Engulu mbuya eyahandikawa na Matayo 8:1-34
8 Yesu abere abilua oko kitwa, abandu bangyi mubamukwama.
2 Neryo omuhagha mwasa amamunamira, n’eribugha ati: “Mukama, wamabya ighunanzire, unyilamaye.”
3 Neryo Yesu mwakakya ebyala, amamutulako n’eribugha ati: “Nyinanzire! Ulamibawe.” Neryo aho n’aho ebihagha biwe mubyalama.
4 Enyuma syaho Yesu mwamubwira ati: “Isiwabwira omundu. Aliwe ughende uyayikanganaye oko muhereri; kandi uherere obuhere obo Musa ahamula busana n’eriminyisyabo ngoko wabirilama.”
5 Yesu abere abihika e Kapernaumu, omukulu w’abasuda mwasa aho ali. Mwamulemba-lemba
6 ati: “Mukulu, omughombe waghe ane eka abasireko ebitsuko, kandi akaghalawa kutsibu.”
7 Yesu mwamusubirya ati: “Ngendibya nahikayo, ngendimulamya.”
8 Omukulu w’abasuda mwamusubirya ati: “Mukulu, niri mundu oyutatolere, siwangingira omo nyumba yaghe! Ubughe ekinywa, n’omughombe waghe akendilama.
9 Kundi naghe ngasikaya abawite ehamuli okw’ingye, kandi nyinawite oko basuda abo niwiteko ehamuli. Namabibwira omughuma niti, ‘Ghenda!’ akaghenda, namabibwira n’oghundi niti, ‘Asa hano!’ akasa. Kandi ngabya namabibwira omughombe waghe niti, ‘Kola kino!’ akakolakyo.”
10 Yesu mwabya abyowa ebinywa ebyo, mwasweka, n’eribwira ababya bakamukwama ati: “Ngababwira ekwenene, sindinatabana omo Israeli mo mundu oyuwite obwikirirya bungana n’obu.
11 Aliwe ngababwira ngoko abandu bangyi erilua eyo eryuba rikahulukira n’eyo likalengera, bakendisyasa n’eryikala oko mesa nguma na Abrahamu, Isaka, na Yakobo omo Bwami bw’elubula.
12 Nikwa abana b’Obwami bakendisyaghuswa ehihya omo mwirimya. Eyo bakendisyalira, n’erikeregheta ameno!”
13 Neryo Yesu mwabwira omukulu w’abasuda ati: “Ughende, ekyo ulyasaba kikoleke busana n’obwikirirya bwaghu.” N’omughombe oyo mwalw’inyalama oko ndambi eyo.
14 Yesu abere ingira omo nyumba ya Petro, mwalangira mabyala wa Petro inyane omo ngyingo, inialwere erihuhana ly’omubiri.
15 Yesu mwatula oko byala biwe, amalama. Neryo mwahangana n’eritsuka erikolera Yesu.
16 Nikwa bwabere bwabya igholo-gholo, mubamuletera abandu bangyi abaliko esyombinga. Yesu mwahigha ebirimu bibi ebyo omo kinywa kighuma kisa. Kandi mwalamya abosi ababya bakaghalwa.
17 Mwakola atya busana n’eriberererya ebyo omuminyereri Isaya abugha ati: “Mwimya amakoni wetu n’eriheka esyondwala syetu.”
18 Yesu mwabya abilangira abandu bangyi ibamabimutimbako, mwabwira abigha biwe ati basokere oko ghundi musirya haghuma naye.
19 Neryo omukangirirya w’Emighambo mwasa ahali Yesu. Mwamubwira ati: “Mukangirirya, ngendikukwama ehosi eyo ukendighenda.”
20 Aliwe, Yesu mwamubwira ati: “Esyoboha sinawite ebyuna, n’esyonyunyu sy’omo kyanya sinawite esyonyutu; aliwe omughala w’omundu syawite ah’erihira omutwe wiwe.”
21 Enyuma syaho, oghundi mwigha mwabugha naye ati: “Mukama, unilighire nyitsuke nayata baba.”
22 Nikwa Yesu mwamusubirya ati: “Unyikwame.* Uleke abaholi bate abaholi babo.”
23 Yesu abere abingira omo bwato, abigha biwe mubamukwama.
24 Enyuma syaho, engetse muyahulukamo ekihunga kinene n’ebisunda mubyabya bikalenga oko bwato. Aliwe Yesu abya inyanaghotsere.
25 Neryo abigha mubasa aho ali, bamamubukya, ibanemubugha bati: “Mukama, utulamaye! Tukahwa!”
26 Nikwa Yesu mwababwira ati: “Mukasagha busanaki,* inywe bandu b’obwikirirya buke?” Yesu mwahangana, amahayira ekihunga n’engetse. Neryo muhabya eritulera linene.
27 Neryo abigha mubasweka, n’eribugha bati: “Kwe oyu ni mundu wa muhanda wahi? Nibya ekihunga n’engetse bikamwowa!”
28 Mwabya abihika oko ghundi musirya w’engetse omo kiharo kye Gadarene, abalume babiri abaliko esyombinga mubasa eyo ali bakalua eyiri esisinda. Babya bakalire kutsibu, neryo isihali omundu oyo wangalaba omo nzira eyo.
29 Neryo mubabugha omo mulenge muli bati: “Ukatusondakoki kwe iwe Mughala w’oMungu? Ukasonda eritwaghalya endambi eyabirihirwaho isiyeyahika?”
30 Aho babya, babya ibanalangire ekihangulo ky’esyongulube nyingyi isinemulya.
31 Neryo esyombinga musyatsuka erimulemba-lemba siti: “Wamatutibitako, iwatughusa omo kihangulo ky’esyongulube.”
32 Neryo Yesu mwabwirasyo ati: “Mughende!” Neryo musyalua kubo n’eriyingira omo syongulube. Ekihangulo kyosi mukyatibita oko mukingyi owasenzere, kyamaya omo ngetse n’eriholeramo.
33 Neryo abalisya mubatibita. Babere bahika omo muyi, mubatula omwatsi wosi. Mubatula n’omwatsi w’abalume ababyako esyombinga.
34 Abandu bosi b’omo muyi mubakumukalira eyiri Yesu. Babere bamusunga, mubamulemba-lemba bati alue omo kiharo kyabo.
