y’ekiro ky’erimbere eky’eyenga, Maria Magdalena n’oghundi Maria mubayalebya eyisinda.
2 Omusiki munene abya inyabirilaba; kusangwa omumalaika wa Yehova* inyabirikima elubula, inyabirikumbaghalirya eribwe ly’oho lutambi n’eriikala kuryo.
3 Abya akangabasenie ng’eripalya ry’obutuku, n’esyongyimba siwe syabya nyeru-nyeru ng’enzururu.*
4 Abateya mubatitimana busana n’erimusagha; neryo mubabya nga baholire.
5 Aliwe omumalaika mwabwira abakali abo ati: “Isimwasagha, kusangwa nyinasi ngoko mukarondaya Yesu oyo bahanika oko muti.
6 Syali hano; kusangwa abirilubuka ngoko anabugha. Mwase mulebaye ahalue omubiri wiwe.
7 Neryo mughende luba muyabwire abigha biwe ngoko abirilubuka erilua oko baholi. Kusangwa, lebaya! Abiribatangirira e Galilaya; mukendimweyayo. Omwatsi w’oyo.”
8 Neryo mubalw’ibalua okw’isinda ibane n’obuba aliwe kandi ibanatsemire kutsibu. Neryo mubanguha eriyabwira abigha ba Yesu b’omwatsi oyo.
9 Yesu mwahindana n’abakali abo. Mwabugha ati: “Mwabukire!” Mubaseghera hakuhi naye, bamahamba oko bisando biwe n’eryunama embere siwe.
10 Neryo Yesu mwababwira ati: “Isimubaha! Mughende muyabwire abaghala betu baye e Galilaya. Eyo yo bakendinisunga.”
11 Abakali abo ibakine omo nzira, abaghuma b’oko bateya mubaya omo muyi n’eriyakanirya abahereri bakulu b’emyatsi yosi eyabere.
12 Abahereri bakulu babere bahindana haghuma n’abakulu b’Abayahudi n’erikania haghuma nabo, mubaha abasuda b’esyofranga nyingyi.
13 Mubabwirabo bati: “Mubughe muti: ‘Abigha biwe mubakasa omo kiro itwabirighotsera bamamwiba.’
14 Omwatsi oyo amabihika oko muguvernere, itukendikania naye; neryo isimwendibyako olubanza.”
15 Neryo mubimya esyofranga esyo n’erikola ngoko balyahanawa. Omwatsi oyo abiritsungana omo kati-kati k’Abayahudi erihika na munabwire.
16 Nikwa abigha 11 mubaya e Galilaya oko kitwa eyo Yesu abugha ati bakendihindana.
17 Mubabya babimulangira, mubunama embere siwe. Nikwa abandi mubatika-tika.
18 Yesu mwaseghera hakuhi nabo, n’eribugha nabo ati: “Ehamuli yosi nabirihabwayo omo lubula n’oko kihugho.
19 Neryo mughende, muyire abigha erilua oko bandu b’ebihanda byosi. Mubatisayebo omo rina rya Tata, n’ery’Omughala, n’ery’ekirimu kibuyirire.
20 Mukangirirayebo erikwama ebyosi ebyo nabiribahana. Kandi mwibuke ngoko nyine haghuma nenyu ebiro byosi erihika oko biro by’enduli y’ekihugho.”*
