Engulu mbuya eyahandikawa na Matayo 3:1-17
3 Oko biro ebyo, Yohana Mubatisya mwahika omo mbwarara ye Yudea akatulira.
2 Abya akabugha ati: “Mubindule emitima yenyu kusangwa Obwami bw’elubula buli hakuhi.”
3 Yohana yo mundu oyo omuminyereri Isaya ahula ati: “Omundu anemubirikira omo mbwarara ati: ‘Muteghekanaye enzira ya Yehova!* Muwanaye esyonzira siwe.’”
4 Yohana abya akambala olukimba lw’obweya bw’engamia n’omukaba w’engobi omo mbindi yiwe. N’akalyo kiwe kabya esyongyike n’obuki b’omoli.
5 Abandu be Yerusalema ne Yudea yosi n’ebiharo byosi ebitimbire oko Yordani ibakasa eyiri Yohana.
6 Kandi ibakaghungama amalolo wabo, neryo Yohana inyababatisya* omo lusi lwe Yordani.
7 Abere alangira Abafarisayo n’Abasadukayo bangyi bakasyabatisibwa, mwabwirabo ati: “Inywe bana b’esyonzoka,* nindi yulyabahana ati mutibite mukasagha eritswera ry’oMungu kwehi?
8 Inywe mukole emyatsi eyikakanganaya ngoko mwabiribindula emitima, n’erileka ebibi byenyu.
9 Isimwayiteba mukabugha muti: “Tuli bana ba Abrahamu.” Kundi ngababwira ngoko oMungu anawite obutoki bw’eriha Abrahamu y’abana erilua omo mabwe aya.
10 Embasa yabirihirwa oko mulihi w’emiti. Obuli muti owatehetaya amatunda aghuwene akendikondwa n’erighuswa omo muliro.
11 Ingye ngababatisaya omo maghetse, kusangwa mwabiribindula emitima yenyu. Aliwe oyukendyasa enyuma syaghe awite akaghala kanene okw’ingye. Sinitolere nibya erimulusya ebiryato biwe. Iye, akendisyababatisya omo kirimu kibuyirire n’omo muliro.
12 Ekipao kiwe ky’erighulukyamo engano kine omo byala biwe. Akendibirya ekihumbiro kiwe kyo ndeke. Neryo akendisyahira engano yiwe y’omo depo.* Aliwe omusunga akendisyahisyagho omo muliro owate angalima.”
13 Enyuma syaho, Yesu mwalua e Galilaya amasa oko lusi lwe Yordani, Yohana atoke erimubatisya.
14 Aliwe, Yohana mwasonda erighana. Mwamubwira ati: “Iwe utolere erinibatisya, ibwa kandi ukabugha uti n’ingye nikubatisaye?”
15 Yesu mwamusubirya ati: “Isiwaghana erinibatisya. Kusangwa litolere itwaberererya ebyosi ebitunganene.” Neryo mwaligha erimubatisya.
16 Yesu abere abibatisibwa, mwalw’inyalua omo maghetse. Neryo olubula mulwakingukala, na Yohana mwalangira ekirimu ky’oMungu kikandaghala ng’akalikuku n’eryikira oko Yesu.
17 Neryo kandi, omulenge mwalua elubula. Mwabugha ati: “Oyu ni Mughala waghe, omwanzwa oyo nabiriligha.”
Amaelezo awehikwa
^ Ulebaye endomeko A5.
^ Kutse “erilubika.”
^ Kinywa kwa kinywa, “esyomboma, ebikweta.”
^ Kutse “ekighona.”
