Engulu mbuya eyahandikawa na Matayo 7:1-29
7 “Muleke eribya mukatswera abandi, nenyu mukasyatswerwa.
2 Kusangwa ngoko mukatswera abandi nenyu ko munemwendisyatswerwa mutya; n’olulengo olo mukalengamo, lo munemwendisyalengerwamo.
3 Neryo busanaki ukalangira akati akali omo riso lya mulikyenyu, nikwa ighutalangira ekitika ekiri omo riso ryaghu kwehi?
4 Kutse wangatoka ghuti eribwira mulikyenyu uti: ‘Leka nilusaye akati akali omo riso lyaghu,’ nikwa ekitika ikine omo riso lyaghu kwehi?
5 Iwe mutebya!* Utsuke walusya ekitika ekiri omo riso lyaghu imo watoka erilangira ndeke ukalusya akati akali omo riso lya mulikyenyu.
6 “Isimwaha esyombwa sy’ebindu ebibuyirire, kutse erighusira esyongulube sy’ebindu by’obughuli,* sikasyalyatangirabyo n’enyuma syaho isyababindukira n’eribakola nabi.
7 “Mulole embere erisaba, mukendibana ekyo mukasaba. Mulole embere erisondya, mukendibana ekyo mukasondaya. Mulole embere erikongota, mukendikingulirwa.
8 Kusangwa obuli mundu oyukasaba akahabawa, obuli mundu oyukasondaya akabana ekyo akasondaya, n’obuli mundu oyukakongota, akakingulirawa.
9 Nindi okw’inywe oyo wangaha omwana wiwe y’eribwe inialyamusaba omukati kwehi?
10 Kutse omwana wiwe amabimusaba esamaki, anganamuha enzoka kwehi?
11 Nomo mune babi munasi eriha abana benyu b’ebindu bibuya. Tata wenyu w’elubula akendiha kutsibu okw’aho ebindu bibuya oko bakamusaba!
12 “Neryo, ebyosi ebyo mwanzire abandi ibabakolera, nenyu litolere imwabakolerabyo. Kusangwa Emighambo ya Musa n’amakangirirya w’abaminyereri ko bibughire bitya.
13 “Mwingire omo lukyo luke; kusangwa olukyo lunene n’enzira nene-nene bikakolaya okw’iheribwa. Kandi abakalaba omo lukyo olo ni bangyi.
14 Nikwa olukyo ni luke, n’enzira ni ngengenge eyikakolaya oko ngebe kandi abakabanayo ni bake.
15 “Muyiteghaye oko baminyereri b’amabehi abakasa eyo muli ibabiriyisosekania ng’esyombuli, nikwa emwisi syabo ini mbwa sy’omoli esikalire kutsibu.
16 Mukendisyaminyabo erilabira emibiiri* yabo. Abandu sibalyoha amatunda w’emizabibu oko muti w’amahwa, kutse eryoha emitini oko muti w’amatolu; ko bite bitya?
17 Kutya obuli muti oghuwene akahetaya amatunda aghuwene, n’obuli muti owatuwene akahetaya amatunda awatuwene.
18 Omuti oghuwene syangahetya amatunda awatuwene, n’omuti owatuwene syangahetya amatunda aghuwene.
19 Obuli muti owatehetaya amatunda aghuwene akakondawa n’erighuswa omo muliro.
20 Neryo mukendisyaminyerera abandu abo erilabira emibiiri* yabo.
21 “Si yo buli mundu oyukabugha naghe ati: ‘Mukama, Mukama,’ yukendisyingira omo Bwami bw’elubula; nikwa yo n’oyukakola erisonda lya Tata waghe oyuli elubula.
22 Oko kiro ekyo abandu bangyi bakendisyabugha naghe bati: ‘Mukama, Mukama, mututaminyerera, n’erihigha esyombinga omo rina lyaghu kwehi? Kandi mututakola ebitiko-tiko bingyi omo rina lyaghu kwehi?’
23 Neryo naghe nasyabugha nabo nyiti, ‘Sinyibasi n’ahake. Mulue aho nyiri, inywe bakola-nabi!’
24 “Neryo obuli mundu oyukowa ebinywa byaghe ebi n’erikolabyo, akendisyabya ng’omundu w’amenge oyo wahimba enyumba yiwe y’oko lukuka.
25 Embula muyawa, n’amaghetse amabwagha, n’ekihunga mukyabuhirira, mubyayiswirya oko nyumba eyo. Nikwa enyumba eyo muyitatera kusangwa yabya yihimbire oko lukuka.
26 Kandi obuli mundu oyukowa ebinywa byaghe ebi aliwe inyatakolabyo, akendisyasosekanibwa n’omundu mukiru oyo wahimba enyumba yiwe y’oko mutsanga.*
27 Neryo embula muyawa, n’amaghetse mwabwagha, n’ekihunga mukyabuhirira; mubyayiswirya oko nyumba eyo, nayo muyatera n’eritsanda kutsibu.”
28 Yesu abere abugha eribugha emyatsi eyi, abandu mubasweka busana n’enzira yiwe y’erikangirirya.
29 Kusangwa abya akakangiriryabo ng’omundu oyuwite ehamuli, butsira ng’abakangirirya babo b’Emighambo.
Amaelezo awehikwa
^ Kutse “mulimba-limba.”
^ Kutse “esyolulu.”
^ Kinywa kwa kinywa, “ebighuma, amatunda.”
^ Kinywa kwa kinywa, “ebighuma, amatunda.”
^ Kutse “museghe.”
