Engulu mbuya eyahandikawa na Matayo 4:1-25
4 Neryo ekirimu mukyatwala Yesu y’omo mbwarara,* Diabolo atoke erimulengako.
2 Mwabya abibugha emisibo 40 n’ebiro 40 butalya, mwakwa enzala.
3 Neryo Diabolo mwasa erisyamulengako. Mwamubwira ati: “Wamabya ighuli mughala w’oMungu, ubwire amabwe aya uti ahinduke mikati.”
4 Aliwe Yesu mwamusubirya ati: “Amasako akabugha ati: ‘Siritolere omundu akabyaho busana n’akalyo* kasa, nikwa busana n’obuli kinywa ekikalua omo buno bwa Yehova.’”*
5 Kandi Diabolo mwamutwala omo muyi abuyirire. Neryo mwamuhira ahayisumbire kutsibu oko hekalu.
6 Neryo mwamubwira ati: “Wamabya ighuli mughala w’oMungu uyighuse ahisi, kusangwa Amasako akabugha ati: ‘OMungu akendisyakutumira abamalaika biwe, nabo bakendisyakuwatikya* sighuhinde ekisando kyaghu ky’oko ribwe.’”
7 Yesu mwamubwira ati: “Kandi Amasako akabugha ati: ‘Isiwalenga oko Yehova* Mungu waghu.’”
8 Kandi Diabolo mwatwala Yesu y’oko kitwa kiri-kiri, n’erimukangania amami wosi w’ekihugho n’olukengerwa lwagho.
9 Mwamubwira ati: “Ngendikuha ebindu byosi ebi wamabinyunamira n’erinyiramya.”*
10 Neryo Yesu mwamubwira ati: “Uluaho we Sitani! Kundi Amasako akabugha ati: ‘Yehova* Mungu waghu yo litolere iwaramya, kandi iye musa yo litolere iwakolera omubiiri owabuyirire.’”
11 Neryo Diabolo mwamuleka. Neryo abamalaika mubasa n’erimuwatikya.
12 Omughulu Yesu owa ngoko Yohana abirihirwa omo muliki, mwaya e Galilaya.
13 Enyuma syaho, mwalua e Nazareti, amayikala e Kapernaumu oko musike w’engetse omo kihugho kya Zebuloni n’ekya Naftali.
14 Ekyo kyabya busana n’eriberererya ekyo omuminyereri Isaya abugha ati:
15 “Ekihugho kya Zebuloni n’ekihugho kya Naftali, oko nzira eyikalolaya oko ngetse, eyisirya we Yordani, e Galilaya y’ebihanda!
16 Abandu abikere omo mwirimya mubalangira ekyakakala kinene; n’abandu abikere omo kihugho ekirimo ekitsutsu ekyangaleta oluholo, ekyakakala mukyakoleryabo.”
17 Eritsuka oko mughulu oyo, Yesu mwatsuka eritulira ati: “Mubindule emitima yenyu, kusangwa Obwami bw’elubula buli hakuhi.”
18 Yesu inyanemuyilenderya oko musike w’engetse ye Galilaya, mwalangira abalume babiri abasubeneko; ye Simoni oyukahulawa mo Petro na mughala wabo ye Andrea. Babya ibanemughusa obutimba b’omo ngetse, kundi babya basohi b’esyosamaki.
19 Mwabwirabo ati: “Munyikwame; ngendibayira mo basohi b’abandu.”
20 Mubalw’ibasigha amatimba wabo bamamukwama.
21 Abere abitasyalola aho mbere ho hake, mwalangira abandi balume babiri abasubeneko; ye Yakobo na Yohana abaghala ba Zebedayo. Babya omo bwato haghuma na baba wabo ye Zebedayo, ibanemukokotya amatimba wabo. Neryo Yesu mwababirikira.
22 Mubalw’ibasigha baba wabo n’obwato, neryo bamakwama Yesu.
23 Kandi mwatimba omo Galilaya yosi akakangirirya omo syosinagogi* syabo, n’eritula engulu mbuya y’Obwami, n’erilamya emihanda yosi y’esyondwala n’amakoni.
24 Neryo, engulu yiwe muyayitsa-tsanga omo kihugho kyosi kye Siria. Kandi mubamuletera abakoni bosi ababya bakaghalwa omo makoni mbiriri-mbiriri n’amaghali; ababyako esyombinga, ababya balwere ebitutsa, n’ababyako ebitsuko ebibasire. Na Yesu mwalamya abosi abo.
25 Neryo ebikumula by’abandu mubyalua e Galilaya, e Dekapoli,* e Yerusalema, ne Yudea, n’eyisirya we Yordani, bikakwama Yesu.
Amaelezo awehikwa
^ Kutse “omw’irungu.”
^ Kinywa kwa kinywa, “omukati.”
^ Ulebaye endomeko A5.
^ Kutse “bakendisyakubaghalira omo byala byabo.”
^ Ulebaye endomeko A5.
^ Kinywa kwa kinywa, “erinyiramya ngendo nguma.”
^ Ulebaye endomeko A5.
^ Ulebaye amaana w’ebinywa.
^ Kutse “Ekihugho ky’Emiyi Ikumi.”
